【膽小慎入】我住過「最唔舒服」的外站酒店

兼職空姐姥姥 於 13/08/2017 發表 收藏文章
話說空服員經常獨留外地,我相信我住酒店嘅時間都比一般人多,一個人住酒店,除咗需要比較獨立之外,仲要比較大膽… 點解咁講?因為實在有太多前輩/同事說酒店有「污糟嘢」… 而我確信呢個世界係無奇不有,「鬼」的確存在,只爭在你時運有無遇過。

假設酒店真係有鬼,照理估計都總有分多定少、猛唔猛,雖然我經常本著「平生不作虧心事…」,但總會有時運低時侯… 而我個人經歷之中,最令我唔舒服嘅酒店都莫過於呢間…

記得大概六年前...

我第一次飛去呢個地方,一入酒店大堂,已經覺得陰陰森森,而且呢間酒店個設計有啲奇怪,check in 之後,住客要穿過一個類似係內園嘅地方先可以到達酒店房大廈,內園嘅右手邊有間餐館,由於我哋set crew好夜先到達酒店,所以間餐館已經熄晒燈,但係深深處又會見到有啲藍燈開著😓 終於上到去自己住嗰層樓,出𨋢口一望… 心諗條走廊洗唔洗咁暗呀… 仲要「出口」盞綠色燈就極光… 成條走廊望落咪就係又暗又綠😓 唔識形容… 總之唔舒服啦

入房之前

我見隔離同事入房前先敲門,佢話意思係同入面講:「打搞晒喇,我好快走…」,我無照做,但我一入房就開晒所有燈,不過,開晒所有燈間房都係好暗… 而且廁所燈仲要壞咗!見到廁所盞燈不停閃,屌… 真係驚到一定要講粗口壯膽… 但由於第二日好早就要 on duty,唯有一路喺床上面同自己講:瞓覺啦!唔好諗咁多!迷迷糊糊之間,我就經歷咗生平第一次「被鬼責」了

自此之後,我好少會飛呢班機!除咗即日來回(唔洗去酒店),但好不幸,話說三/四年前有一次 standby call 比公司捉咗去呢間酒店!我心諗!死啦… 我係咪真係要學啲 crew 講要帶條男人鳩毛喺身?(啲crew話咁樣最有陽氣🙈)但係好奇怪!嗰次甚至係之後幾次去呢間酒店,已經無晒嗰種陰森感覺!而且上到房間亦無再出現怪事… 仲要出奇地舒服… 到底點解??

(下回分解點解)


#所有內文真人真事親身經歷
#所以話空姐空少其實幾大膽
#有時必須頂硬上
#鬼叫你窮
#伸利無陰陽眼

_______________________________________

FB: 兼職空姐姥姥
IG: christyylolo
航空資訊、分享生活、隨心寫作。

FB▶https://www.facebook.com/parttimelolo/

UBlog▶https://www.facebook.com/parttimelolo/

GoTrip▶http://www.gotrip.hk/author/christyylf/
標籤: 酒店  空姐  

留言


請按此登錄後留言。未成為會員? 立即註冊
    快捷鍵:←
    快捷鍵:→