我在清澄白河真正放鬆了。

呢幾日朋友仔係咁講美國咖啡名店 Blue Bottle Coffee喺東京推出期間限定嘅罐裝藍瓶咖啡。對於上星期先喺東京返嚟嘅小妹表示非常葡萄。

喺東京嘅咖啡店有如恆河沙數，但要搵一間啱自己放鬆賴皮飲咖啡嘅話，介紹返大家去清澄白河啦！

由池袋出發嘅話，可以搭地鐵丸之內線去到大手町再轉地鐵半藏門線，半粒鐘左右就到了。



大小不同嘅咖啡店、cafe、小餐廳分佈喺呢個小社區嘅每個角落。打卡心切嘅小妹就開住Google map搵咗Blue Bottle先（由地鐵站行去大約10分鐘）
雖則小妹潮聖果日係weekday，但店裡都有幾多人喎，店外就坐咗幾個年輕潮媽。講返店裡格局，舖面大、樓底頗高、座位有20個左右、唔侷促。呢度唔評論佢嘅咖啡好唔好飲喇（咁小妹又唔係陳豪，comment都唔可信）。



坐咗陣，決定喺呢個社區遊走一陣。離開Blue Bottle向左行多幾步，轉角位又有另一間咖啡小店 ARiSE coffee roasters，忍唔住又飄咗入去飲返杯。

根據店主嘅介紹，當日有11種咖啡豆任揀，而購入嘅咖啡帶有濃濃嘅果香。好啦！咁就叫咗一杯佢推介嘅多明尼加咖啡。等飲咖啡嘅期間，享受一吓輕鬆嘅音樂、同店主用簡單嘅英文傾吓計，佢係咁講佢個朋友Miki san 喺灣仔開咗間咖啡店，又講miki san間咖啡店就係後面街咁，簡單幾句都感受到日本人嘅熱情。



坐咗30分鐘左右，keep住有街坊入嚟以買咖啡為名，吹水為實。雖然完全聽唔明佢哋講嘢，但見到街坊又請店主食水果，店主又喺佢個書架拎幾本書俾街坊睇，街坊福利會幹事又放低一堆嚟緊月尾搞皮革班嘅宣傳單張俾店主，睇得出佢哋嘅關係好好。

臨走前，店主介俾張一份製作精美嘅《清澄白河散步圖》俾小妹，正！
更多遊記:https://www.facebook.com/yellowaddictedtotravel