如果看著我不妨濛一點

有日在台北一間餐廳的雜誌架，見到有本用香港的封面的台灣雜誌，忽然想知道究竟台灣人眼中的香港係點樣，所以就打開本雜誌睇下。雜誌用專題形式介紹香港，接近20頁紙，大部份係訪問左一堆在各行各業比較出名的香港人，講下對香港的睇法。呢部份我冇興趣，我日日都睇住香港人講香港架啦，我係想睇台灣人點睇香港呀。

唔睇訪問，專題個開場白應該係由台灣人寫的，我睇左一次，覺得有點怪，於是再睇多次，我忽然明白個奇怪位係咩。台灣人筆下的香港，好靚，靚到根本唔係我熟悉的香港。印象最深刻係講香港的密集式招牌同大廈，作者覺得好有詩意。我心諗香港人每日對住極度密集的環境就黎窒息死，你同我講覺得好有詩意？請問首詩係乜詩？係咪d詩人就黎死個時寫個種絕命詩？曾經有台灣朋友黎香港，我例牌帶佢地去山頂，去到中環佢地不停話「嘩！好高呀！大廈好高好美！台灣都沒那麼多高樓大廈，香港好厲害！」我又心諗：有咩咁厲害啫，我地就黎天空都睇唔到，想搵個位抖下氣都block死曬，我地香港人灰到嘔，你班台灣人就覺得好得意。
但諗深一層，佢地又冇講錯。因為我地每個人對世界總係充滿誤會。只要你唔係長居一個地方，你多數只會睇到佢好的一面。我都覺得台灣好好架，藝文青天堂／慢活小世界／香港人後花園／台灣最美的風景是人／民主社會／奮力對抗大陸化，讚美的話長講長有，咩都好啦，但住左台灣一個月，聽好多台灣人講對政府的不滿，佢地覺得蔡總統好鍾意勞師動眾推新政策，但新政策又對民生冇乜益處，唔搞好過搞只係搵著大家黎搞個種呢。又有好多人好鍾意去日本旅行，又乾淨風景又靚野又好食日本人又有禮貌，但如果去做野生活，就知道佢地階級觀念極重，職場上男女地位非常不平等，升職總是男人優先，表面開放內裡保守又傳統，比較之下香港老闆屎忽得黎都算隨和，男女工作機會都算相等。韓國都係類似，BigBang呀孔劉呀oppa呀好潮好型仲有隱世極邪惡芝士拉絲部隊鍋添！但一個失業率高同自殺率高的地方可以有幾潮有幾型？韓國人生活壓力大到爆炸，好多人都話韓國只係有包裝的大陸，都真係好中肯。
講起上黎，作為一個過客，我覺得台灣日本韓國都各有各詩意，真係好浪漫好正，空降幾日遊樂人間飲飲食食最開心，走個陣不帶走一片雲彩。從來蜻蜓點水式的遠距離相交都係夢幻又美好，近睇就千瘡百孔，我地都係無謂太熟，免得你失望。旅行只係典型的我睇你好，你睇我好，其實大家都唔多好。

話香港好有詩意的台灣人又點會知，而家香港人慘到連薯片叔叔都要讚好。香港人已經冇底線架喇，香港靚唔靚？從飛機上睇都唔錯架，夜景閃閃發光，好似班高官咁離地睇就最正。