一個人也可以 土耳其甜蜜之旅

跟著KKday去旅行 於 05/06/2016 發表 收藏文章
兩個女仔就有兩個鐘意甜品,如果你已經食厭左日韓台嘅甜品,係時間轉戰土耳其。唔好以為土耳其淨係得火雞同軟糖,事實上土耳其嘅甜品真係多到街頭排到街尾。鐘意食甜品嘅就千祈唔好錯過啦~
➤土耳其冬甩(Lokma)
去到土耳其,有好多唔同嘅小攤檔都會用Lokma黎做鎮店之寶。其實Lokma可以話係土耳其式嘅冬甩,將麵團低溫油炸再將成個浸落糖漿入面,有啲鋪頭仲會加開心果碎,口感更加豐富。

因為浸左落糖漿入面,麵團嘅質地會比真冬甩實一啲,雖然都冇乜飽肚感,但強烈建議大家一‧次‧只‧食‧一‧個!

除左有冬甩形狀,有時亦會係球狀。買嘅時候可以指定要幾多個,亦都可以用價錢同重量黎計。Lokma會放係紙袋入面,用竹籤食先唔用整到隻手「痴立立」。

➤土耳其軟糖(Lokum)
無論你有冇去過土耳其,都一定有聽過土耳其軟糖Lokum。係土耳其,每間甜品或者蛋糕鋪都會有得賣,材料好簡單,只係將果膠加上開心果或者榛果,但味道十分多。
土耳其人做嘅軟糖有玫瑰、肉桂、檸檬和好多唔同果味。除了平常能夠看到的正方形軟糖,亦都有灑滿糖粉或椰子粉嘅長條狀軟糖,不過就要自己切,或者你夠牙力都可以可以就咁咬嘅~
如果去到土耳其只可以食一種甜品,一定係揀土耳其軟糖。好唔好食就見仁見智,但係去到唔同地方旅行,都當然係想試下當地最有特色嘅野啦~
有咁多口味揀咩好?最穩陣就係揀堅果味,最傳統亦都冇咁甜。另一個好受歡迎嘅味係石榴,裡面充滿當地出產嘅開心果,好受外國遊客歡迎,大家都不妨一試。

到底幾時開始有土耳其軟糖?
紅色:玫瑰水;黃色:檸檬皮;綠色:苦橙。
土耳其軟糖發明嘅時間冇人可以確定到,不過佢之所以出名,係因為甜品師傅 Ali Muhittin Hacı Bekir係1776年開左一間甜品鋪,某日有一位英國探險家幫襯,將lokum帶番英國,至此之後,Turkish Delight呢個名就全世界都識啦!

