[九州景點] 日本女性票選NO1最想去的溫泉區 由布院兩天遊 溫泉旅館推介+古典JR列車由布院之森

少女旅行日記 於 22/10/2016 發表 收藏文章
從福岡市中心博多站出發,坐大約兩個半鐘的JR就會去到大分縣的由布院(又名湯布院)溫泉區。日本浸溫泉的地方有好多,而由布院係日本女性票選NO1最想去的溫泉區。趁天氣開始轉涼,今次就預留左兩日一夜,搭JR列車「由布院之森」出發,再入住當地溫泉旅館,感受下呢個溫泉小鎮有幾正。


出左車站已經感受到一種濃厚的郊外小鎮味道,中間一條大街,兩邊都係矮小的建築物,有各式各樣的商店同餐廳,店舖都好精緻,成條街整個氣氛都好悠閒,黎到由布院心情會好放鬆。


行大街大約10分鐘就穿過一條小橋,黎到「湯之坪」。呢條街係由布院的重點,有好多特色小店,好好逛!起點係一間當地極具人氣的卷蛋店B Speak,朝早門口會有長長人龍,但其實到中午就冇人龍架喇,雖然卷蛋售完即止,但應該中午都會買到,唔駛排朝早個條隊。卷蛋分原味同朱古力味,有一件或一條裝,但一件裝基本上一開門已經賣曬,我非常懷疑只有極少一件裝賣,所以我就買左一條原味試下。價錢都幾貴,要1420yen,即係成一百蚊港紙!嗯,係真係好好食,超級鬆軟,忌廉好滑,蛋味濃,又唔太甜。平時普通卷蛋食一、兩件薄薄地已經覺得好濟,呢條我一下子食左一半都完全唔覺得濟,好勁!!!推介~


再行前幾分鐘有另一間一定一定要食的布丁!呢間叫Milch,主要賣布丁同芝士蛋糕,好味到呢......佢個布丁超超超滑,勁香奶味,唔甜唔膩,底下仲有焦糖醬,真係好好食!!!300yen都係偏貴因為份量唔多但絕對值得俾。另外芝士蛋糕細細個,中間係熱辣辣流心芝士餡,好正,都一定要試,只需120yen,抵。


湯之坪有好多精品店、熊本熊、龍貓、貓之敷(專賣同貓卡通有關的)、犬家敷(好明顯呢間賣狗卡通)......又有專賣芝士、酒、雨傘的店,仲有間Snoopy茶屋,總之呢度好多得意野睇啦。


行到接近盡頭有一個叫Yufuin Floral Village的地方,係一個走歐陸花園feel的地帶,有10幾間小店,都係賣卡通精品比較多,但呢度店舖裝飾都幾靚,可以影好多相。最特別係呢度養左幾種小動物,有松鼠、山羊、兔仔、鴨子,不過每樣一隻,覺得佢地好似好悶......(鴨子有兩隻)仲有一間貓cafe同貓頭鷹小型動物園,兩間都要俾錢先入得,可以同呢兩種動物近距離接觸。但我完全唔理解點解有人會覺得貓頭鷹得意,我覺得佢地好!恐!怖!特別係對眼,千祈唔好望住我,我會喊......


離開主街,由布院係一個被群山包圍的寧靜小鎮,周圍都係矮小房屋同草地,聚集唔少溫泉旅館。今次入住離車站大約20分鐘步行距離的旅館萌莊。和室房好大,訓4個人都得,景觀係好舒服的山景。提供浴衣,可以著住在旅館範圍遊走。


我間房冇獨立溫泉池,旅館有男女分開的公眾溫泉,亦特別設有一個獨立家庭風呂,即係你可以獨霸一個獨立池。呢個池係唔需要預約,去到見到冇人就可以用,但如果有人已經入左去,你就唔知要等到幾時......我都等左半個鐘左右先用到。天氣涼涼地浸溫泉好舒服!旅館應該有房型係提供私人獨立溫泉池,不過都會貴好多啦。


旅館包一泊二食,早、晚餐都超豐富,好多好多碟精緻料理,質素相當唔錯,只係好多野食左你都未必講得出佢係咩黎......哈哈,但係好味既。萌莊成個環境都係好寧靜寫意,仲提供免費單車同埋指定時間車站接送服務,職員都好友善,整體感覺唔錯。一晚住宿連兩餐價錢約$2300,以日本溫泉旅館來說係合理價。


最後介紹一下由布院特別的JR列車「由布院之森」,每日3班來往福岡博多站同由布院,建議早幾日劃定位,因為都幾多人搭。如果搭唔到就要搭返普通的特急JR。「由布院之森」是綠色的,外表好森林,又有點古典味。我坐第4卡,據說係最靚的,有森林花紋的椅套,手柄同餐桌係木質,其他車廂唔係甘架,即刻有好高級的感覺,哈哈。「由布院之森」有好多得意野,例如有一卡可以俾你企係度睇風景、有得拎紀念卡吸印仔、有賣野食的counter、有餐車、有紀念品賣、有職員拎住個有乘坐日期的牌俾你影相、小朋友可以著車長制服......我仲試左個便當,1000yen,好多材料,但因為凍凍地我覺得唔算太好食。不過架車真係靚,沿途風景都好靚,有山有森林有溪間,去由布院至少要搭一程「由布院之森」呀。


總結係我都幾喜歡由布院個種悠閒氣氛,而且佢可以在郊區與鬧市中取得平衡,唔會因為係郊外就完全冇野買冇野行悶到發毛,但又唔會太商業化而破壞佢應有的寧靜,兩者兼得,非常好。由布院仲有個好出名的金麟湖,聽講景色好靚但我時間有限冇去到,希望下次有機會再黎啦。


旅館萌莊
地址:大分縣由布市湯布院町大字川南249-1

由布院之森時間表(至2017年2月28日):詳情

留言


請按此登錄後留言。未成為會員? 立即註冊
    快捷鍵:←
    快捷鍵:→