<<爆粗空少---做空少唔賺錢架！吹啊！>> 精選 推薦

近排同一d好耐無見既朋友食飯聚餐。
聚餐結束後，我終於明白點解會有senior講:
阿仔。當你做得愈耐呢份工，你就會發現你同身邊o既朋友價值觀，想法好唔同。
因為係果一餐飯入面，大家除左寒喧一番，感嘆好久不見之外。
最常論述既話題就係：
大家邊個賺最多錢？……邊個最勁啊？賺最多？有錢結婚？……
邊個賺得少……有無諗過轉工…….. 唔夠銀………咁結果呢，我呢位空少就係佢地錢錢錢錢o既話題下放空左好耐。
除左好hea咁和應左句：係啊！空少賺好少架咋，無錢架！ 之外。
其餘時間，我就做緊一件自己都好反感既事——就係gathering當中玩手機。
但我真係無心聽落去。係啊！我真係好撚窮啊！
特別今個聖誕佳節，要買乜買乜，我格外覺得自己窮。但咁又點啊？
我做得開心就得啦！夠用就得啦！
坦白講。 呢份工絕對唔係一份賺錢o既工，你要搵大錢一定唔會做落去。
但點解仲會有咁多同事keep住做落去？我相信除左係因為大家習慣左呢個工作模式走唔到之外，仲有
o既原因係大家係呢一份工入面搵到比賺大錢更重要o既物品。
講到呢到。若果我同佢地講話，我做得開心，有比錢更重要o既事。
咁呢班舊朋友就會話：哦！我知，呢份工多女啊嘛！係未？！
之後，我就只會哈哈笑幾笑，繼續玩我o既手機。
因為大家channel同level都唔同，點講落去啊？
俗d咁話，份份工都有姣婆同脂粉客。你所講o既多女、食女，食仔，留俾佢地啦！
大部分既同事都好尊重而投入自己既o職業工作。
我地用自己o既勞力同精神去賺取你眼中好少o既人工，再用呢份少少人工去過我地自給自足開心o既生活。無錯啊！我覺得錢真係唔係一切。當我真心想搵大錢，就唔會留係到啦！
我地鍾意去旅行、鍾意去服務別人、鍾意去享受私人自由時間，鍾意去感受不同文化。呢d都係令大家想留底落黎o既原因。
特別係今日平安夜，當我同落機乘客講句Merry Christmas o既時候。
原來我都幾enjoy呢個moment，因為我真係可以分享到快樂俾人 smile 表情符號
雖然只係一句說話，亦雖然班機做到攰死。但始終都好享受呢一刻。
最後，
我好感謝果d一直好支持同體諒我呢份工既好友，仲有大家！
我祝你地，Merry Xmas !!!


Other Links:
instagram: https://instagram.com/a_four_letter_crew
tumblr: afourlettercrew.tumblr.com
facebook: [url=https://www.facebook.com/Rudemen]www.facebook.com/Rudemen[/url