屋邨妹的迷思… 住公屋大，又如何？ 精選 推薦

曾經有人同我講：「屋邨大嘅小朋友質素真係差啲、洩啲、好似街童咁…」當然佢講呢句說話之前係唔知道我本人係屋邨長大嘅。（當時我內心OS，淨係禮貌呢part你呢個私樓仔已經差我幾皮啦）
不禁想，現今的社會實在有太多標籤，例如住屋邨就係「街童/mk」、打機就係「廢青」、讀書唔成等於「無出色」、基佬一定係「乸型」、做空姐「一定識倒有錢人」等，爭在未去到「靚女唔會屙屎」。

雖然的確有人會標籤/睇低住屋邨大嘅人，但我反而會慶幸我細個嗰時住屋邨，因為住屋邨令我對社會認知更貼地，因為我細細個就清楚知道咩叫做「收買佬」、咩叫「貼財神」、咩叫「冰室」，咩叫「大耳窿追數」，呀仲有，咩叫「窮」。其實屋邨係社會縮影，你可以喺一條邨入面睇到好多社會問題，無錯係「睇到」，唔係聽人講，這可令你即使長大後怎樣，眼光亦不會離地。再講，屋邨住戶經常有免租、免電費，區內又勁多隱世平價美食，真係令我慳番唔少 ;)
曾經同朋友講開住公屋呢個問題，先發現原來有人會因為自己住公屋而感到自卑… 諗起阿爸教過我：「家姐，人點睇你唔重要，最重要係你點睇自己。」沒錯，人的品格、個人質素、甚至將來如何，都是自己一手控制，當然環境有一定影響，但如果連自己都睇小自己，妄自菲薄，咁無論住到邊到都唔會好有出色。好好珍惜住屋邨嘅時間，大個搬走之後，一定會好懷念。

雖然而家我好少返娘家，但每次返去，樓下個看更同隔離屋「區太」（真有其人）都會勁大聲叫我「靚女」、「食咗飯未呀？」 好親切嘅呢～

申利：住咗十幾年公屋，現已搬走。

#其實住屋邨又有咩好怕喎
#人點睇你=/=那就是你丫嘛傻豬豬 ;)_______________________________________

FB: 兼職空姐姥姥
IG: christyylolo
航空資訊、分享生活、隨心寫作。

FB▶https://www.facebook.com/parttimelolo/

UBlog▶http://blog.ulifestyle.com.hk/blogger/christylolo/

GoTrip▶http://www.gotrip.hk/author/christyylf/