[土耳其電視有咩睇?] 要坐定定睇嘅Survivor 圖片

土耳其嘅電視節目有好多選擇,其中一個我最常睇嘅就係TV8嘅真人騷Survivor。簡單講解,Survivor係將參加者分成兩隊,各自喺荒島生活並定時進行唔同類型比賽,輸咗果隊要淘汰一位隊員。
原本都追開美國版Survivor,所以當初見到有土耳其版簡直係雙眼發光。不過同美國版最大分別嘅係,土耳其版嘅參賽者只負責選擇淘汰人選,最終淘汰者係由觀眾決定;另外土耳其版一星期會播五日,每集三個鐘(注意:廣告時段唔密,所以要專心睇嘅話係行唔開嘅),播之前仲會播一個鐘上集精彩回顧。
個節目咁chur,如果喺香港播我估收視都未必好好,不過喺土耳其呢邊就長期收視第一,仲不時喺地鐵見到佢賣廣告,twitter同instagram亦有好多人討論每集內容。而對我呢個土耳其文初學者,呢個節目就係一個好好嘅娛樂同學習渠道,因為佢比賽時我唔需要明佢講乜都好刺激、參加者傾偈時有字幕我又可以估佢講乜、最重要係第二日重播精華片段時我可以抄低啲有用嘅字。
除咗Survivor之外,仲有一個幫人查案、尋兇嘅節目係令我覺得最新奇嘅,下一篇再講!
標籤: 土耳其  港女  電視  生活  survivor  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→