爆粗空少---誰說XX是對的？ 精選

「顧客永遠是對的。」
呢句說話我係十分之反對。

儘管有幾多老總係briefing 講幾百次呢句話啦，我都仍然唔會贊同佢。
我明白你背後所講o既含意，係想突顯服務時o既專業性。

但係你未傻啦！係依家呢個世代，我自己都話自己被寵慣啦，你仲縱容d客？
咁我地呢d上有pk老細，下要面對pk客o既小小菇，實要pk啦！ 如果佢係對的，咁老總你一定係錯的啦！

咁又倒返轉頭黎講，如果有日有個客做左樣你覺得錯o既事，你又會點呢？
平時見到有客偷影我地相、唔顧機上安全，言語侮辱我地啊，被阿姐阿哥出面鬧到佢被成機人都望實。真係大快人心啊！

不過呢，近排我聽到一個故事，就比較特別o既。果同事做法就唔同d！

話說係一班載住戰鬥民族o既航班上，因為佢地身型比較龐大，就成日按到個call light喎。

咁呢，就有一位好”英勇”o既同事走出去，好惡咁同佢講：I give you three allowances!
Don’t press it again!
This is your first time!
You have two more chances !
然後就頭也不回咁走番galley，只留下成機人o既目定口呆。

哇！可以對住戰鬥民族都仍然咁英勇應戰喎！真係猴犀利啊！
不過聽閒，最後有客因為佢o既態度問題而錄左佢音。
而佢從阿姐口中得知呢件事後，都仲係堅守自己立場，仲要愛理不理咁。

換着係我，就應該唔得啦！
如果果客真係好差態度，我最多未返入galley先同同事一齊diu佢囉。
唔好以為我爆粗咁易爆啊，話哂呢份工都有形象架嘛！你話佢今日非禮或言語侮辱，我就一定diu到佢上天花架啦！我有理啊嘛！
但因為禁太多次call light，就係全機面前鬧爆果客。我就覺得算把啦！
蝕章啊！

我明有時情緒到，真係好難控制。但自己都要學識保護自己啊嘛！
有理就力爭，無理就等陣啦。

你覺得佢做錯，其實你自己都可能做錯左！
咁又有邊果夠膽講話果客同自己係一定是對的！
所以話，我地每個人都會做錯野啦。
呢個世界上無一個人係永遠是對的架，除非你搵死人啦！

係喎！講開死人，唔講咁多，下果回合我就出死者蘇生！ 到你o既回合啦！老總！


Other Links:
instagram: https://instagram.com/a_four_letter_crew
tumblr: afourlettercrew.tumblr.com
facebook: https://www.facebook.com/Rudemen