[土耳其景點] 橫跨歐洲與亞洲的城市 伊斯坦堡5大景點 必買手信推介

少女旅行日記 於 26/08/2018 發表 收藏文章
去土耳其一定要去伊斯坦堡,係土耳其最大的城市,人口有成1400萬。(但唔係首都呀)羅馬帝國統治的時代,伊斯坦堡曾被命名為新羅馬,後來又叫君士坦丁堡,直到1928年先改名為伊斯坦堡,由古至今都一直都係土耳其最繁榮的城市。伊斯坦堡好大,簡單劃分的話有歐洲區與亞洲區,而歐洲區就分舊城區同新城區,睇個名都大概知道一邊多古蹟,另一邊就多現代化建築。個人當然比較喜歡舊城區,因為有好多有代表性又美麗的建築物,例如清真寺、皇宮、大教堂等,今次介紹的5個景點裡有4個都係舊城區,建議大家留多D時間。

藍色清真寺

土耳其係伊斯蘭教國家,人口有接近90%都係信奉伊斯蘭教的穆斯林,所以最常看到的建築物一定係清真寺,伊斯坦堡的藍色清真寺就係代表作,本名係蘇丹阿密清真寺,又稱藍廟。藍廟係土耳其最大的清真寺,總共有6枝宣禮塔,越多宣禮塔就代表越高級。全球最大的清真寺在聖城麥加,有7枝宣禮塔,無論任何地方都唔可以興建一個比麥加更大的清真寺,會被視為不敬啊。入藍廟免費,所有女性都要包頭,唔可以著背心、吊帶、短褲、短裙,以示尊重。而不論男女入廟都要除鞋。第一次包頭,看起來優雅,其實覺得好熱啊。


藍廟外面係淡淡的藍色,而裡面都係藍色為主,相信每個人入到藍廟都一定會非常驚嘆,因為佢根本係一座藝術品!裡面總共有兩萬多塊藍色彩釉瓷磚,拼湊出各種花紋,好好好好靚!仲有超過250塊彩色玻璃,連地毯都係高級羊毛地毯,花紋都充滿伊斯蘭教色彩。藍色清真寺係伊斯坦堡最大的圓頂建築,每個角度睇都覺得好夢幻!另外有一部份只准男性伊斯蘭教徒進入參拜。


聖索菲亞大教堂

原來土耳其曾經有一段好長時間係基督教國家,當時由羅馬帝國統治。後來由鄂圖曼統治,就變成伊斯蘭教,一直到而家。舊城區的聖索菲亞大教堂就見證住呢個國家的宗教轉變。教堂已經有1500年歷史,非常古老,位置就正正在藍廟對面。


聖索菲亞大教堂外型好有氣勢,裡面都一樣,正殿有個大圓穹頂,仲有好多個細小的圓形拱頂、過百條柱、大量吊燈、玻璃窗、壁畫同雕飾,氣派十足。上二樓再睇返個正殿,有另一種味道。不過教堂有一部份長期維修,好大個支架擋住,有點不美觀,聽講維修仲需要好長時間,可能大家去的時候都沒法避開支架,但千年建築也的確需要好好維護吧。


教堂最特別係曾經係東正教同天主教教堂,所以裡面有好多基督元素,例如壁畫係畫耶穌基督。但自從被鄂圖曼攻佔同統治後,就被改建成清真寺,所以又有伊斯蘭教的特色,例如有巨型阿拉伯文的書法,寫了真神阿拉、穆罕默德等文字。一個教堂融合多個宗教好難得,但又因為有不同宗教的東西,而家主要成為博物館多於被參拜的聖地。


博斯普魯斯海峽

土耳其地理位置特別,同時擁有歐洲同亞洲的土地,歐亞之間隔左一個博斯普魯斯海峽。平時都好少會去遊船,感覺好遊客,但今次黎到伊斯坦堡,又真係好想身處呢個特別的海峽,從海的角度一次過睇曬歐亞兩地。船程大約一個鐘,在舊城區艾米諾努碼頭上船出發。


從船上可以從遠少少的角度見到曬歐亞兩邊的風景,歐洲區個邊比較多古蹟同特別建築,大型的清真寺同皇宮都係呢邊,而亞洲個邊其實冇咩睇,淨係見到好多屋。呢個係新城區的加拉達塔,興建的時候作用是燈塔,後來作為消防塔,而家就變成觀光塔,是世界文化遺產。

