【西藏丨住宿篇】KKday西藏自由行全攻略! 文字

事先聲明,呢篇絕對唔係酒店大比拼,之前嘅【中伏篇】都講過,香港人唔係到到都住得,基本上小編係冇得揀住邊到嘅~所以呢篇只係一篇分享文!
為左方便大家參考,每間酒店/賓館地址同價錢都列明喺下面,而小編會按每個地方嘅衛生、浴室同服務評分(五分為滿分)!想知道邊間性價比最高、邊間係大伏就要睇落去啦!
滿齋酒店
地址:西藏自治區拉薩市八廓街31號
價錢:¥300/三人房
衛生:☺☺☺☺
浴室:☺☺☺
服務:☺☺☺☺☺
呢間係小編去到西藏住嘅第一間酒店,可以話有個唔錯嘅開始~雖然第一日去到有個小意外,就係冇晒三人間,不過職員好好,唔洗加錢就幫我地換做套房,唔洗再搵酒店仲免費upgrade左!
套房有一張雙人床同一個小客廳,客廳有兩張梳化,可以鋪床單當床瞓,都算舒服。洗手間有兩個,一個連浴室,仲要有浴缸,咁就唔會沖到地下濕晒!套房嘅浴室我會比滿分咖,不過三人房浴室就得浴簾隔開淋浴間,所以就扣啲分!
小編一共喺拉薩留六日,之後五日都係住番三人房,總括黎講都係乾淨舒服嘅。小缺點係燈光唔係好夠,而且廁所經常會有淤塞嘅危機,但以呢個價錢黎講係超值!
杜鵑花酒店
地址:西藏自治區林芝縣廣東路408號
價錢:¥240/三人房
衛生:☺☺☺☺
浴室:☺☺
服務:☺☺☺☺
完全超值嘅一晚,空間夠大而且乾淨舒服!唯一挑剔係廁所完全冇隔開淋浴位,連浴簾都冇,完全係濕_晒,不過唔驚,因為佢水壓低到你根本唔會整濕地板以外嘅地方!但公平啲講,呢個唔只係特定酒店嘅問題,小編住咁多間都係咁樣,唔知係咪因為地勢比較高嘅關係呢?
藏八酒店
地址:西藏自治區日喀則市仁布路小車站對面
價錢:¥360/三人房
衛生:☺☺
浴室:☺☺☺☺
服務:☺☺☺☺
對比前面兩間,呢間嘅性價比就低啲啦!除左因為價錢比較高,衛生狀況都唔係咁理想,走廊同房都有異味,偶爾仲會有啲煙味。另外,酒店嘅隔音極差,夜晚砰門聲聽得好清楚,不過都有可能係小編瞓得唔係咁好,因為同行嘅兩位都話聽唔到……(再發展落去會變鬼故)
幸運嘅係廁所十分乾淨光猛,而且有玻璃門分隔,所以沖完涼地板都係超乾爽!讚!喺呢一站,廁所特別重要,因為第二日就會去珠峰大本營,係冇得沖涼嘅!
註:基本上去珠峰前都會喺日喀則住一晚,除非你日以繼夜夜以繼日咁開車啦~所以酒店旅館都會比較搶手,要預早啲搵,亦都解釋到點解酒店價錢會高啲。
珠峰大本營(五號帳篷)
價錢:¥80/每人
衛生:☺☺☺☺
服務:☺☺☺☺
冇期望就冇失望呢句說話真係一啲都冇錯!原本覺得住帳篷衛生情況一定會好差,仲帶左好多暖包怕凍死,點知又比預期中好好多!帳篷內部好乾淨企理,而且好暖(當然夜晚氣溫都會低番啲),有枕頭被鋪提供,不過感覺唔多良好,所以都係用番睡袋。
帳篷有食物飲品提供,不過司機話價錢偏貴,而且味道麻麻,所以我地就自己準備杯麵飲品。另外,值得一提嘅係佢個廁所(公用嘅,離帳篷有啲距離,夜晚要小心),雖然都係「普通」旱廁,但唔係網上講到咁世界級,至少你睇得出佢係個廁所LOL唔係講笑,真係有廁所你入到去係連窿都搵唔到!!
註:由於帳篷同外面溫差太大,所以入到帳篷唔好著咁多衫啊!唔係好易冷親咖!另外,呢到係完全收唔到電話,要報平安嘅上到帳篷前就要報定啦~
金蘭卓瑪賓館
地址:西藏自治區日喀則上海中路日喀則海事局左側
價錢:¥450/三人房   
衛生:☺
浴室:☺
服務:☺
講到呢到,終於黎到呢篇文嘅重點!其實小編係因為呢間賓館先決定寫呢篇文!絕對唔係因為佢好好,只係小編唔忍心見到你地貼錢買難受啊~
無論係衛生狀況定服務態度,都絕對唔值呢個價,勉強比一分係怕你地以為小編唔記得比分喳!首先由大堂入房,已經要經過充滿水跡同烏蠅嘅露天地方。入到房就發現牆上有黃跡,完全冇清潔過,廁所同地板都有垃圾,而且烏蠅趕極都仲有!
最令小編唔滿意嘅係佢地嘅服務態度!訂三人房但得兩張床,一開始話會打開相連嘅房仔,裡面會有多張床,後來又話唔得,要我地其中一個打地鋪……前言不對後語令人無奈!同佢爭論,佢竟然話唔滿意可以唔住!
事實上,當時撞正日喀則某寺廟慶典,酒店供不應求,所以啲賓館先獅子開大口,我地完全係走投無路,唔想瞓街先忍佢!所以,奉勸大家去日喀則要遠離呢間賓館!
神湖納木錯客棧
價錢:¥240/三人房
衛生:☺☺☺☺
服務:☺☺☺☺
另一個冇期望就冇失望嘅例子~納木錯附近全部都係流動旅館,所以係冇得沖涼,廁所亦係要旅館出面先有一個公用嘅,所以味道都相當世界級……不過,旅館內部係幾乾淨舒服,而且暖暖的!小編住嘅客棧據聞係最大嘅,有一間好大嘅common area,可以食野,wifi亦十分強勁,不過就好多人食煙!
至於三人房入面都幾企理,唯一係隔音有啲差,連隔離房鼻鼾聲都聽得好清楚……同珠峰大本營一樣,杯麵飲品我地都一早準備好,如果你想食熱辣辣嘅早餐,記住要前一日同職員講定啦!
以上分享純粹小編個人意見,大家都可以上網睇多啲評論參考下。小編「認為」自由行的話最重要係搵到個好司機,咁就唔洗怕冇地方落腳同比人呃啦!溫馨提示,跟KKday去西藏就唔洗擔心酒店質素喔~
更多西藏自由行攻略:
【西藏丨交通篇】KKday西藏自由行全攻略!
【西藏丨行李篇】KKday西藏自由行全攻略!
【西藏丨中伏篇】KKday西藏自由行全攻略!
▲認識KKday▲
KKday-世界旅遊體驗網站,在全球 54個國家,174 個城市, 有 5000多種不同的行程與體驗。 KKday內有最特別、最意想不到的的世界行程體驗!不論你想當一日忍者、乘坐直升機享盡奢華旅程、還是你想要與猩猩共進午餐…KKday滿足旅人不同的喜好。KKday幫你省去在各論壇爬文找資料的麻煩,一站解決安排行程的困擾!現在,想來一場與眾不同的旅行就來KKday找行程,一起去冒險吧!
KKday 網頁: www.kkday.com
KKday Facebook: KKday

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→