一個人私奔 2 – 機會是留給有準備的人

少女旅行日記 於 05/03/2014 發表 收藏文章
繼上次去機票網click一click,快人一步理想達到之後,就開始準備第一次一個人的旅程啦! 係咪以為一個人去旅行要比平時同朋友去準備更多更多更多野呢?其實唔係喎,係更加少添! 因為一個旅行最好就係自由啊~~我聞到自由的空氣啊~~ 去邊、食咩、搭咩車、幾時去完全自己一個人話事,唔需要遷就其他人又唔需要同其他人夾,真係冇咩需要計劃的。到達目的地再視乎當時心情、天氣先決定去邊都可以!當然如果有特別想去的地方,都係出發前搵定資料會比較好啦!
而我當時去新加坡就只準備了3樣重要野。
1)地圖
個人認為一定要有地圖跟身,就算去到目的地先決定去邊玩都要知道點去架麻。唔好以為唔帶地圖好瀟灑,要經常都很清楚自己身處的位置,迷路可以看風光,但都不要太過份,經常花時間去問路很無謂,而且景點不等人,辛辛苦苦終於搵到佢但佢閂左門叫我情何以堪?而最重要係能夠靠自己搵到路,唔需要問人都成功去到目的地會好有滿足感的!!對平時冇乜方向感的人來說滿足感簡直爆登!!(我真係唔係講緊自己…)


2)訂一間近車站同在大街上的酒店
這個很重要,不單單是為了方便,也為了安全。夜媽媽自己一個(特別係女生)返酒店真係會驚的,返酒店的路越短、越光猛就越好,要經過窄街暗巷的酒店千萬不要揀,多平都不要!!一個人出走已經夠勇敢,唔駛搵命博的。



(後記:話說自己去新加坡我住呢間hostel,位置不錯,跟地鐵站只有5分鐘之內的路程。但可怕的係入左呢度門之後有條唔算太長但勁黑的樓梯,係下晝行上去都完全冇光好黑個種!仲要樓梯盡頭即係hostel門口有幅小丑畫!(咩料?)嚇到我呢......每次返hostel都係極速跑上去同唔敢望幅畫......)
3)勇氣
最後,帶住一份無論任何人同你講:「下!自己去旅行好危險!」或者「自己去旅行好悶喎!」都阻擋不到你的決心,準備好自己面對旅途上任何挑戰,你就可以出發了!

祝閣下旅途愉快!


如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→