➤土耳其龍鬚糖(Pişmaniye)
外國人叫Turkish Fairy Floss(土耳其夢幻棉花糖),就好似香港嘅龍鬚糖一樣,入口即融,好似食左甜甜嘅空氣。 Pişmaniye食落好似棉花糖,因為做法係將糖融化再冷凍,拉成一個大圈,再把糖圈放入麵粉同牛油,之後就要不斷將糖圈拉開,直至質地變得鬆軟。
Pişmaniye有唔同口味,例如係開心果同朱古力,睇顏色就可以分到,白色就係原味。Pişmaniye嘅起源可以追溯到15世紀,常見嘅包裝係將十幾個裝成一個紙盒,一個大約兩隻手指公嘅大細。
食嘅時候要小心啲因為好容易跌到一地都係,而且一掂到熱野或者水蒸氣就會融融地,所以你想「梅」耐啲都唔得。而且拆封之後一定要包好,唔可以接觸空氣,亦都唔好放入雪櫃,如果唔係就會變硬咖啦!
➤哈爾瓦酥糖(Helva/Halva)
哈爾瓦酥糖係泛指一種係整個中東、南亞、中亞、西亞、北非、巴爾幹同東歐都有嘅甜品,味道十分甘甜,望落就好像用糖粉堆積而成嘅蘿蔔糕。係巴爾幹同中東地區,哈爾瓦唔止係一種甜品,有時仲當係早餐咁食咖!
酥糖有兩種基底,一種是用粗麵粉加上牛油同糖;另一種就係用芝麻糊或者其他堅果油,再加牛油同糖,會比較易碎。整好左酥糖底之後,多數再加大量果仁,例如係開心果。
怕甜嘅人可以叫老闆切薄啲,少食多滋味!就好似土耳其軟糖咁,哈爾瓦酥糖都係好容易係唔同嘅甜點烘焙店搵到。相對黎講,哈爾瓦酥糖嘅甜度係比較容易接受,不過當你已經去左土耳其幾日,可能已經有啲味覺遲鈍。
➤庫納法(Künefe)
庫納法係由法蒂瑪王朝到依加都流行嘅甜品,鐘意芝士嘅朋友一定要試下,因為呢個蛋糕係以白芝士為底,再加上麵粉小麥糊,鋪上酥脆糖漿,最後灑上開心果粉,亦有玫瑰或橙味。
土耳其大部份餐廳食完飯都會有甜品,而庫納法都係其中一個選擇之一。可能因為用芝士做底,所以唔算太甜。唔想太飽滯的話,可以兩個人happy share~
➤番紅花布甸(Zerde)
番紅花布甸係傳統嘅土耳其甜品,唔止係土耳其,係伊朗嘅農產區都好受歡迎。布甸嘅主要材料有大米同玉米粉,做法同米布甸好相似,不過米布甸會加牛奶,而番紅花布甸就係加水。

番紅花布甸睇落好似好濃稠嘅南瓜湯,通常會係土耳其婚禮或是新生兒嘅慶祝場合食用。如果你有試過土耳其嘅八寶粥 (Ashure),你可以會以為佢係黃色嘅八寶粥。事實上,佢嘅顏色主要黎至薑黃同番紅花兩種配料,再加上當地盛產嘅水果,例如係葡萄乾、松子、玫瑰水、開心果同埋石榴等等。
➤丘爾其赫拉(Cevizli Sucuk / Küme)
丘爾其赫拉源自喬治亞(Georgia),係一種外型似腸仔,裡面包住合桃同其他唔同果仁嘅甜食,所以又叫做核桃香腸或者甜香腸。將果仁插入小麥粉,浸入用提子、桑樹同梨所做成嘅果漿入面,曬乾就可以食啦~雖然個樣似腸仔,不過就唔會致癌,仲有豐富礦物質同埋維他命A、D、E。

➤乾果(Kuru Meyve)
係伊斯坦堡,呢種攤檔好常見。前排是香料、右邊是土耳其軟糖,後面就是各式各樣嘅果乾同埋曬乾嘅茶葉,格局有少少似香港嘅藥材鋪同海味鋪。

介紹左咁多甜野怕唔怕自己去完土耳其要去睇牙醫?但我相信鐘情於甜食嘅人無論食左幾多日甜野,番到香港都會掛住佢嘅水果乾。
由於地理同歷史文化所嘅原因,土耳其人好了解長期保存水果嘅技術,乾果就係其中一個辦法。特別嘅地方係乾果入面會加一啲合桃或者榛子,可以增加口感,亦都可以中和甜味。
想睇更多關於土耳其嘅美食就click入黎啦~
馬上同KKday暢遊土耳其:
>>>來到土耳其,當然要坐熱、氣、球!
>>>一起走訪世間最美的場景:棉堡~
▲認識KKday▲
KKday-世界旅遊體驗網站,在全球 54個國家,174 個城市, 有 5000多種不同的行程與體驗。 KKday內有最特別、最意想不到的的世界行程體驗!不論你想當一日忍者、乘坐直升機享盡奢華旅程、還是你想要與猩猩共進午餐…KKday滿足旅人不同的喜好。KKday幫你省去在各論壇爬文找資料的麻煩,一站解決安排行程的困擾!現在,想來一場與眾不同的旅行就來KKday找行程,一起去冒險吧!
KKday 網頁:www.kkday.com
KKday  Facebook: KKday

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→