[大阪食食食] 心齋橋人氣之選 美國直送啖啖肉龍蝦三文治 Luke's Lobster

少女旅行日記 於 15/12/2016 發表 收藏文章
心齋橋應該係個個去大阪都一定會行的購物街啦,每次去都多人過行年宵,不過又真係幾多野行既,仲好多好野食添!今次要介紹來自美國的人氣龍蝦三文治Luke's Lobster,大阪分店就在心齋橋啦,位置大概在心齋橋後半段,GUCCI對面。


間店都幾受歡迎,間中要排隊,我去個時係朝早大約11點半,只係排左5分鐘,但有次夜晚8點經過見到條隊排到出門口,大約30人,大家有心理準備啦。間舖唔大,可以好清楚睇到職員整三文治的過程,都有少少位俾大家企係店內食,大約企到5個人啦。


呢個就係menu,主要就係得3種三文治,分別係龍蝦、蟹同埋蝦,可以揀雙拼。加400yen變套餐有飲品同一包薯片。龍蝦係主打,有兩種size可以揀,US size比regular size大,價錢貴600yen。


呢個就係US size的龍蝦三文治啦!所有龍蝦肉都係由美國新鮮直送到日本,好鮮甜,啖啖肉好好食!!!個包加左牛油烘過,職員會先將龍蝦肉放在包上,加醬汁,最後灑黑椒同鹽。醬汁係由檸檬、牛油同糖混合而成,其實食落個醬汁唔係太濃,但加埋黑椒同鹽就好香好惹味啦!


Regular size大約細1/3,影出黎好似差唔多,但其實龍蝦肉細舊同少d。我個人推介食US size,因為龍蝦肉真係太好味啦,大大舊食開心好多,regular size滿足唔到我呀。提提大家,包係熱,但龍蝦肉係凍架。其實US size都幾貴,1580yen,7算的話都要港幣$110,但覺得都接受到,因為真係好好食麻。

見到其他人買雙拼,應該係龍蝦加蝦。下次再試下蟹同蝦先~東京表參道都有分店架,不過最正應該係飛去紐約食總店,哈哈。


Luke's Lobster

地址:大阪市中央區心齋橋筋1-3-21 1F
交通:地下鐵心齋橋站4號出口行3分鐘
營業時間:每日11:00-21:00

留言


請按此登錄後留言。未成為會員? 立即註冊
    快捷鍵:←
    快捷鍵:→