【馬來西亞】十大必買手信清單 文字


去旅行總會買手信返香港同親朋戚友分享下去旅行嘅喜悅,但係「唔知買咩好」就成為咗好多人嘅共同煩惱。今次KKday就為大家精心挑選咗十大必買嘅馬來西亞手信比大家,睇完跟住呢個Must buy check list就包保大家唔洗再為手信而煩惱啦!
一、紡織品
金綢緞(Songket)同蠟染(Batik)都係經常運用喺馬來西亞傳統服飾同居家佈置嘅布料。金綢緞係由絲同金、銀線所編織而成;而蠟染就擁有鮮艷嘅顏色同大膽嘅圖騰設計。嚟到馬來西亞嘅話,不妨買幾塊紡織品,無論係用嚟做頸巾、披肩,或者整成枱布、枕頭套,都係唔錯又特別嘅選擇!
▶︎邊度買?:中央市場、市集
二、檳城豆蔻油 Penang Nutmeg Oil
檳城嘅鐘金泉荳蔻油功能非常多,內服外用都得。外敷嘅話主治風濕骨痛、鐵打刀傷、抽筋扭傷、消瘀散腫、湯火損傷同肚痛風咳;內服就主治肚痛、風咳、哮喘等等,而且功效顯著,所以深受歡迎。大馬人周不時都用佢,無介紹錯㗎~
三、Beryl’s 朱古力
Beryl’s 朱古力公司喺1995年成立,以生產馬來西亞特色朱古力聞名。而Beryl’s 亦都研發咗獨特嘅榴槤朱古力,咁有特色嘅朱古力自然成為咗手信必買之選!除咗榴槤,大家都可以揀士多啤梨、芒果同Tiramisu口味,亦都有酥脆、杏仁果乾等等嘅選項,滿足鐘意唔同口味朱古力嘅你。
Beryl’s朱古力工廠
▶︎地址:No.2,Jalan Raya 7/1, Kawasan Perindustrian Seri Kembangan Seri Kembangan, Selangor Darul Ehsan, Malaysia.
▶︎電話:603-8943-6136
▶︎營業時間:星期一至五:08:30-17:30、星期六:08:30-15:30
四、三合一即溶白咖啡
馬來西亞嘅咖啡文化相當盛行,散佈喺大街小巷嘅Kopitiam(咖啡店)並唔係咩文青嘅專屬去處,而係一般人日常去嘅場所:一個可以傾計、睇報紙、食點心嘅聚腳點。
而白咖啡之所以咁受歡迎,除咗係因為馬來西亞嘅烘焙技術造就咗佢獨特嘅香氣之外,佢濃郁而豐富嘅口感擺脫咗咖啡苦澀嘅形象亦係原因之一。鐘意飲咖啡嘅你不妨買嚟試下,話唔定會飲完一杯又一杯~!
▶︎價位:一包有十五小包,約馬幣12-15
▶︎常見品牌:OLDTOWN, Ah Huat, Aik Cheong
▶︎邊度買:超市、Kopitam(咖啡店)、Oldtown white coffee
五、咖喱醬
馬來西亞同好多東南亞嘅國家一樣,好識得運用香料嚟煮野食。如果你鐘意馬來西亞風味嘅菜式,最直接嘅方法就係將呢啲醬料買晒返屋企自己煮啦!呢啲醬料細細包又平又易帶,仲可以等你身邊嘅朋友有機會透過味蕾去旅行!
▶︎價位:馬幣4-7元/包
▶︎常見品牌:Brahim, Baba
六、檳城白咖哩公仔麵
唔好睇小呢包檳城白咖哩公仔麵,因為佢曾經榮獲2014年全球10大好味公仔麵嘅第一名㗎!呢款公仔麵咁特別嘅原因係因為佢嘅辣椒醬濃郁得嚟唔膩,簡直係令人食到會上癮~白咖哩公仔麵啱啱開賣嘅時候曾經掀起咗一股囤積公仔麵嘅熱潮,有啲人甚至直接衝去工廠大批大批咁買!不過唔使擔心,依家大部分嘅超市都會買到㗎啦~
▶︎價位:馬幣6.90/四包
▶︎品牌:MyKuali
▶︎邊度買:一般超市都有得賣!
