我在鎌倉天氣晴。

相信好多籃球愛好者或男兒當入樽嘅fans都會想去鎌倉呢個咁熱血嘅地方蒲吓。小妹既係過氣籃球員,又係男兒當入樽嘅fans,實在搵唔到藉口唔去!

由東京市內出發去鎌倉主要有2個方法:
A. 由池袋出發搭JR湘南線到鎌倉,車程大約一粒鐘,中途仲會經過小妹最愛嘅橫濱
B. 由新宿出發搭小田急線到藤澤,再轉江之電鐵去鎌倉,車程大約個半鐘
就咁睇,可能好多人都會揀用方法A嘅。
不過由於小妹買咗「江之島-鎌倉一日劵」,價錢平啲之餘仲可以係江之電鐵浴線小站隨便上落車,最啱鍾意搭鐵路嘅人。

喺小田急新宿站買咗飛就出發lu。check咗班次,由新宿去藤澤係由頭搭到尾,瞓陣先!

「下一站海老名。」咦!明明check地圖果陣無見過呢個站架!見唔對路就即刻跳車再去票務部問職員,佢話我哋搭過龍!果一刻,小妹頭上彷彿有幾個閃電喺頭頂走出嚟。明明架車寫住去藤澤架!點解會出咗呢個意外?!(事後同朋友分享,佢一秒就道破迷思)

Anyway,地球係圓嘅。咁問咗職員之後又繼續行返正軌。不過小妹就比原定時間用多咗一個鐘先到藤澤=_=之後又花咗少少時間去搵江之電車站(初頭諗住成車人都係去搭江之電,咁就跟住人群出閘,點知原來佢哋係去熱海地區=_=),總之原定12點幾就去到鎌倉最後差唔多2點先到。


鎌倉小佛。


古早味列車,木地板嚟架!

擾攘咗咁耐終於到達鎌倉,即刻衝去搵嘢食。今次揀咗一間叫「峰本」嘅懷石料理,環境舒適,服務優良,食物超水準,物有所值。(睇返啲相就搞到小妹好掛住佢個蔬菜果凍喇)

食飽就沿住小町通散步。人超多,商店種類頗多,如果要喺每間商店都兜一圈嘅話,行一日都行唔晒。啊仲有!沿路有爆勁多香噴噴嘅小吃,如果唔係頭先嘅午餐食得太飽...


行到小町通嘅盡頭就會見到鶴岡八幡宮,入去行咗個圈,睇埋日式婚禮就閃人。



鎌倉大狗。

更多遊記:https://www.facebook.com/yellowaddictedtotravel

留言


請按此登錄後留言。未成為會員? 立即註冊
    快捷鍵:←
    快捷鍵:→