【2017更新】日本環球影城 USJ 萬聖節活動全攻略! 文字


只有環球影城至可以超越環球影城!每年都令人引頸以待嘅日本大阪USJ萬聖節限定活動已經出咗2017年嘅最新消息啦!除咗有今年最新嘅日間『慶祝遊行』精彩登場之外,仲有規模更勝舊年嘅夜間『街頭殭屍』,等你可以由朝玩到晚!
日間活動
活動期間:2017年9月8日(五)~ 2017年11月5日(日)
#慶祝遊行(festa・de・parade)圖片來源最鐘意睇樂園遊行嘅人就絕對唔可以錯過呢次期間限定嘅『慶祝遊行』!今年嘅萬聖節遊行將會以變裝作為主題,大家可以盡情咁打扮,加入遊行嘅行列!呢個時候就唔洗再怕醜啦,嚟得不如趁呢個機會好好咁瘋狂下!而遊行會喺每日嘅14:30開始,想加入嘅朋友記得要留意行程同路線安排呀!
圖片來源|日本環球影城遊行期間仲會有大量泡泡,如果想享受吓俾泡泡洗禮嘅感覺,記得要早啲到霸個靚位啊!但若然你唔想濕身或者掂到泡泡的話,就記得乖乖地唔好去咁前啦!
遊行除咗有打扮到好靚嘅dancers之外,仲有好多超人氣嘅角色會係花車上同大家互動,有芝麻街家族、Snoopy,同埋今年新加入嘅Minions等等,仲有好多精彩嘅表演等緊你,一定唔可以錯過!
#Happy Trick or Treat圖片來源平日就最鐘意攪攪震、惹麻煩嘅Minion又點會錯過呢次光明正大曳曳嘅機會呢~喺今年新開幕嘅『Minion Park』將會有Minion一齊加入戰局,堆出各位大小朋友夢想中嘅糖果山,一定要趁機去朝聖下、一齊Trick or Treat
大家要留意每日嘅10:00至13:00芝麻街家族、Hello Kitty、Minions等等都會帶齊哂糖果出嚟同大家Trick or Treat㗎!活動限制只有小學生或以下嘅小朋友先可以參加,小朋友可以拎住由樂園附送嘅南瓜袋仔放好自己豐富嘅成果拎返屋企!呢個活動規定每人每日都只可以玩一次,如果參加人數太多仲有可能會臨時取消活動添!所以如果想帶小朋友嚟同公仔們玩Trick or Treat,記得要遇早少少嚟排隊喇!
如果小朋友錯過咗呢個活動都唔洗擔心無得玩,每日嘅10:00至17:00只要喺園內見到揹住南瓜袋嘅工作人員,然後向佢地大嗌一句「Trick or Treat」,都可以輕鬆拎到糖果㗎!
萬聖節活動小整理▼
夜間活動
活動期間:2017年9月9日(六)~2017年11月5日(日)
圖片來源唔好話小編唔提醒大家~夜間活動基本上都係偏向大朋友嘅Level,如果你有帶小朋友嘅話小編真係唔太建議留低玩,一來小朋友會嚇親,二來所有活動都有年齡限制,即使有大人陪都建議至少要係小學生!準備好?咁就跟住小編繼續碌落去睇啦!環球影城將今次嘅萬聖節活動細分咗十個驚嚇等級㗎⋯
#亡者森林(Dead or Alive)
圖片來源圖片來源|日本環球影城圖片來源|日本環球影城Level 4/步行式迷宮
各、位、觀、眾!!!小編今次第一個去嘅就係環球影城今年新推出嘅『死亡迷宮』啦!據官方嘅講法,舞台將設定為殭屍接二連三出現嘅人間煉獄,玩家要同大量殭屍喺場景入面對峙,希望帶俾大家生死瞬間嘅顫慄感!剩係想像下都覺得刺激到震呀!!!
迷宮場景喺浴火赤子情設施嗰邊,玩之前會先喺室內場景暸解背景故事,跟住就可以直接開始玩啦!由於迷宮位於室外,如果咁唔好彩撞正落雨嘅話,小編建議可以着雨衣玩,會比較方便㗎!
