爆粗空少--拎一折機票的背後....

前幾日放完復活節假,同屋企人係Lift口撞到果鄰居。

鄰居:「啊,成家人去完旅行啊? 阿仔帶你地去邊啊?」

我:「無啊。我地返大陸拜山。」

鄰居:「都好啊,你就乖啦。係未帶阿爸阿媽搭飛機啊?」

我:「係啊,係啊。」

鄰居:「你地果仔就好啦。搭飛機又平喎,可以成日放假去飛啦。」

我:「唔唔唔…. (笑) 」

係啊,係啊。平機票啊嘛。
但你有無諗過,每次去一程旅行,特別係要帶屋企人,我都經歷一個放榜咁。加埋回程,就經歷兩個放榜啊。唔誇張,我講俾大家聽。

首先,你要確保所謂o既公眾假期你有假啦。因為我地份工係無紅日,放邊日呢就睇運氣o既。係啊,我都只可以話運氣啦,不竟我唔係營運o既人。

咁有人會話,你未平日有假去囉,仲好啦。唔洗迫啊。
哈哈,平日我自己一個人去啊?哈哈,我d朋友家人得紅日有假喎。

好啦。算,當我用盡方法去換機啊,調假啊,整完一輪終搞掂果期可以同朋友或家人外遊啦。
我又要開始擔心另一樣野,loading爆唔爆,多唔多人一齊standby你班機。

飛之前一個禮拜check,飛之前幾日check,飛之前果晚check,飛果日起身check。飛果日上到機場巴士check,去到機場counter又check。
頂!每次睇果個飛機loading人數就好似睇自己果考試分數合唔合格咁。

我:「唔好再跌啦(機上所剩番o既空位)。唔好再跌啦。再跌就唔合格架啦!(無位上到機) 」

嗱,通常我講到呢到。就會有把聲音:

「但係,你地張機票一折啊嘛。都係要等一陣,到時有位就上啊嘛。」

係啊。一折啊。一折啊!多謝,仲可以俾我體會考試放榜心情tim!
聽我講埋落去啦。

到真係去到機場counter,要standby要等叫名。
我又會開始好緊張啦。
Loading 好爆仲有少少位,我就會好驚若果臨時係隔離收多幾個客,整爆架機呢? 賺錢嘛。
就算Loading 好light好多位,我都會好驚咁少客營運會唔會將兩班機d客combine,取消一班呢? Cut cost 嘛。

好啦。到真係最後一刻放張機票俾我。我都仲未安樂。因為一日未上機,都仲有變數。
但果下我要關心係另一樣野,就係淨番半個鐘多少少架機就飛啦,要快d去過海關去到Gate啦。
因為若果當日o既loading 好爆,一般都係架啦。
咁佢地都要等到飛機起飛前四十幾分鐘,先可以係counter放我地張飛。
咁呢d係規矩黎,我明o既。

只係當你係帶埋屋企人,成家人仲未過海關入境,跟住仲要趕去閂口,有少少崩潰囉。

講到呢到,通常又會有一把聲音。
「咁你地未唔好旺季去囉。揾少人o既日子去,會唔會好d啊? 」

唔,係囉。又黎啊?!
應該唔好公眾假期去,屋企人都要叫佢地請閒日平日,最好無人想放o既日子,佢地就放啦。咁就一定上到機啦!
若果係d重要日子,一定要飛到去外地呢。
就買正價飛啦,咁無法啦,你一定要去啊嘛。

係啊。既然最後都要買正價飛,嗱,我真係有買過。
咁其實所謂o既一折機票,唔係福利,係方便。
所以,啊親戚們鄰居們朋友們唔好再吹大佢啦,呢樣只係一個「方便」。
仲要唔係一個隨時用到o既「方便」啊。
而且,每當我諗起要趕到七彩咁去到Gate,搞一大輪野。
我都懷疑呢果字用得啱唔啱。哈。

啊,我仲未講完。
到上到機啦,我就開始擔心會唔會有地勤上黎揾我呢?
因為一日未閂門,佢都可以叫番你落黎。
可能係最後計過乘客行季重量太多,可能係另一班機調左果客,可能各種原因。

「唔好意思,你要落番去。」

咁之後會點呢? 無架,就係拎番checkin左o既行李,行番出出面。重新再等過囉。
恭喜恭喜,又再考多次試,等多次放榜。

不過一般我都好幸運地上到去就閂門無事o既。Touch wood!
咁之後飛機上面果幾個鐘就係我最安心o既一刻。
因為當我到目的地,去到酒店,有wifi o既時候。
我第一件事除左睇whatsapp 之外,就係再check check回程o既loading ,睇下到時上唔上到機。又一果輪迴,無錯。仲有返香港果程啊,Baby !

其實有時我都會諗,係未自己問題呢?咩都驚咩都驚,爆粗空少變驚青空少。
但唔係啊,好多同事都分享過一句說話:

「我自己一個人飛無所謂啊。但如果帶屋企人,我最怕係佢地上唔到機啊。」

係啊。其實我最驚就係連屋企人都要陪我驚埋一份。
我唔想去果旅行,佢地都要陪我擔心上唔上到機。

所以每次好難得返到香港,完成成個飛行旅程。我都好感恩。
我已經唔敢去諗成果過程,有無因為要check 住loading 而影響心情。

每次我遇到有人講:「你有一折飛就好啦。」
我好無奈,因為我無理由將我以上o既心聲講哂俾佢聽。
講話:
「其實每次去到我都好擔心,好驚,好怕連屋企人都一齊玩得唔盡興啊。」

咁樣無人會聽,會想去聽。佢地會覺得咁你有一樣着數野喎,仲係到嘈?!
係啊。着數啊。福利啊。一樣令我又愛又恨,唔知用唔用好o既「福利」。

甚至我今次講完一大輪,我信依然都仲係會有人講:
「咁你地始終一折機票啊嘛。」 (內心os:拎左着數仲係到嘈)

所以為左心理平衡一點,你話我mean都好啦。我已經決定以後一律咁回覆:
「係啊。一折機票啊。唔唔..真係幾平又方便架。笑」 (內心os:係啊,你恨唔到架啦!)

標籤: 一折機票  

留言

會員
我要評論
請按此登錄後留言。未成為會員? 立即註冊
  • ricerice
    ricerice 於 10/04/2018 評論 NO. 1

    去都唔係問題,回程先得人驚

快捷鍵:←
快捷鍵:→