呢個係杜馬伯爵水晶皇宮,19世紀中期蘇丹王下令興建,後尾我有入去參觀,入面的大型水晶吊燈超級華麗,成個皇宮大大小小的水晶燈有成750個,好豪華!不過室內唔可以影相,要大家自己去參觀啦。


航程途中會經過博斯普魯斯橋,一條連接歐亞兩邊的橋。


仲有少女塔呀,哈,是我的塔。以前係海關,而家變左餐廳,都係伊斯坦堡地標之一。


遊船之後推介大家去碼頭附近食野,好多餐廳都係望住個海,氣氛悠閒,風景又靚,同埋烤魚幾好食。

塔克西姆廣場

新城區最著名的地方係塔克西姆廣場,廣場上有個紀念碑,建於1928年,紀念土耳其共和國的成立。廣場都係當地人集會遊行的地方同埋當有國家比賽羸左都係係呢度慶祝,係個地位好高的廣場。而廣場連接一條好長的步行街叫獨立大街,兩邊有好多店舖,而且都係新派的連鎖店同國際品牌,即係大家都熟悉的牌子,唔係賣地道手信個種店,所以係行街的地方,仲有街頭表演,非常熱鬧。呢一帶同舊城區氣氛都幾唔同,充滿國際品牌酒店同高級餐廳,想感受伊斯坦堡新潮的一面就要來獨立大街啦。

有頂大市集

如果想買手信,可以去舊城區的有頂大市集,呢個市集有成500幾年歷史,係世界上最大同最古老市集之一。呢度有成4000幾間舖,貨品種類超級多,亦有好多個出入口。基本上大部份街上見到的手信呢度都有得買,除非係好特別的hand made東西就未必有啦。大市集大部份東西都可以講價,一般都減到幾十蚊,同埋好多間舖都賣緊相似東西,好多選擇,可以行多幾間先買。近年旅行我都好少好少買野,但今次黎到土耳其真係算買好多,因為呢度的民族野太靚啦,又唔係周圍都有,而且都好平啊。在大市集買手信,可以用美金、歐羅或者土耳其貨幣里拉(Lira)。以下都是我的心水推介。


燈 - 簡直係藝術品,每次經過賣燈的舖頭都一定要停低睇下,實在太靚啦,放埋一齊好壯觀,teamlab都冇咁靚呀哈哈。如果覺得買吊燈可能有點誇張,屋企未必適合放,可以考慮買細細盞檯燈,最平港幣百幾蚊已經有啦。


地氈 - 都係藝術品,人手織的話一塊需時由幾星期到兩年都有,視乎材料、密度、大小,全絲就最貴,羊毛比較平。不過一般都要幾千至幾十萬!!冇錯,係屬於有錢人的東西。唔追求人手織,機器都OK純粹鍾意花紋的話,都係百幾蚊就有喇。


陶瓷 - 碗碗碟碟、杯、食具、首飾盒、花樽、燭台、杯墊......土耳其好多好多野都係陶瓷造,好彩色,揀要邊種花紋都有排揀。好平,十零蚊起跳,我都買左幾個細碗。


圍巾、散紙包、化妝袋 - 少女們買手信之選,全部都係民族花紋,散紙包個種小袋子最平只係幾蚊,可以大手買入!!袋大少少就貴少少,但都係好平,圍巾就一條二十蚊左右。我買左好多個,哈哈。


藍眼飾品 - 土耳其獨有的紀念品,藍眼睛對土耳其人來說有僻邪同保護的作用,所以周圍都可以見到大量藍眼造的飾物、鎖匙扣、吊飾等,當地人仲會送藍眼飾品俾朋友,有祝福的意思。


土耳其軟糖 - 睇個樣已經覺得好特別,口感好豐富因為糖入面加左好多花生、堅果。有好多唔同口味,多數係水果味。我覺得玫瑰味幾好食,但大部份人的評價都係太甜。土耳其人會配茶食,就可以中和一下甜味。間間舖都可以試食,通常成條買,價錢按重量計算,大半條好似都要百幾蚊,切到十幾粒。


香料 - 我自己就冇買,純粹覺得望住五顏六色的香料好治癒,但有煮開野食可以考慮買呀,好多選擇。


今次在伊斯坦堡只留了兩日一夜,雖然都夠時間去曬上面的景點,不過都建議大家留多一、兩日,再發掘下其他地方,特別係舊城區仲有好多建築物都好靚好想去參觀啊。下一篇就會向土耳其其他城市出發啦。

留言


請按此登錄後留言。未成為會員? 立即註冊
    快捷鍵:←
    快捷鍵:→