一句話惹毛系列：你好有錢喎成日去旅行 精選 推薦

首先作一輪完整利申：我唔係打緊政府工，人工沒有十萬九千七，年假一樣12天，家中無樓無田無父幹，同三成香港人一樣都係住公屋。然而，係真係隔三兩禮拜就有人同我講：「你好有錢喎成日去旅行」，而當中係不乏一群上晒岸嘅契細佬。
一趟旅行其實洗得幾多錢呢？而家廉航、平機票，俯拾皆是。假設你份工唔係話好難請假，非旺季去轉台灣日本泰國分分鐘唔洗過千，住Hostel都係幾百蚊一晚甚至更平。如果你係去親旅行都要住五星級酒店，坐號稱全港最好的航空公司（哦。），咁係你嘅事喎。加上唔係去到瘋狂購物嘅話，一日三餐正常消費、用公共交通工具，去一次旅行不過幾千。



呢個世界其實仲有好多好平嘅地方值得去，例如越南、緬甸、柬埔寨、斯里蘭卡等等，只係身驕肉貴嘅你哋睇唔上眼，嫌污糟嫌落後。

講遠D去歐洲跨國遊啦好未？機票無錯係平極都走唔甩五六千，但Hostel仍然係一晚幾百，其餘火車巴士之類都唔係話好貴，食飯亦唔係預你吓吓坐低喺餐廳豪食。如果間中咬下街頭小吃、返Hostel煮，以一至兩個月嘅旅行嚟講，三四萬以內全包係絕對無問題，不知幾多人去轉日本都講緊埋單要萬幾蚊添啦。同埋歐洲都講去邊嘅，西歐英法之類固之然係貴，但其實東歐嘅物價消費真係好低，起碼例如我去捷克飲杯啤酒 —— Sorry，係平撚過水。
而最重要的是，點解你洗六千蚊買iPhone、三千蚊整部HiFi、二千蚊睇場演唱會得幾粒鐘，通通都得，我放工Weekend仲要秘撈唔食早餐搏OT錢買晚餐唔買衫唔買玩具，留返晒所有錢去旅行，就成日要比你串呢？每個人嘅錢洗去邊、洗幾多，都係睇有幾鍾意、覺得有幾值得，我唔似得你覺得辛苦搵埋要嚟供樓、捨得月花五千養架車，唔通我又會話你係含住金鎖匙出世、賺錢買花戴咩？



因為好重要，所以講多次 —— 我去嘅每一個旅行都係洗自己賺返嚟嘅，一樣係辛苦錢，沒有誰比誰高尚的好嗎？


************************************
網絡作家B612 – Facebook專頁：b612lpp

（鍾意睇嘅請你去俾個like，支持吓我繼續寫嘢吖！:)）

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」