[九州景點] 日本湧泉量第一 溫泉之都別府 八大特色溫泉 必嚐地道蒸氣海鮮

少女旅行日記 於 28/11/2018 發表 收藏文章
九州大分縣有兩個著名溫泉地區,一個係由布院,兩年前去過,可以睇返介紹(LINK);兩年後今次九州之旅就去左別府。別府座落火山地形下,唔單止係日本溫泉湧量第一的縣市,仲係世界第二,第一係美國黃石公園,好厲害!去別府除左住溫泉旅館浸溫泉,都想介紹其他景點俾大家,仲有一間餐廳,好好食。

別府有八大特色地獄溫泉,包括海地獄、鬼石坊主地獄、山地獄、灶地獄、鬼山地獄、白池地獄、血之池地獄和龍卷地獄,合稱「地獄八湯」,每一個有特別之處,每個入場費400yen,但也有一種套票是2100yen,可以看其中七個(有一個沒參與,但我忘記是哪個)。全部看完大概需要三小時,但我個人覺得揀兩、三個比較特別的去看就夠啦。所有地獄溫泉的開放時間都是早上8時到下午5時。

我今次揀左兩個溫泉地獄,第一個係海地獄,因為溫泉水係藍綠色似海水而命名,泉水溫度過達98度!!!所以只可以睇唔可以浸,現場睇非常好壯觀,因為蒸氣超強勁,不斷冒煙,泉水顏色真係幾靚,係Tiffany Blue,亦係八大地獄中佔地最廣闊的一個。附近仲有個小小的池,泉水是淡紅色的!像血之池地獄,不過是迷你版,但因為看到這個,就沒有再去血之池了。另外仲見到有名符其實的溫泉蛋!可以買來試食啊。


另外仲去左個鬼山地獄,原本係見介紹話呢個溫泉養左好多鱷魚所以想睇下,但去到見到主要溫泉池又係成99度,根本冇可能養到鰐魚呀,顏色都是普通的透明水色。原來係隔離有d細池,都係用溫泉水浸住鱷魚,但就係溫度低好多的泉水。感覺唔特別,同去動物園睇鱷魚好似冇咩分別,所以唔建議大家去呢個。如果讓我再選一個,我會選灶地獄,因為原來一個裡面包含六種地獄景觀,很划算,哈哈。


別府除左係溫泉之都,仲係一個港口城市,搭纜車上山可以俯瞰整個別府市同別府港灣。呢個別府鶴見岳空中纜車,由506米上到1300米大約需要10分鐘,中途已經見到好靚好靚的山景,天氣又好好!呢段上山的纜車路一年四季都有唔同風景,春天有櫻花,夏天綠油油,秋天全部紅葉,冬天就係白茫茫一片雪。唔想搭纜車都可以選擇行步行道,大約行兩個鐘就上到山啦。


上到鶴見山就會見到有個大鳥居,神社是小小的,供奉山神。直衝上山頂大約只需要10分鐘,山頂是1375米,但大部份人會慢慢兜路行,途中會經過七個神像,每一個都係代表唔同的祝福,可以祈求唔同的東西。


另外仲有個觀景台,就係睇市景同海灣景,仲可以見到連綿山岳,景色好美!!!!別府灣對岸就是四國了。雖然呢個時間未有紅葉,不過有芒草加持,都係令人難忘的靚景!


別府鶴見岳空中纜車
地址:別府市大字南立石字寒原10-7
纜車運行時間:9:00-17:00 (冬季11月15日-3月14日至16:30)
費用:成人來回1600yen;單程1000yen

你還記得某人的氣味嗎?能夠喚醒回憶的不只是地方、歌、物件、人,還有氣味。每個人都有屬於他/她自己的氣味,回憶也一樣,某種氣味會讓我想起某人,還有我們之間的故事。別府有間香水博物館,收藏了很多很多不同經典品牌的香水,關於香料的來源、香水製作過程、各國香水發展歷史、香水樽設計的資料都有,非常豐富。對於喜歡噴香水的少女來說,這博物館真的很有趣。入場費500yen。


最特別是博物館還有香水調製體驗,可以調教屬於你自己的香味,獨一無二。過程一點都不複雜,從九種不同氣味中挑選你喜歡的三種,分前、中、後味,再按自己喜歡調教每種香水份量,大約30分鐘就完成。其實不到最後一刻,你都不會知道調教出來的香水是什麼味道,也可能有點驚喜。最後可以帶走你自製的香水,以後就有屬於自己的香味了!製作30ml的香水只需2200yen,港幣約$154真的很平!我調的是淡淡的花香味,因為我比較喜歡清淡自然的味道。你們也來調教屬於自己的味道吧!


大分香水博物館
地址:大分縣別府市北石垣48-1
營業時間 : 10:00~18:00
官網 : http://oita-kaori.jp/

別府真係一個超級溫泉之都,周街地下都有好多蒸氣冒出,因為溫泉水真係太多,不斷經地下水道排走就會冒煙,形成獨一無二的街道景觀。而大量蒸氣仲可以用黎煮食添!


地熱觀光Lab 緣間就係一間主打溫泉蒸氣海鮮的餐廳,唔止海鮮,菜、肉、連pizza都係靠蒸架!當地稱為地獄蒸料理,大家仲可以自己體驗下個過程。而家香港都好興食蒸氣火鍋,健康又好食,雖然味道會清淡d,但就更加食到食材本身的鮮味,大推!咁多野食一個人都只係3000yen,即係港幣210蚊咋。


餐廳仲有個特別之處,就係座位下面係溫泉池黎,可以一邊食飯一邊浸腳!好正!所以大家黎別府唔好淨係掛住浸溫泉,其實仲有好多值得體驗!


地熱觀光Lab 緣間
地址:大分縣別府市鉄輪字風呂本228-1
官網 : http://enma-ch.com/

如果想好好遊覽北九州,少女有兩個好推介,分別係:
1)北九州女子旅 4日套票 > 詳情按此
2)北九州之旅 4日套票 > 詳情按此

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→