[泰國流浪]香港仔。魚旦流浪記前傳: 搵車篇–2013年6月曼谷上集 精選 推薦

相隔咗半年，香港仔終於買到Airasia big sales 勁平機票，係2013年6月又出發去搵車啦！雖然上次去清邁搵車除咗學識咗俾人呃300銖之外，查實都無咩成果… 但係有個上次去清邁嘅經歷，我總算明白只要你肯踏出第一步去做，無嘢係無可能！我上次嘅一無所獲嘅結果，其實只係我做嘅功課唔夠多 （真心唔關我太Kai 嘅事！），所以係我知道我要去搵車之前，我已經開始做定咗功課！（你知啦，Airasia 平機票要成個世紀前買咖嘛…真係有好多時間準備咖… ）

所以，透過泰國嘅VW forum, 同facebook, 我就識咗啲 VW lover, 希望可以對今次嘅曼谷搵車之旅有啲幫助！
大家仲記唔記得上次喺曼谷夜市嘅一哥呀？其實自從我上次去完曼谷之後，佢好間唔中都會send 下一啲資料俾我嘅！

青BB…. 點要得落?
但都唔係太岩我心意，所以係今次去曼谷之前，我都有同佢講聲，佢話會帶我去睇下車! 但係上次對佢嘅印象都唔係甘好，所以都係抱著睇下無蝕底嘅觀望態度。

去到曼谷嘅第二日，我就約咗一哥係酒店等佢車我去睇車啦！大約坐咗45分鐘車，我地又去咗一個都幾偏僻嘅地方（一哥其實個人都算唔差，起碼無收我300銖），落咗車再穿過一啲小路（喂，唔好帶我去賣呀….）， 我地去咗一個好大嘅車房！

呢個咪係我女朋友寶寶之前所講，「要搵呢d 車, 就梗係要去偏遠啲」嘅錦田車場！

我望住個車場，即刻心唸：

搞咩成個劏車場咁！！

第一次一次過見到咁多架爛嘅VW….
唔係太多人識，但其實我覺得T3(紅色呢架) 都好型。

後來我先知，原來市場上好多賣緊嘅車，好多都係由車房回收呢啲爛車，然後用好長時間翻新再賣出去。

就咁見到佢地呢個狀態，其實都唔係好想像得到要用幾耐時間，先可以變到好似魚旦而家咁靚仔…

其實魚旦好幾年前，都係由一架比佢更爛嘅爛車，慢慢翻新出嚟！

除咗VW BUS, 其實泰國仲有好多甲蟲仔! 係街見到嘅通常都已經好靚仔，但係草叢入面嘅甲蟲仔又有另一番味道。

呢啲舊車翻新最麻煩就係車身部分，有時只係要做好個車身，都可以用成一年半載嘅時間…

就係佢地，幫一架一架嘅爛車翻新，我先有機會遇到魚旦!

呢D就係整緊嘅車啦，好期待佢地好返嘅一日…

佢就係將近完成嘅VW BUS 啦! 黑白真係好CLASSIC!

全場最靚就係佢!

係個車場玩咗陣，睇完一輪爛車，一哥帶咗我去第二個車房睇靚車! 但好彩，有咗上次去睇車嘅經驗，我今次無好似港女咁驚呼狂叫! 第一架見到嘅就係一哥細佬架車:
呢架就係一哥個細佬架車!!

呢款農夫車而家都炒到好貴，我都好鍾意，但就唔係好岩我用…

車場老細架車! 勁靚!!!



呢個baby blue 我女朋友勁愛….

23窗!!! 整完一定勁貴!

泰式design! 蓆!

睇完一大輪，唔係太爛就太貴，都係食白果，而且因為當時我地係諗住買架車返香港，所以要用一年時間去維修嘅車，對我地來講真係唔得… 不過一日內見到咁多車，對我呢個十年都見唔到一架vw bus 嘅香港仔來講，真係好興奮!!

講返一哥，作為一個生意人，原來佢有成7架車… 其實佢個人都唔差，至少佢用咗一日時間車我去車房睇車又唔收我錢先~(香港仔應該開始轉運，遇到好人好事!)

一哥7架車中嘅其中一架!!

唔知我會唔會有一日都可以擁有7架魚旦呢….. 夢就要繼續發嘅，所以聽日繼續曼谷轉運四圍搵車之旅~

************************************************************************************
記得LIKE 埋我FACEBOOK PAGE, 緊貼魚旦同我呢個香港仔嘅流浪之旅~~
https://www.facebook.com/fishballhongkong