[台中景點] 古蹟變身華麗手信勝地 宮原眼科

初初聽到宮原眼科呢個名時，完全冇頭緒係咩東西，後來先知道呢個名的由來係一座日佔時期興建的眼科醫院。而呢間醫院近年由台灣日出集團接手重整，將古蹟變成賣手信的地方，吸引左好多遊客去潮聖。


宮原眼科外表非常有歷史質感，保留30年代的紅磚，但頂層係玻璃天幕，顯示一種新舊交融的設計。入到去會更有驚喜，因為佢係一個充滿古典味的華麗圖書館，又或者係中藥店！店內樓底好高，而且裝修好有心思，好多古典裝飾，木書櫃、木抽屜、吊燈、鐵罐、天秤等等都營造左一種好懷舊的氣氛，係個影相好地方。


店內有兩層，上層係餐廳，下層主要就係賣日出呢個品牌的手信，有朱古力、鳳梨酥、太陽餅、乳酪蛋糕、曲奇、蛋卷、荼葉等。而最大賣點係款款包裝都好精緻同特別，有d包裝到好似一本書、有d就好似文具，好有驚喜。就算冇特別包裝，只係一個盒，個盒都係非常精緻，同其他品牌的手信包裝好唔同，用黎送禮一流！相信少女們會好鍾意！不過價錢會偏貴一點，大部份價位都係台幣$300以上，但聽講質素都唔錯，所以都可以買。


除左手信外，宮原眼科仲有一間賣飲料的店同埋大排長龍的雪糕店。雪糕店的雪糕口味非常多，花多眼亂，淨係朱古力味都有10幾種，好誇張。而且仲有唔少特別的口味，例如天天天藍、明天會更好、思念總在分手後......建議愛冒險的人去挑戰下。價錢就有點貴，單球台幣90；雙球150元；三球以上每球75元，即係一球港幣$20左右。


而點解呢間雪糕店甘受歡迎？主要係因為配料吧。當大家揀完雪糕口味，就可以揀埋配料，同雪糕口味一樣，配料選擇又係非常多，最特別係有鳳梨酥！買單球可以免費揀一種，雙球可以免費揀3種，再加配料就每樣加台幣$15，所以見到好多人個雪糕都係好多料好豐富。


少女食的是伯爵茶味，因為單球所以只有一種配料，我揀左芝士蛋糕，我覺得無論雪糕定配料都好食既，伯爵茶味夠濃，但係咪值得排曬隊去買呢......留俾你地去試完話我知。


宮原眼科
地址：台中市中區中山路20號
交通：台中火車站行10分鐘
營業時間：每日10:00 - 22:00