泰國酒店撞鬼，女朋友好感激我無講佢知.. 精選

泰國一向都係旅遊「熱門」勝地，而前排我就同女朋友去咗布吉玩..醉心於陽光與海灘嘅我地已經一切準備好，I m ready !!
點知落機嗰一刻已經烏雲密佈，心諗可唔可再嚟過...

#放心啦，#聽日一定會好天嘅

由於我地落機已經係夜晚時間，所以返酒店check in完、食個晚飯，之後女朋友就提議去附近超市買啲嘢，反正落雨嘅布吉夜晚都無乜嘢玩，就係咁行吓買吓..時間就咁樣流逝
.
.
而最慘係雨勢一路都無停過，坐「篤篤」返酒店嗰時仲要行雷添，真係搞到我地縮一燒！而呢個天氣，似乎亦只係旅程不安嘅先兆之一....先簡介一吓女朋友嘅構造..呃唔係...係性格先岩

可能佢因為前世係天使掛，今世對於黑暗同鬼神仲係極之害怕，對比起老鼠曱甴…呃算啦，佢應該全部都驚先岩，總之接觸呢幾味嘢都會嗌到癲咗，而隔離嘅人亦因為佢大叫而嚇到癲埋，即係小弟～
如是者返到酒店房門口，雖然無乜科學根據，但我地都會照樣敲敲門先入屋，然後將屋入面所有燈同電器瞬間開晒佢～
.

「呀～～好攰呀」
女朋友一嘢就飛咗落床，心諗行得嗰一陣…而同時因為張床隔壁就係一個透明玻璃，出面有一個小露台仔，呢刻望到個天仲係落緊好大雨，仲要不時有一陣行雷閃電..#出事架嘛！
.
「今晚早啲訓啦～希望聽日好天啦」
「好啦，咁我沖涼先啦」

正當女朋友起身嘅時候，原本開住嘅廁所燈突然間熄咗，之後隔兩秒又自己開番…熄咗..開番…如是者重複咗幾次最後就熄咗無再開…
但成件事..就好似人地玩燈制一樣..

.
.
.
女朋友慢慢移個頭望住我，雖然佢無開口，但唔知點解我心入面知道佢諗咩…而最衰唔衰就係個廁所屬於落地玻璃，但嗰時就有一個小窗簾拉落嚟，令部份廁所環境被遮蔽住，只能隱約睇到入面

「無嘢～可能行雷影響啲線路姐～」
其實呢刻已經好心寒，但唔理咁多我就行去廁所將門打開，同時將燈制打開！#心諗我唔會驚你！
(聽人講越驚佢越搞你）
.
「嗱…無事啦～～係喎，你有冇帶洗臉呀？」
見到燈正常開番，最後亦慢慢轉移話題…希望女朋友唔會驚，但其實有一樣嘢嗰陣無同佢講...
.
.
.
返到嚟香港，直至有一日同女朋友一齊睇番去泰國影嘅相，其中一張背景就係呢間酒店

「其實你知唔知嗰晚…」
「我知呀..」

吓！？竟然！？唔通佢都見到？
「你知啲咩…」
「我知你專登唔同我講係唔想我驚，仲要扮無事去開番支燈…如果嗰陣你同我講呢啲嘢，我應該幾晚都訓唔到…所以..真係多謝你」

突然之間..我覺得女朋友成熟咗，竟然會講呢啲！
原本我係諗住將嗰晚見到嘅事同佢講，畢竟都已經離開咗，但既然女朋友原來見唔到，亦無謂將恐懼分享比人...所以最後我亦無講到其實廁所嘅小窗簾下面，我見到露出咗一個小朋友嘅身型輪廓....#希望眼花 #好彩過兩日轉第間酒店
.

P.S 「咁我係咪應該咩都唔好講？」
「總之…你知我驚嘅就唔準講…」
「但你隻腳隔離有曱甴….」之後，一把尖叫聲響遍成條彌敦道… #係咪呢係咪呢..

更多故事和旅行趣事: 熱豆腐仔
https://www.facebook.com/hothottofu/

IG: hottofuzai
https://www.instagram.com/hottofuzai/