[台東景點] 悠閒市區漫遊 台東森林公園 文青熱點鐵花村 夜光閃閃國際地標

少女旅行日記 於 29/08/2016 發表 收藏文章
台東可以話係一個超級鄉下的地方,即使市區都好荒蕪,住台東的朋友表示台東好悶,但作為從香港來的遊客,我超級享受台東的悠閒氣氛,完全沒有高樓大廈,抬頭是超廣闊天空,每一啖空氣都特別新鮮,環境非常治癒。今次介紹位於市區的3個特色景點,一日可以去曬,雖然係比較受歡迎的景點,但都仍然充滿台東的悠閒氣息,唔多人架,黎台東就係要放鬆心情啊!

第一站係台東森林公園,公園如其名,一個俾好多樹包圍的公園,踩單車遊覽係最好的方法,單車步道規劃得好好,好易踩。我去個陣唔收入場費,不過由2016年3月開始就要收台幣$30。我在公園附近的單車舖租單車,台幣$200一日,其實公園裡面都有得租。


公園好大,入口不遠處會見到有個琵琶湖,由地下湧泉形成,個湖俾樹包圍,水清到有森林倒影,無論任何角度睇都覺得好靚。


呢個係公園另一邊的湖,原本係沼澤濕地,經過整治後變成而家的鷺鷥湖,比琵琶湖更大,環境好恬靜,好適合發呆哈哈。


最後仲有一個人工湖叫活水湖,都係好大,我踩到去個時甘岩係日落,睇住天空變色好靚,有唔少人在湖邊閒聊,簡單美好的小日子啊。


好鍾意森林公園的環境,成個感覺都好令人放鬆,有唔少爸媽帶埋小朋友黎玩,又有伯伯們在開心聊天,好簡單的生活,踩下停下大約3個鐘左右可以遊覽曬成個公園。


去台灣點可以唔去市集?在台東的夜晚可以去鐵花村,佢係一個由台鐵貨倉宿舍改建成的文青市集,一大片草地感覺特別放鬆,以好有台灣特色的天燈做主題,掛滿左由台灣人手繪的小型天燈,好多都係小朋友畫,有d畫得好得意der~夜晚天燈都著曬燈,好靚!


鐵花村唔大,有10幾個常駐小店,星期五至日就有文創市集,大約10幾個攤位,可以買到本土設計的精品同新鮮農作物。鐵花村係一個好注重音樂分享的空間,所以特別設有表演舞台,星期三至日都會有原住民音樂人同樂隊演出,氣氛一流。旁邊仲有誠品可以逛逛。鐵花村免費入場,但聽音樂會需要收費,當支持一下本地音樂啦。


去完鐵花村,夜晚仲可以去一個地方散步,就係國際地標海濱公園啦。海濱公園係一個類似空地廣場的地方,有海景、步道、劇場、湧泉地景以及公共藝術裝置,間中都會有表演。而國際地標係一個巨型波波球,夜晚會著燈,變成一個閃閃的波波球,影下相都幾靚,但實際入面有咩睇呢,係冇既……慢慢欣賞下人地既設計啦哈哈。天氣好的話可以見到好多星星!如果下晝去,就會見到海景啦。


由台東火車站出發,市區觀光循環線的公車都會去到曬3個地方。我好鍾意台東,雖然去幾日已經可以去曬主要地方.但個種簡單鄉郊生活同悠閒寫意氣氛令我時時都好懷念好想再去啊。

留言


請按此登錄後留言。未成為會員? 立即註冊
    快捷鍵:←
    快捷鍵:→