【西藏|住宿篇】西藏自由行全攻略 文字


上回講到去西藏嘅交通,咁除咗「行」,「住」亦都係一個旅程入面極其重要嘅一環!為咗方便大家參考,小編揀咗唔同嘅住宿介紹比大家,每間酒店/賓館地址同價錢都列明喺下面,而小編會按每個地方嘅衛生、浴室同服務評分(五分為滿分)!想知道邊間性價比最高、邊間係大伏就要睇落去啦!
講返喺西藏揀住宿呢件事,事緣香港人喺拉薩係一定要住有「外國人住宿許可證」嘅旅館!有啲家庭旅館並無呢張許可證,所以訂之前一定要查清楚,唔係去到先發現根本唔可以入住就喊都無謂喇~

原文:https://hk.blog.kkday.com/714/tibet-hostel

滿齋酒店
圖片來源|KKday地址:西藏自治區拉薩市八廓街31號
價錢:¥300/三人房
衛生:☺☺☺☺
浴室:☺☺☺
服務:☺☺☺☺☺
圖片來源|KKday呢間係小編去到西藏住嘅第一間酒店,可以話有個唔錯嘅開始~雖然第一日去到有個小意外,就係冇晒三人房,不過職員好好,唔洗加錢就幫我地換做套房,唔洗再搵酒店仲免費upgrade咗!
套房有一張雙人床同一個小客廳,客廳有兩張梳化,可以鋪床單當床瞓,都算舒服。洗手間有兩個,一個連浴室,仲要有浴缸,咁就唔會沖到地下濕晒!套房嘅浴室我會比滿分㗎,不過三人房浴室就得浴簾隔開淋浴間,所以就扣啲分!
小編一共喺拉薩留咗六日,之後五日都係住返三人房,總括嚟講都係乾淨舒服嘅。小缺點係燈光唔係好夠,而且廁所經常會有淤塞嘅危機,但以呢個價錢嚟講係超值!
杜鵑花酒店
圖片來源|KKday地址:西藏自治區林芝縣廣東路408號
價錢:¥240/三人房
衛生:☺☺☺☺
浴室:☺☺
服務:☺☺☺☺
完全超值嘅一晚!空間夠大而且乾淨舒服,唯一小挑剔係廁所完全冇隔開淋浴位,連浴簾都冇,完全係濕~晒,不過唔驚,因為佢水壓低到你根本唔會整濕地板以外嘅地方!但公平啲講,呢個唔只係特定酒店嘅問題,小編住咁多間都係咁樣,唔知係咪因為地勢比較高嘅關係呢?
藏八酒店
圖片來源|KKday地址:西藏自治區日喀則市仁布路小車站對面
價錢:¥360/三人房
衛生:☺☺
浴室:☺☺☺☺
服務:☺☺☺☺
對比起前面兩間,呢間嘅性價比就低啲啦!除咗因為價錢比較高,衛生狀況都唔係咁理想,走廊同房都有異味,偶爾仲會有啲煙味。另外,酒店嘅隔音極差,夜晚砰門聲聽得好清楚,不過都有可能係小編瞓得唔係咁好,因為同行嘅兩位都話聽唔到喎⋯(再發展落去會變鬼故)
圖片來源|KKday幸運嘅係廁所十分乾淨光猛,而且有玻璃門分隔,所以沖完涼地板都係超乾爽!讚!喺呢一站,廁所特別重要,因為第二日就會去珠峰大本營,係冇得沖涼嘅!
註:基本上去珠峰前都會喺日喀則住一晚,除非你日以繼夜夜以繼日咁開車啦~所以呢區嘅酒店旅館都會比較搶手,要預早啲搵,亦都解釋到點解酒店價錢會高啲。
珠峰大本營(五號帳篷)
圖片來源|KKday價錢:¥80/每人
衛生:☺☺☺☺
服務:☺☺☺☺
圖片來源|KKday冇期望就冇失望呢句說話真係一啲都冇錯!原本覺得住帳篷衛生情況一定會好差,仲帶咗好多暖包怕凍死,點知又比預期中好好多!帳篷內部好乾淨企理,而且好暖(當然夜晚氣溫都會低啲),有枕頭被鋪提供,不過感覺唔多良好,所以都係用番睡袋。