►小編心得分享:如果你心思思想玩但又驚太恐怖,建議可以日頭去玩,至少日光日白望條路都清楚啲,咁就唔洗咁驚啦!
#娃鬼回魂-Chucky瘋狂醫院-
圖片來源Level 5/步行式迷宮
鬼娃又嚟啦!諗起細個俾Chucky嚇到夜晚瞓唔到嘅回憶,見到佢個樣都即刻心都寒一寒⋯但我哋就係要愈戰愈勇!體驗喺某間奇怪嘅醫院入面蕩失路,同時俾Chucky同佢班手下襲擊嘅緊張刺激感~喺超現實世界觀入面感受比舊年又升咗LV嘅恐懼,究竟今年嘅Chucky要帶嚟幾得人驚嘅瘋狂之夜?咁就要你親身嚟體驗過先知!
圖片來源|日本環球影城呢間鬼屋嘅整體氣氛營造感好強,只要你行近間醫院少少,你就會聞到一大浸醫院嘅藥水味,係超越視覺嘅感官刺激!而且裡面嘅Chucky係史上最多,簡直係挑戰緊你膽量嘅極限啊!
►小編[b]心得分享:勇闖完以上兩間鬼屋嘅小編表示,雖然平時連鬼片同血腥片都唔睇,但都覺得驚嚇程度係可以接受!咁難得嚟到一年一度萬聖節,無理由唔玩嘅![/b]
以上就係小編今次勇闖過嘅2個萬聖節驚魂夜限定設施,為咗要幫大家留返啲神秘感,小編嘅介紹就點到即止,淨低嘅就留俾大家自己去探索啦!下面部分就整理咗其他鬼屋設施嘅簡介同背景,大家可以按自己喜好,慢慢揀啱心水嘅玩!
#猛鬼街-迷宮3-
圖片來源Level 5/步行式迷宮(需要抽整理券)
Freddy仲持續搵緊佢落手嘅目標!大家會被拖入去無盡嘅噩夢入面,必須出盡奶力、諗辦法逃出Freddy嘅追殺!大家盡情享受要周圍匿嘅恐懼啦~
#大法師-驅魔行館-
圖片來源Level 5/步行式迷宮(需要抽整理券)
只係見到呢張相小編已經唔得啦⋯喺令人毛骨悚然嘅鬼屋入面,被捲入附身喺年幼少女身上嘅邪惡惡魔同要進行除魔儀式嘅人之間!仲有令全世界震撼嘅經典恐怖場景,都會忠實咁重現喺大家嘅眼前!(比如話擰轉條頸好似蜘蛛咁爬落樓嗰幕⋯)
#創傷3-恐怖監禁實驗室-
圖片來源Level 10/步行式迷宮(需要另外購票體驗、年齡限制15歲以上)
恐怖體驗再進化!舊年以超越大家想像嘅恐怖體驗引發話題嘅『創傷』系列今年再次改版升級,要帶俾遊客有別於以往嘅感官刺激!更厲害嘅係,今年嘅升級版史上最驚悚體驗會將時間增加至35分鐘咁多!對於鐘意恐怖體驗嘅人嚟講應該會超幸福!
小編提醒大家,呢款35分鐘嘅創傷3喺入去前係需要簽切結書㗎!建議大家玩之前認真咁評估一下自己嘅忍受程度喔!
圖片來源|日本環球影城圖片來源|日本環球影城#街頭殭屍
圖片來源Level 1~2/18:00~
街頭殭屍係小編個人超級期待嘅活動,而且到咗現場完全冇失望到!剩係每日都會出現嘅基本款殭屍就有成20款,仲會推出落雨日子嘅限定出沒版,所以無論颳風又好、落雨又好,咩天氣都有各種各樣嘅殭屍等你嚟野生捕獲!
啲殭屍係大街見到人就嚇,音樂一響起更會聚集埋一齊跳舞,最得意嘅係當附近負責保護人類嘅SWAT大嗌「殭屍依家安全」嘅話,大家就可以一齊同埋啲殭屍跳舞,諗都覺得興奮!
