[泰國流浪]香港仔。魚旦流浪記前傳: 搵車篇 — 2013年1月曼谷 精選 推薦

泰國呢個地方，我真係嚟過好多次，差不多每年都會最少嚟一次，但係真真正正因為搵車而嚟 ，我相信要由2013年1月開始講起....

當時我同幾個朋友嚟泰國玩，果時已經有搵車嘅念頭，但係唔知從何入手，只係係去之前上網睇過下，同只係知道有好多人會用呢種camper van 係夜市開檔做生意...所以係無辦法之下，我就決定掉底啲朋友，搵一晚自己去夜市睇下有咩發現啦。

其實當日我就係坐呢架的士去夜市啦！講笑咋！不過佢地玩古董車真係玩得好有型!

我當時去嘅係火車夜市，近翟道翟果邊，主要係賣vintage 野！
如果鐘意vintage 野，呢個火車夜市真係好正！
呢個夜市係我去完無耐就因為政府收返撻地而執咗，不過主辦單位近呢一輪又搵到另外一個大舊夜市幾倍嘅地方，重新開業！我上星期先去完，仲多野睇過之前，如果嚟開曼谷，一定要去睇下！（記住火車夜市只係開星期四至日，但週末通常都水泄不通)

好，講返正提先，果時我入到夜市，好快就見到好多都係汽車攤檔，每架車都賣唔同嘅產品！

有賣傢俬啦～
有賣鞋啦～
甲蟲都有好多～
當然仲有賣衫啦～

有啲仲係我想搵嘅VW麵包車，當堂成個人興奮晒！但係人地都只係揸架車嚟賣嘢，又唔係賣車，咁點算呢！？無辦法啦，扮傻仔走過去同人傾吓計順便索下料！佢地多數都好好人，知道你都係車友都好樂意同你傾幾句(如果佢識講英文的話)，同架車影下相都無咩問題！
.
其實佢都有少少似魚旦....
Cafe 亦唔少得....

但當我一問到係邊可以買到VW camper van，佢地唔係唔想幫你，不過就係唔知點講你知。如是者我同咗幾檔人傾計，都無咩大成果。其實我當時係一心想搵Type 1(前面兩隻窗加個大V字嗰隻)，Type 2 (即係魚旦個款呀）呢啲次等貨跟本睇唔上眼(千其唔好俾魚旦知道，如果唔係佢一定嬲死都似)，所以選擇真係唔算太多。

再沿路一直行，就叮一聲發現咗全場嘅亮點：一架21窗嘅Type 1(成架車有21隻窗，算係面包車裡面比較高階嘅一個型號!!! 好少見到!!!)喺我面前出現咗!


OMG!!!!!!!靚到呢!!!!!
靚仔T1同檔主一哥
21window 真係無敵！有呢個"V" 字係車頭就係Type 1 (T1) 啦!!
前後左右都勁靚!!!! 21 WINDOW 就係計埋上面個層嘅細窗!
係呢一刻，我當然唔會放過呢個機會啦，即刻衝過去同嗰個人吹吓水，呢個哥仔同我講佢叫阿一（咁我地就叫佢做「一哥」啦！）我同佢表明來意，同佢講我有興趣想買架T1！點知一哥竟然答我:

"I'm the seller！"

!!!!??? 有無咁橋呀？有無可能咁順利先？(你見我最後個仔變咗魚旦就知...就知世事豈會盡如人意呀....) 我地傾咗一陣之後就交換咗contact，一哥仲話可以send啲資料俾我睇！係個一刻我真係好開心~~咁我當晚就懷著期待嘅心情離開咗火車夜市啦....

因為過兩日我就會離開曼谷，去清邁玩順便又去搵下車，所以離開咗夜市當晚，就即刻問一哥拎資料同約吓幾時可以睇車啦！咁可能佢又覺得我好熱切啦～佢即刻有send啲資料俾我睇下，一睇...就發現同我嘅預期相差太遠喇！
咁。貴。嘅!!!!!!!!!

原來21 windows要成140萬泰銖!!!!
呢架11 WINDOW 嘅T1 都要58萬銖....

我呢啲細路仔真係買米唔知價(當時個rate仲要係得3.8 orz)，因為我嘅budget 大約只有十萬港幣，多少少都無，即係唔洗唸啦！

既然係咁，無辦法啦，唯有去到清邁再睇下有無平D 嘅車啦。

無驚無險，第一次嘅曼谷搵車初體驗就完啦，雖然無咩成果，但係都叫知道D 車嘅市價大約係幾錢！聽日同大家去係泰北嘅清邁繼續搵車啦！

************************************************************************************
記得LIKE 埋我FACEBOOK PAGE, 緊貼魚旦同我呢個香港仔嘅流浪之旅~~