[泰國流浪]香港仔。魚旦流浪記前傳: 夢想的開始– 曼谷2013年8月

上一篇講到香港仔終於由烏他啦跌返到曼谷,去到曼谷梗係去搵我最尊敬既P.ATT 啦! 今次直接踏去P.ATT 既公司! 當然就見P.ATT 架靚車啦!! 墨綠色既膚色,再加超靚既BODY! 嘩!!真係不得了!!!


另外仲有幾架爛爛地嘅,我之前都提過,大部份VW BUS 車主,買架車返來時都係5勞7傷,所以佢地都係要以大量嘅時間、精神同金錢去令佢地變返靚仔! 我地呢D只求速食嘅香港人都唔係太能夠接受,但我相信當中既滿足感亦一樣外人唔能夠明白! P.ATT 已經送左佢地去車房修理啦! 遲D有佢地消息就再同你地UPDATE!


去P.ATT 公司到,梗係唔止係去探下佢甘簡單啦! 因為死好命嘅香港仔,又係一個最好嘅時間去到曼谷! 今晚係JJ GREEN 有一個古董車大集會! 簡直係好似一個車展甘! 大家都會帶佢地最引以為傲既古董車出來威威!! 好可惜.. 我個刻仲未遇到魚旦… 唔係,我地魚旦實最威威!! (戴返個頭盔先,人地D車靚到痴根… 魚旦去到的話實怪我唔幫佢扮靚D…) 而我最尊敬嘅P.ATT,就用佢架靚到爆炸嘅VW T1 車我去JJ GREEN 會場,其實覺得最威威應該係我!!!

真係見到呢D 場景,身位一個VW粉,你話有咩可能唔感動同興奮呢?


係泰國,應該有好多個VW 車會,見到D車貼真係好靚! 我都好想有張魚旦嘅專有車貼!!等我再唸唸佢!!


除左VW BUS, 仲有好多好多甲蟲仔! 你無辦法唔佩服泰國人對古董車嘅熱情﹐僅僅曼谷,都令人大開眼界!


除左甲蟲仔,仲有大量嘅電單車! 我本身對佢地都唔係好熟,之後我先知,原來古董電單車都可以貴到離譜! 真係有幸可以坐過佢車尾!


而電單車車手,自然有身為一個電單車車手嘅造型啦,你睇,我覺得佢地好有型!


食野方面,亦令我呢個地道香港仔大開眼界,因為P.ATT 嘅關係,我就梗係可以同佢地一齊食最地道嘅大鑊飯啦! 大開眼界嘅唔係呢個飯,而係佢地對人既信任! 我地張飯票,其實就只係一張爛紙皮,上面求其寫個數字,就甘俾張紙阿姐,就可以拎盒飯! 嘩!!! 我呢D 香港仔,仲唔即刻唸,如果我要扼多兩盒免費飯都真係太容易。不過泰國人就係唔會甘唸,大家都好信任對方,唔會唸點扼多盒飯,真係令我又愛呢個地方多D!


另外,就係呢個架放住泰皇同皇后嘅相嘅車啦! 佢地係賣一D 綠色粉團嘅食物,名我就真係唔知,不過好似話係皇室既傳統食物,我之後係火車MARKET 都見到有人賣! 講開泰皇,泰國人大部份都好尊敬呢個皇室,因為泰皇在位之後,都對人民同國家有好多貢獻,所以好受人民嘅愛戴,而每年泰國皇室生日,都會有好大型既慶祝活動! 而死好命既香港仔有幸有份參與其中一個大型既慶祝活動! 遲D 我就會係度講咖啦!!


講完野食,其實係呢個甘岩得甘橋去到嘅古董車大晒冷入面,反而遇到改變香港仔生活既一對夫婦:


佢地係一對來自美國既夫婦,佢地係2011 年開始,放低左佢地嘅工作,揸住架1984 年出產嘅VW T3 – “ Nacho” 去漫遊世界,探索唔同地方嘅文化,食物同生活! 佢地經歷左927日,48,822 公里,34個國家,5個洲,無限個小時,係2015 年1月,佢地終於安全返到美國! 我好榮幸自己係搵車嘅中途遇上佢地,令我明白VW LOVER 係有無限嘅可能性,亦因為佢地,我先會浮起有出走香港,去到泰國,甚至其他國家嘅夢想! 所以我有勇氣去冒險嘅源頭,都可以話係因為佢地!

如果你地都想睇下佢地嘅故事,可以去佢地個WEBSITE : http://www.drivenachodrive.com/2015/01/end-of-the-road/

呢個相遇,都可以話係成就今日嘅香港仔。魚旦流浪記嘅轉捩點,但係最大嘅原因,都仲未到… 因為好多時,勇氣都係迫埋牆角先會咇到出黎!! 而點解明明好似會好順利,到最後又係買唔到架紅白T2 呢… 都可以話我呢個香港仔黑仔同好彩於一身啦… 下篇繼續 !

***********************************************************************************

記得LIKE 埋我FACEBOOK PAGE, 緊貼魚旦同我呢個香港仔嘅流浪之旅~~
https://www.facebook.com/fishballhongkong

留言


請按此登錄後留言。未成為會員? 立即註冊
    快捷鍵:←
    快捷鍵:→