到夜晚嗰陣,環球影城嘅街道上就會越來越多嘅特別場景,裝飾到好似殭屍巢穴咁非常特別!小編建議可以喺附近商店買定啲萬聖節頭飾,一定可以吸引到殭屍們嘅注意!
園區特別設置咗「殭屍區」嘅標誌,如果夜晚喺園內又唔想受到殭屍襲擊的話,就記得要留意標誌,唔好亂闖禁區啦!
圖片來源|日本環球影城環球影城亦照顧埋唔想同殭屍有接觸嘅各位,細心咁準備咗一張地圖,只要跟住地圖路線行,就唔怕會遇上殭屍啦!另外,如果你又想睇到殭屍,但又唔想同佢地有親密接觸嘅話,可以走上禁區嘅行人路,因為殭屍係唔會走上行人路㗎!
另外每年嘅USJ萬聖節活動都會吸引一大批人去朝聖,雖然啲遊樂設施都超級恐怖嚇人,但都仲係有源源不絕嘅人潮會搶住入去嚇自己(咦?),所以環球影城都推出咗Express Pass:萬聖驚魂夜版,等大家可以輕鬆咁玩勻呢啲期間限定嘅刺激設施~
以上就係2017年日本環球影城萬聖節限定設施嘅介紹,剩係睇圖同字都已經忍唔住想去每樣玩十次!!!小編已經準備好要扮鬼扮馬去癲返轉啦,你仲等咩?跟住以下呢個表去玩啦~
萬聖節限定美食
#小食推薦:萬聖節限定 卡通造型包
日本環球影城嘅造型包一向都非常出名,依家更加有萬聖節限定版,今次有Minion(咖哩味)同埋Hello Kitty(蕃茄肉醬)兩個款式,小編試食過真係幾好食㗎,值得一試!
小編極力推薦呢個萬聖節限定市集,除咗有各種小遊戲同美食檔之外,仲有好多必到影相位,真係要行哂都有排啊!
▶︎餐車地點:萬聖節市集
▶︎售價:Minions包 550日圓/Hello Kitty包 690日圓
#午餐推薦:影城巨星餐廳/萬聖節特別套餐
今次由影城巨星餐廳推出嘅萬聖節特別套餐,主餐有巨型漢堡扒、半熟蛋同埋炸牛蒡,再配上白飯或餐飽,更有Minions蛋糕做甜品,小編食過真係覺得幾好食!最出色一定係塊漢堡扒,一咬落去全部都係肉汁,食完包保無人再夠膽話環球影城無啖好食!
大家認住呢間影城巨星餐廳,晏晝肚餓可以嚟呢到食飯,食飽完差足電就可以繼續盡情周圍去玩啦!
▶︎餐廳地點:荷里活區 影城巨星餐廳
▶︎售價:2,190日圓
#晚餐推薦:三根掃帚/萬聖節拼盤、奶油啤酒布旬
呢道肋排水準絕對唔輸俾其他美式餐廳嘅水準,除咗個肋排之外,隻煙燻雞脾都好正㗎!不過最驚喜嘅一定係南瓜批,一開始望個批嘅樣以為又乾又唔好食,點知入面嘅咖喱肉餡又幾好食喎!一定可以滿足到大家嘅胃口!
有美食又點少得美景呢?三根掃帚嘅戶外用餐區係霍格華茲城堡水岸個邊,如果咁好彩遇上好天氣,可能會影到張一流嘅風景畫㗎!
▶︎餐廳地點:哈利波特魔法世界 三根掃帚
▶︎售價:1,950日圓
萬聖節限定商品
#Minions萬聖節限定爆谷桶
Bello!無論你屋企有幾多個Minions爆谷桶都好,但都絕對唔可以錯過呢個萬聖節限定版!如果淨係可以買一樣嘢,小編一定揀呢個爆谷桶!每架餐車賣嘅爆谷口味都會有少少唔同㗎,靜雞雞話你知,今次萬聖節仲有限定香蕉口味,諗起都流口水啊!
