【七夕脫獨攻略】全台月老廟大搜查 文字


又到咗一年一度嘅七夕啦!你仲係毒自一個?喺呢個俾人瘋狂用閃光彈攻擊嘅邪惡日子,班現充朋友個個喺 FB、IG 上大放閃光,你係咪都會有啲羨慕嫉妒?唔洗擔心!小編特別為你哋整理咗台灣十大必拜月老廟同拜月老嘅正確流程,等大家今年速速脫單,做個人生贏家啦!
#北中南十大必拜姻緣廟
1.台北萬華龍山寺
圖片來源|Shutterstock全台大大小小廟宇香火鼎盛,其中萬華龍山寺嘅月老廟喺網上嘅討論度就甩咗其他廟幾十條街,堪稱係全台北最靈!其實龍山寺係大廟,主祀觀世音菩薩,神明眾多,喺請月老神君幫忙之前要先依照順序拜完主神,一般會由右邊開始拜起,月老廳就喺左側,同關聖帝君殿嘅眾多神明共用一個香爐。據說三十年前第一代嘅月老金身被偷走,所以我哋依家見到嘅月老像係復刻版,但安座之後都係一樣咁靈㗎!
▶︎地址:10853台北市萬華區廣州街211號
▶︎交通:北捷板南線龍山寺站1號出口或萬華火車站步行約8分鐘
▶︎官網:艋岬龍山寺官網
▶︎開放時間:07:00 – 21:30
▶︎電話:02 2302 5162
2.台北霞海城隍廟
圖片來源霞海城隍廟喺迪化街內,月老廟以「快速」、「效率」配對而聞名。網上面好多網友都曾分享自己嘅經歷,聽講只要誠心求神,喺三個月內就可以有好姻緣,除咗月老靈之外,霞海城隍廟本身都係三級古蹟,古雅嘅建築曾經吸引日劇花嫁のれん(花嫁之簾)喺呢度拍攝,令到呢度變得更加人流不絕。
▶︎地址:103台北市大同區迪化街一段61號
▶︎交通:
捷運-
1. 搭捷運至雙連站2號出口,左轉轉搭518巴士(馬偕醫院站)至南京西路站,再步行3-5分鐘。
2. 搭捷運至台北車站延市民大道直走右轉塔城街直行,行大約30分鐘。
3. 搭捷運蘆洲線至大橋頭站延延平北路二段,行大約20分鐘。
巴士-
1. 可以搭250、304重慶線去到延平一站(南京)落車,
2. 可以搭250、255、274、304重慶線、639、641、704、518去到南京西路口落車。
▶︎官網:台北霞海城隍廟
▶︎開放時間:06:16 – 19:47
▶︎電話:02 2558 0346
3.台中樂成宮
圖片來源|Shutterstock台中樂成宮位於台中市東區早溪街,有超過260年嘅歷史,創建於清乾隆18年,被評定為三級古蹟,主祀媽祖。而樂成宮嘅月老星君最特別嘅除咗係幫手牽紅線之外,相傳求復合都好靈,仲可以幫無緣情侶斬斷桃花!