帳篷有食物飲品提供,不過司機話價錢偏貴,而且味道麻麻,所以我地就自己準備杯麵飲品。另外,值得一提嘅係佢個廁所(公用嘅,離帳篷有啲距離,夜晚要小心),雖然都係「普通」旱廁,但唔係網上講到咁「世界級」嘅,至少你都仲可以睇得出佢係個廁所~唔係講笑,真係有啲廁所你入到去連窿都搵唔到㗎!
註:由於帳篷同外面溫差太大,所以入到帳篷唔好著咁多衫啊!唔係好易冷親!另外,呢到係完全收唔到電話,要報平安嘅上到帳篷前就要報定啦~
金蘭卓瑪賓館
圖片來源|KKday地址:西藏自治區日喀則上海中路日喀則海事局左側
價錢:¥450/三人房
衛生:☺
浴室:☺
服務:☺
講到呢到,終於嚟到呢篇文嘅重點!呢間賓館可以話係小編決定寫呢篇文嘅原因!絕對唔係因為佢好正,只係小編唔忍心見到你地貼錢買難受!
呢間賓館無論係衛生狀況定服務態度都絕對唔值呢個價,勉強比一分係怕你地以為小編唔記得比分佢咋!首先由大堂入房,已經要經過充滿水跡同烏蠅嘅露天地方,再入到房就發現牆上有黃跡,完全冇清潔過,廁所同地板都有垃圾,而且烏蠅趕極都仲有!
最令小編唔滿意嘅係佢地嘅服務態度!訂三人房但得兩張床,一開始話會打開相連嘅房仔,裡面會有多張床,後來又話唔得,要我地其中一個打地鋪⋯前言不對後語令人無奈!同佢爭論,佢竟然話唔滿意可以唔住!
事實上,當時撞正日喀則某寺廟嘅慶典,酒店供不應求,所以賓館先會獅子開大口。我地完全係走投無路,唔想瞓街先忍佢!所以,奉勸大家去日喀則要遠離呢間賓館!
神湖納木錯客棧
圖片來源|KKday價錢:¥240/三人房
衛生:☺☺☺☺
服務:☺☺☺☺
圖片來源|KKday另一個冇期望就冇失望嘅例子~納木錯附近全部都係流動旅館,所以係冇得沖涼,廁所亦係要旅館出面先有一個公用嘅,所以味道都相當世界級⋯不過旅館內部係幾乾淨舒服,而且暖暖的!小編住嘅客棧據聞係最大嘅,有一個好大嘅common area,可以食野,wifi亦十分強勁,不過就好多人食煙!
至於三人房入面都幾企理,唯一係隔音有啲差,連隔離房鼻鼾聲都聽得好清楚⋯同珠峰大本營一樣,杯麵飲品我地都一早準備好,如果你想食熱辣辣嘅早餐,記住要前一日同職員講定啦!
當然以上分享純粹係小編嘅個人意見,大家都可以上網睇多啲評論參考下。小編認為,自由行的話最重要係搵到個好司機,咁就唔洗怕冇地方落腳同比人呃啦!溫馨提示,跟KKday去西藏就唔洗擔心酒店質素啦~
▶︎更多西藏自由行攻略:
【西藏丨交通篇】西藏自由行全攻略!
▲認識KKday▲
想挑選心水行程又怕浪費時間比較?KKday 作為亞洲最大旅遊體驗平台,網絡橫跨全球 54 個國家、174 個城市,為您搜羅超過 6,000 種特色行程體驗。只需安坐家中,就能訂購世界各地具品質保證、價格實惠的旅遊產品,助你輕鬆自主行程,創造獨一無二的旅遊體驗。
▲前往 KKday 網站,訂購心水行程!
▲訂閱 KKday電子報,獲取更多旅遊優惠!
關注KKday社交平台動向:
Facebook ▲Instagram ▲YouTube ▲旅友討論區

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→