七、BOH寶樂茶
馬來西亞嘅飲茶文化受到英國殖民影響,所以除咗媽媽當嘅印度拉茶(Teh tarik)之外,英國茶喺當地都非常盛行。BOH寶樂茶係馬來西亞茶葉嘅大牌子,出產咗好多唔同系列口味嘅茶包,好似有百香果、芒果等等唔同嘅特色口味。買嘅時候可以揀帶有花色嘅鐵盒裝,精緻嘅包裝非常適合送比親友做手信!
▶︎價位:約馬幣5元/25包
八、半生熟蛋煮蛋器
大馬人最鐘意嘅早餐就係—半生熟蛋加麵包!好多人一開始可能會對生蛋有抗拒,但最後都會俾佢白嫩嘅蛋白、一劃開就流出嘅蛋液同簡單嘅調味所征服。如果嚟到馬來西亞一定要試下呢種絕配嘅味道!
如果你真係真係好鐘意,只要買個煮蛋器就可以輕輕鬆鬆咁將呢份滋味帶返屋企!煮蛋器嘅使用方式非常簡單,只要將雞蛋放入機器度,再將加入熱滾水,等水喺入面由滿杯慢慢向下流,咁就完成㗎喇!最後將完成嘅雞蛋打入碗,好似馬來西亞嘅習慣咁喺上面灑啲胡椒、淋啲豉油,冇油煙又有營養嘅早餐就輕易完成啦!
溫馨提示:雞蛋係唔可以帶返香港㗎~煮蛋器就得!
▶︎價位:馬幣10元以內
▶︎邊度買:超市
九、LOT水果軟糖
鐘意食軟糖嘅朋友一定會食過LOT!佢有芒果、提子、橙、蘋果、士多啤梨五種口味任你揀,而當中以芒果味最受歡迎~ 聽聞喺馬來西亞買嘅係特別好食!軟糖有分大包細包,大包可以放喺屋企慢慢食,而細包就可以拎去分比朋友,送禮自用兩相宜就係呢啲喇!
▶︎價位:3.5馬幣/包
十、肉骨茶包
好多人以為肉骨茶(Bak Kut Teh)係新加坡美食,但其實佢係初創於馬來西亞㗎!「肉骨」係因烹煮過程中以帶肉嘅骨熬湯,而「茶」就係源於裡面嘅中藥的成份。所以佢雖然被稱為「肉骨茶」,但呢道美食其實係完全冇茶葉嘅成份!而平時大家最推薦嘅品牌係游建好同A1,無論係用嚟打邊爐定係滷肉滷菜,都非常好食!
▶︎價位:依唔同品牌而定
▶︎品牌:A1、游建好、新峰
馬來西亞手信就介紹到呢度,希望呢篇文可以幫大家慳番啲資料搜集嘅煩惱啦!
你可能有興趣:
▶︎【最新雨林秘境】沙巴Kawa Kawa 長鼻猴、螢火蟲生態之旅
▶︎【比市價便宜10%!】沙巴美人魚島:浮潛放鬆一日遊
▲認識KKday▲
想挑選心水行程又怕浪費時間比較?KKday 作為亞洲最大旅遊體驗平台,網絡橫跨全球 54 個國家、174 個城市,為您搜羅超過 6,000 種特色行程體驗。只需安坐家中,就能訂購世界各地具品質保證、價格實惠的旅遊產品,助你輕鬆自主行程,創造獨一無二的旅遊體驗。
▲前往 KKday 網站,訂購心水行程!
▲訂閱 KKday電子報,獲取更多旅遊優惠!
關注KKday社交平台動向:
Facebook ▲Instagram ▲YouTube ▲旅友討論區

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→