▶︎地址:401台中市東區旱溪街48號
▶︎交通:台中火車站搭乘20公車往慈濟醫院方向到東光早溪街口站下車
▶︎官網:台中樂成宮
▶︎開放時間:06:30 – 17:30
▶︎電話:04 2211 1928
4.威明堂
圖片來源威明堂係位於台北市中和嘅一間小廟,係少數供奉月老嘅姻緣廟,威名堂供奉兔兒神,專門守護同志嘅姻緣,同時都係全世界第一個兔兒神廟。喺清才子袁枚嘅《子不語》入面有記載到,兔兒神胡天寶原本係清初福建人,因為愛慕同性巡撫而喺巡撫去廁所嘅時候偷窺佢,被發現之後巡撫一怒之下將胡天寶活活打死,之後陰官就封佢為掌管同性愛之神-兔兒神。據講兔兒神並唔喜歡自己被當成動物,所以千祈唔好喺供桌上面擺蘿蔔呀!另外同一般月老廟唔同,兔兒神廟求嘅唔是紅線,而係姻緣符,擲九個筊中,連續三個聖筊就可以求取姻緣符。
▶︎地址:235新北市中和區景安路50號
▶︎交通:搭捷運黃線永安市場站,行9分鐘抵達
▶︎官網:威堂兔兒神殿
▶︎開放時間:13:30 – 21:00,星期二唔開放
▶︎電話:02 8921 1512
5.日月潭龍鳳宮
圖片來源|Coral Hou日月潭月老廟都係經常上榜嘅月老廟,呢間老廟相當之神秘,原祀喺日月潭正中央拉魯島,係蜜月夫婦必訪之處。921之後島嘅面積愈嚟愈細,所以就將月老移至龍鳳宮旁邊供奉。呢度特色係廟祀嘅周圍掛滿咗信眾祈求姻緣嘅吊牌,小編自己有個朋友喺度拜完之後,唔夠半年就脫離咗單身苦海,超級靈~
▶︎地址:555南投縣魚池鄉中山路292號
▶︎交通:
1. 國光客運「台北→日月潭」
2. 台灣好行日月潭線-「台中-高鐵台中站-日月潭(國6)」
3. 南投客運「台中-埔里-日月潭」
▶︎開放時間:06:00 – 21:00
▶︎電話:04 9285 6818
6.鹿港天后宮
圖片來源|Coral Hou呢個相信唔洗小編多介紹啦,喺南台灣聲名遠播嘅古老大廟,庇佑彰化四百年,月下老人自然非常之準,香客年年川流不息。除咗姻緣之外,喺度亦都可以順便拜埋事業、健康,求個保平安。
▶︎地址:505彰化縣鹿港鎮中山路430號
▶︎交通:搭彰化客運往鹿港班車,喺鹿港中山路落車
▶︎官網:鹿港天后宮
▶︎開放時間:06:00 – 22:00
▶︎電話:04 777 9899
7.台南大天后宮
圖片來源台南完全就係拜月老集中地!台南大天后宮係府城四大月老廟之一,每年撮合成300對情侶,據講特色係為愛情加溫,適合情侶一齊去,令彼此感情更加穩定,當然仲單戀緊嘅都可以去求條紅線。
▶︎地址:700台南市中西區永福路二段227巷18號
▶︎交通:自台南火車站前搭2、5、7、11、14、15、17、18等路市巴士去西門站,轉搭27路巴士喺天后宮站落車
▶︎官網:全台祀典大天后宮
▶︎開放時間:05:30 – 21:00
▶︎電話:06 221 1178
8.台南祀典武廟
圖片來源府城四大月老廟之一,既然係武廟,就梗係主祀關聖帝君啦,但唔知係唔係有關公加持嘅緣故,呢間月老廟最出名係斬爛桃花!另外相傳文昌都相當靈,近年嚟廟方喺月老廟旁邊增設咗信箱,等嚟求姻緣嘅信眾可以寫信比月老爺爺,請佢多多幫忙。
▶︎地址:700台南市中西區永福路二段229號
▶︎交通:台南火車站前搭17路市巴士,喺赤崁樓站落車後循永福路行,就可以到達祀典武廟。
▶︎開放時間:05:00 – 21:00
▶︎電話:06 220 2390
9.台南大觀音亭祀典興濟宮
圖片來源府城四大月老廟之一,興濟宮嘅月老造形好特別,個嘴嘅比例特別大,象徵好識做媒。適合想結婚但仲未有對象嘅人,記得描述對象條件嘅時候要愈詳細愈好。
▶︎地址:704台南市北區成功路86號
▶︎交通:由台南火車站搭台灣好行巴士 88安平線或者99台江線,往台南公園方向,喺興濟宮大觀音亭站落車。
▶︎官網:大觀音亭祀典興濟宮
▶︎開放時間:05:00 – 21:00
▶︎電話:06 228 6720
10.台南重慶寺
圖片來源|Shutterstock以求復合聞名嘅重慶寺亦都屬於府城四大月老廟之一,雖然規模唔大,但就有個特別習嘅習俗-「攪醋矸」。相傳以前有個農夫因為老婆有外遇而苦惱不已,就去重慶寺邊攪醋矸邊祈求菩薩幫忙,冇耐之後老婆真係回心轉意,神蹟亦都因此喺鄰里間口耳相傳,所以重慶寺又被稱為醋矸廟。直到依家只要男女朋友拗交、夫妻失和、另一半劈腿都會嚟「速報司」前面攪譚醋。方法係首先要誠心祈求月老,再手持竹棍喺醋矸入面逆時鐘轉三圈就可以。
▶︎地址:700台南市中西區中正路5巷2號
▶︎交通:火車站出站步行至中山路左邊直走到圓環即可到達國立台灣文學館,約20~25分鐘
▶︎開放時間:05:00 – 21:00
▶︎電話:06 223 2628
#如何拜月老
圖片來源|Shutterstock每間月老廟嘅拜法都少少唔同,但主要流程都大同小異。
▶︎Step 1.
