[大阪食食食] 屬於大阪的地道市場 黑門市場三大必食之選

少女旅行日記 於 01/12/2014 發表 收藏文章
街市不嬲都係一個好易被遺忘但其實又最多好野食的地方!好似香港,其實好多街市的熟食中心都有好多好地道的美味菜式,不過遊客就真係好少會知道啦。所以去旅行識食一定要去人地既街市,就可以搵到最新鮮最好味既地道野食啦!大阪的黑門市場就係其中一個收埋好多好野食的街市!



日本出名乾淨,連街市都唔例外,完全唔會有濕漉漉既地下或者無啦啦見到地下有條菜。哈哈,所以逛得非常舒服。呢個市場真係應有盡有,大約170間舖包括海鮮、刺身、生果、零食、花店、雜貨店。仲有好多熟食例如天婦羅、關東煮、拉麵、串燒、炸雞等等。無論係想食野、買新鮮食材定手信都全部可以滿足得到。








呢度真係太多選擇,花多眼亂,所以今次精選左3樣必食推介俾大家。
 
(一)前菜:海鮮串燒

呢檔海鮮串燒好多人排隊,本身都有賣海鮮,不過似乎冇人理佢地賣既海鮮,個個都係食串燒。哈哈,一定要試燒帆立貝串,超新鮮,醬汁好惹味,係食完想再食的高質素。價錢:350YEN 一串,有4粒。



(二)主菜:壽司+魚生飯

呢間係堂食的,試左幾款壽司同一個三文魚魚生飯,全部都好好食,魚生好新鮮。價錢忘記了,但不貴的。壽司師傳超親切,主動話要幫我地影相添。





(三)甜品:草莓麻糬

最念念不忘之選。麻糬勁大粒,皮的厚度適中,好煙韌,入面粒士多啤梨好甜好好食!有幾隻口味,臨走前忍唔住返轉頭再買多幾粒。價錢:195YEN一粒



其實一路行都仲有好多野想食,特別係好多魚生超吸引的!不過去個日又唔太肚餓所以好多野都冇試到,下次一定會留定個肚去食餐勁!每間舖頭的營業時間不一樣,多數都係黃昏前就收檔,建議中午去當食lunch就岩啦。

地址:大阪市中央區日本橋2-4-1
交通:地鐵日本橋站10號出口行5分鐘
網址:http://www.kuromon.com/

留言


請按此登錄後留言。未成為會員? 立即註冊
    快捷鍵:←
    快捷鍵:→