爆粗空少--問世間standby為何物 精選 推薦

爆粗空少==> 我的臉書
https://www.facebook.com/Rudemen

今日講講更表，其實除左平時公司安排好o既 短途機長途機外， 係我地更表入面好可能會被安排一或兩星期o既standby period。
咁即係叫你係屋企等足一個星期電話，期間可能或唔可能安排航班俾你。咁佢一打俾你呢，你就好似玩checkpoint咁啦，要係某段時間內返到公司。即係你之前等電話要準備好d行李 制服啦！隨時候命！

而且你又唔可以miss 個call架， 咁樣係曠工架! 打工仔，死罪黎架！
所以其實唔洗講咁多， 總之三個字講哂：黑人憎！ 或者好X黑人憎！

Standby，顧名思義就係候命。點解會叫你候命呢？ 咁肯定就係突然缺少人手，先會叫候命o既上場補位啦！
咁 “究竟點解公司無啦啦缺少空姐空少呢？”
不如就俾大家估下個答案啊！

A. 有空姐空少請病假
B. 突然發生交通意外，成班機o既空服員係上機前滯留係機場禁區
C. 飛機係外地故障，需要一班空服員搭班空機去取代壞機
D. 公司除消航班或加開航班E. 有空姐空少”請病假”

好啦！係未好緊張呢？究竟邊個係答案呢？點解無得揀”以上皆是” 架？
哈哈，無錯！其實個個都係答案，而且仲有好多個原因。不過公司叫到你返工喎，唔通仲問佢點解叫我返啊？咁咩XDD

不過！本人係幾偏向答案E架。而且我相信呢個答案出現o既機會率係大過其他好多囉！
因為”天氣不似預期….” 你個身體都會不預期咁唔知幾時病架嘛？！可能突然發現：啊，原來我今日有病啊！要請假啦！
係未？你明我講咩o既。嘻嘻！
嗱嗱嗱嗱嗱!! 利申啊，我返左呢份工請左一次病假炸！我好乖架！哈哈哈哈！
但其實我又明架， 有時班機可能朝早七點幾要到公司，但你前幾日已經連續做左好幾班早機晚返。你真係好攰，好辛苦啊嘛！好想抖下架！
又或者，知道今班機見到同d”出名” 同事一齊飛，你真係會淆一淆，好想乖乖留係家中。甚至，預知到呢班機一定滿客，又要即日來回喎！一日做兩班滿客機，真係會死架！

聽到咁，係未真係會病呢？
不過，到最後你都係standby會食番哂呢d野。一樣都係避無可避
=-=要食o既始終要食。 仲更加加強呢個checkpoint game o既刺激性！
"究竟我今日要食邊班爛機呢？好驚啊！"

而且每一日o既standby時段都會係五六個鐘左右，可能係朝早到下午、或者下午到傍晚、傍晚到夜晚、夜晚到凌晨，凌晨到朝早。真係鑊鑊精彩鑊甘啊!! 隨時個電話都會響，或者唔響。響與唔響之間有好大空間，精彩呢！
好在我依家發現，我可以係等電話o既時候，畫下畫，更新下facebook。真係幫我消磨唔少時間，唔洗心驚驚炸。


喜歡的話，可以黎我臉書讚好
https://www.facebook.com/Rudemen