準備金紙、香、供品。近年嚟受到西方影響,亦相當流行用朱古力做供品。
▶︎Step 2.
點完香之後,有啲廟要先拜天公;有啲廟就先拜主神,再依據每間廟嘅順序上香。可能你只係想求感情,但都係要向每尊神打個招呼先㗎。拜每尊神嘅時候,心入面都要默念名、農曆生日、屋企地址,等神明知你係邊個。
▶︎Step 3.
拜月老嘅時候,如果冇對象,要講清楚自己對另一半嘅條件,愈清楚愈好,模模糊糊太過浪漫嘅講法,月老聽完都唔知點幫你搵~若然已經有對象,就最好有對方嘅名、生日同地址,然後誠心祈求。
▶︎Step 4.
如果有擲筊,凸嗰面係正,擲到一正一反係聖筊,意思係神明贊同、正面答覆;兩正係怒筊,即係負面答案或者神明覺得呢段感情有困難;兩反係笑筊,即係神明笑而不答,答案仲未明朗,有待觀察。
▶︎Step 5.
最後求得嘅紅線唔好直接放入袋就算,記得要順時針三圈過香爐先有保庇㗎~
#破除拜月老謠言迷思
圖片來源|Fotolia1. 女仔嗰幾日可唔可以拜月老?
好多人以為 Period 就唔可以去拜,其實都要睇返廟本身嘅規矩,只有天公廟同陰廟先有明確規定話女子來經唔可以拜,其他廟宇就冇問題。
2.  紅線要綁喺手上,戴到斷咗就係成功?
小編有個朋友去龍山寺求紅線之後就一直戴喺手腕上面,無論沖涼瞓覺都唔會除落嚟,冇耐之後紅線斷咗,佢仲好高興以為自己就嚟脫離單身,點知依家到咗23歲都仲係單身!其實廟方並唔建議大家綁喺手上面,因為容易斷掉亦容易唔見,最好係放喺銀包、證件夾或者枕頭袋呢啲地方,如果有一日你發現條紅線不知不覺咁消失咗,就代表就嚟有桃花啦~
3. 可以幫朋友求紅線嗎?
答案係唔得!父母可以幫兒女求,自己可以幫兄弟姊妹求,但冇血緣關係嘅就冇辦法啦~
圖片來源|Pixabay4. 供品帶咩比較好?
月老爺爺鐘意食甜野,建議可以帶啲糖/朱古力,另外紅棗枸杞亦都象徵婚姻早成,鮮花都係唔錯嘅選擇,好有愛情嘅感覺。
5. 要點還願呢?
姻緣有成記得要帶份喜餅嚟還願呀!
喺呢度小編祝已經有另一半嘅繼續幸福美滿,單身狗就早日脫單,過個最開心嘅七夕!
除咗拜月老廟,不如再趁機去玩下!
▶︎【南投日月潭感動美景】潭情說畫日月潭一日遊
▶︎台南包車一日遊.發現台南文青小旅行
▶︎【穿梭古蹟小巷】彰化鹿港老街、桂花巷、民俗文物館半日遊
▲認識KKday▲
想挑選心水行程又怕浪費時間比較?KKday 作為亞洲最大旅遊體驗平台,網絡橫跨全球 54 個國家、174 個城市,為您搜羅超過 6,000 種特色行程體驗。只需安坐家中,就能訂購世界各地具品質保證、價格實惠的旅遊產品,助你輕鬆自主行程,創造獨一無二的旅遊體驗。
▲前往 KKday 網站,訂購心水行程!
▲訂閱 KKday電子報,獲取更多旅遊優惠!
關注KKday社交平台動向:
FacebookInstagramYouTube旅友討論區

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→