▶︎售價:2,980日圓
#各種萬聖節限定商品
喺荷里活區有一間鋪頭全部都係賣萬聖節限定商品,由公仔、裝飾到食物都係限定特別版,行過路過真係唔好錯過啊!
限定商店嘅貨品又多又靚,就算行多幾次都唔覺得厭啊!小編建議大家可以嚟兩次,一次嚟買裝飾打扮吓,一次嚟買手信,咁就絕對無走寶啦!
#Minions樂園攻略
BANANA!!!歡迎嚟到Minions樂園!小編嗰日去到Minions樂園,驟眼睇以為人流少咗,正當喺到暗爽緊之際,先發現原來啲人係去哂門口右手邊啊!因為嗰到隻Minions係識得講嘢,會不斷歡迎遊客,經過記得同佢影張相啦!
樂園嘅佈景都超級可愛!禮物店仲有一個大型扭蛋機,絕對係必到影相位!
園內嘅Minions瘋狂乘車遊更裝修成Minios同格魯嘅屋企,而且裡面仲有好多好精巧嘅設計,例如牆上嘅塗鴉等等,非常可愛!
Minions們仲會間唔中出巡同各位Fans影相,記得要捕實佢地啊!好似小編咁動作慢咗,就唯有睇人影啦…
樂園裡面有啲要另外俾錢嘅小遊戲玩,例如射罐或者投擲遊戲等等,不妨去試吓博吓運氣,話唔定好彩中咗嘅話,仲可以帶啲可愛到震嘅Minions公仔返屋企添!
除咗玩樂設施之外,樂園裡面嘅嘢食都超級可愛!就好似呢款Minions芋頭餡嘅曲奇三文治咁,係日本環球影城限定產品,非常吸引!
▶︎售價:600日圓
#「疾疾護法現身!」夜間劇場
活動期間:2017年4月21日(五)~ 2017年11月5日(日)
成日聽人講夜晚係去哈利波特魔法世界嘅最佳時間,嚟過三次嘅小編今次第一次夜晚入去,原來真係會有一種置身於魔法世界嘅感覺!夜晚嘅霍格華茲城堡同活米村真係好靚~嚟到當然唔可以錯過新推出嘅催狂魔Show,無睇一定會後悔!
表演結合燈光投射同埋小型舞台劇元素,再加上表演期間會有真正嘅催狂魔出現,專業水準嘅演出絕對唔會令你失望!護法現身之後,城堡會回復平靜,身為資深哈利波特迷嘅小編表示,都俾呢個景象感動到,大家一定要親身去感受吓!想知詳細嘅表演時間的話,可以上日本環球影城官網睇!
睇完小編咁詳盡嘅介紹,係咪都心思思想飛去大阪呢?心動不如行動!大家絕對唔可以錯過今次日本環球影城一系列嘅萬聖節活動,去到11月5日就完㗎啦,仲等?快啲執行李起行啦!
想玩日本環球影城但買飛又煩又複雜?唔洗擔心,KKday幫你準備好晒啦~
▶︎【官方授權】日本環球影城® 電子門票
▶︎【官方授權】日本環球影城®門票+快速® 通關
▶︎【官方授權】日本環球影城®VIP入園手環+阿倍野HARUKAS展望台門票
▶︎【萬聖節期間限定】日本環球影城®萬聖驚魂夜快速通關券 (不含門票)
▲認識KKday▲
想挑選心水行程又怕浪費時間比較?KKday 作為亞洲最大旅遊體驗平台,網絡橫跨全球 54 個國家、174 個城市,為您搜羅超過 6,000 種特色行程體驗。只需安坐家中,就能訂購世界各地具品質保證、價格實惠的旅遊產品,助你輕鬆自主行程,創造獨一無二的旅遊體驗。
▲前往 KKday 網站,訂購心水行程!
▲訂閱 KKday電子報,獲取更多旅遊優惠!
關注KKday社交平台動向:
Facebook ▲Instagram ▲YouTube ▲旅友討論區

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→