【港日決戦】午餐肉大比拼！ 精選

答我！日本嘢係咪真係好啲？係咪真係好啲？係？！真係肯定？為咗求證呢個疑問，我哋就嚟個「港日決戦」。會找來同一種類分別嚟自香港或其他國家嘅食品或產品作比試，睇吓係咪真係日本嘢就係好啲呢個定律！今期先找來大家日常都會經常食嘅午餐肉！來！即刻對決！
我哋先睇睇價格：從價格睇日本完勝⋯⋯貴嗰方面⋯⋯
日本代表：混有雞肉嘅午餐肉，價售$47.9 （簡直食咗我隻車）
香港代表：長城牌午餐肉，價售$12.9 （由細食到大，買3件仲平6蚊）

未試之前大多數人（包括小編）應該會抱住一個心態，日本嘢，貴係好應該、亦好合理！Fine ~ 即管繼續試落去再作結論。接下來～開封！！
左手面係香港午餐肉，右手面為日本午餐肉。可以睇到色水方面日本代表較為淺色，可能因為混合咗雞肉關係吧。香港代表就不用多講啦，見慣見熟！好～落穫煎～
一煎就已經感受到分別，上面為日本、下為香港。日本午餐肉會覺得肉質厚實，而香港那個就會好明顯覺得肉質較鬆散。而香港午餐肉煎時會分泌較多油出來，反觀日本午餐肉相對油份較小。最後～上枱試食！
煎好後右為日本午餐肉，左為香港。聞落好明顯香港午餐肉比起日本午餐肉香味強烈！亦較日本午餐肉脆身。咬入口分別就更大，日本代表較為乾身，而香港代表就較多肉汁。味道方面，日本午餐肉：鹹，香港午餐肉：更鹹。 總括嚟講，如果只計味道，小編係會投香港午餐肉一票，因為較為香口及Juicy！但如果從較為健康角度去睇，日本午餐肉就贏返一嘢！因為肥肉較少及鹹味無咁重。但始終都要有勝方，所以今次對決係香港代表勝！因為我哋今次係從味道出發。所以小編正式宣佈打破咗日本嘢未必係最好同埋貴就一定好呢個道理！除非你追求嘅係健康，否則無必要比40幾蚊買罐午餐肉吧！當然，小編仍然推介比各位可以一試無彷，始終人一世物一世嘛！最後再附上兩款午餐肉營養標籤比大家參考一下啦。
撰文：捉野內瘋
圖片：HeysStyle

捉野內瘋 簡介：（專捉衰嘢，見到衰嘢就會發瘋插到你落地獄，但乜都夠膽試，試完好嘅都會發瘋地讚到你上天！歡迎各自認是日本好嘢嘅店鋪或物品叫我來試，如果你唔怕最後都係落地獄的話！）

更多精彩內容盡在：www.heyastyle.com
FB專頁：https://www.facebook.com/Heyashoponline