［笨實］人氣鰻魚店「尾花」 精選 推薦

講起食日本嘢，大家都會諗到壽司呀，拉麵呀咁。但係我 揀擇值仁 最最最鍾意就係食鰻魚！所以去到日本，見一間，食一間！一般我哋去旅行前會做曬research睇吓邊間好味。你有無中伏經驗？我就比人陰咗好多次！所以唔想你哋再中伏，立即去試下呢間，係網上大讚三大必食鰻魚店，日本openrice - tabelog 都有成4.x分嘅「うなぎ 尾花」先！
網上話尾花好多人排隊，想係Lunch Time 或者晚餐時間食就要有心理準備排成粒鐘。 植仁一向唔鍾意排隊，所以揀咗落完場4點開門嘅時間去，聽聞會少D人。我3:45去到排第4班人，邊有講到咁誇張，或者係4點加閒日時間關係啦。日本人真係好準時，4點一開閘嘅時候！招待嘅婆婆們一個個帶我哋入去坐，入面係日式建築設計，仲好好見我後生仔比個窗口位我涼吓。開頭植仁都覺得無咩⋯⋯不過一陣你就知⋯⋯ 一坐低，我當然食呢度出名嘅鰻魚飯啦。佢提我鰻魚食品只可以落一次單。啊！只可以落一次單咁寸？同我一樣寸得起。呢間「尾花」係即叫即煮，所以網上話要等耐D。Okay! 好味我都等得，我生長水遠只係去食個鰻魚飯，多多時間都等得。
不過坐下10分鐘，坐下10分鐘⋯⋯咁就坐咗半個鐘。我身邊嘅公公婆婆全部都好有耐性咁等。再當我等了又等嘅時候⋯⋯我背後涼一涼⋯⋯唔係因為有貞子，係因為我已經熱到濕晒！當日3x度，真係好難頂。
跟住我聽到隔離枱不斷發出「啪啪」聲。咩料呀？望一望，隔離枱個日本大叔係咁比蚊咬，10秒後我都勁痕⋯⋯一齊拍⋯⋯，另一邊個婆婆問我：「有蚊呀呵」，我話⋯⋯係呀，好多蚊呀，之後就幫我關返隻窗。但重點係，我已經等左1個鐘⋯⋯說好的鰻魚飯呢⋯⋯ 1小時15分過去，我食到鰻魚飯啦！外觀係靚嘅！睇人講又話好Juicy又無骨，仲要新鮮熱辣辣。點知食第一啖⋯⋯喂⋯⋯有幼骨嘅！算⋯⋯一條半條我放過佢，但食極都有骨我真係接受唔到囉！大嗱嗱5,300円，3百幾蚊食盒有骨嘅鰻魚飯仲要有骨個吓真係呢⋯⋯我去返中野食炭燒鰻魚飯無咁嬲。
總結：地址我都未講係邊，因為山卡啦要突登去，去到又熱又等得耐又貴，最重要係有好多幼骨！我真係接受唔到有骨，我比負評！我唔會再去嚕！仲話咩東京3大必食鰻魚飯⋯⋯

好味指數：味 味 （5分為滿分）
出位指數：出 出 出 出（5分為滿分）
插爆指數：D D D D （5分為滿分）

尾花（おばな）

地址：東京都荒川区南千 住5-33-1

営業時間：[火～金]11:30～13:30 ／ 16:00～19:30 [土・日・祝] 11:30～19:30

定休日：月曜日

撰文：揀擇值仁

資料及圖片：揀擇值仁

小編 「揀擇值仁」簡介：貴為公子，外觀行先，氣質跟尾，最鐘意啲好睇、好玩、好食、有品味嘅潮流玩物同嘢食，輸人唔輸陣，好味之外仲要食裝修，食包裝！

想知更多旅遊資訊可前往：http://heyastyle.com