[泰國流浪] 香港仔。魚旦流浪記- 序言篇 精選 推薦

大家好，容許我係呢度介紹一下自己，我係Mr.O，拉車邊算係一個80後啦，係一個土生土長、出生基層嘅香港仔（即係窮囉）！

我本身最唔鐘意寫字，開呢個blog嘅原因只有一個：我喺泰國曼谷買咗一架四十幾歲嘅古董車(我架車叫魚旦呀)！ 所以我決定要記錄低我同魚旦嘅旅程！

呢架就係我嘅魚旦啦！

咁其實點解會開始有呢個旅程呢？故事大約喺四、五年前開始，我同女朋友寶寶都對Volkswagen Type 2 & Type 1嘅古董camper van 好喜愛 (即係好多香港人會叫佢做餓靚之van個架車呢，但餓靚之其實都只係日文Orange 的讀法)，我地覺得佢外型好靚,同好有一種hippies 嬉皮士嘅感覺～


McDonald 叔叔都hippies 咗～


每一架camper van 都總有佢自己嘅吸引力！


一開始，我地會去太原街（即係灣仔玩具街呀～）買呢款車嘅玩具呀，模型呀～去氹下自己開心，但從來都無諗過會擁有一架真嘅Camper Van !
由買玩具開始…


再用幾個鐘砌咗架Lego!

直至2012年，我地一齊去泰國清邁旅行，一個無意中嘅發現，就徹底改變左我嘅想法同人生！

就係呢一眼，徹底改變咗我嘅生命！

喺過去兩年，我就因為周圍去搜尋呢架Camper Van 而去左7次泰國！每一次嘅旅程，都認識咗好多唔同嘅朋友，得到好多平時去旅行無可能得到嘅經歷！(但因為之前太懶，無記錄低之前揾車嘅經歷，之後等我得閒D我會再同大家分享！)
旅途中，認識咗車友們，仲令我有機會第一次參加大型vintage car 夜市!

從來無唸過，眼前充滿住vintage car,亦無唸過可以親身參與呢個咁大型嘅VW car show!

一路走來，認識咗好多朋友，得到好多幫助，開闊咗好多眼光！

旅程中，亦都見到泰國美麗嘅另一面！

搵車嘅旅途中，往往令我得到更多機會見到難忘嘅場景！

而買車呢個想法，更由一開始想買架camper van帶返嚟香港，變成辭咗份工，隻身嚟到泰國，希望可以藉著魚旦帶我睇更多，走更遠。希望他日就算老咗，都可以同人提起下呢件小事，成為人生嘅一個小亮點。
魚旦，希望我同你可以成功一齊睇更多、走更遠！

所以我會以魚旦為伴，先係曼谷生活，學學泰文增值自己，再增值埋魚旦，將佢變成一架流動照相館！之後就希望用魚旦嗰四隻腳，帶我行遍整個泰國！ 所以呢個blog 最重要就係要記錄底我呢個旅程同係泰國嘅生活點滴！
希望魚旦同我嘅旅程，都可以令你堅持去發夢！

夢想當然唔只咁細！我希望有機會帶著魚旦去其他國家走走！而《終。極。目。標》就係同魚旦走遍世界每一個角度 (我發夢中…..但希望會發生！）。

我與魚旦嘅泰國冒險之旅～正式開始啦～

嚟緊嘅日子，小弟Mr.O將會係呢度分享我同魚旦嘅生活，希望大家都會喜歡同多多支持！

********************************************************************************************************
記得LIKE 埋我FACEBOOK PAGE, 緊貼魚旦同我呢個香港仔嘅流浪之旅~~
https://www.facebook.com/fishballhongkong