[岡山景點] 日本晴天之國 岡山玩樂與購物景點 溫泉旅館推介

少女旅行日記 於 11/02/2018 發表 收藏文章
上一篇介紹鳥取,如果仲想一次過玩埋附近的縣,我會推介岡山,坐JR約兩個鐘。香港航空都有直航去岡山,所以可以烏取入,岡山走,唔駛再返轉頭,好方便。而岡山離廣島、大阪都好近,去大阪約一個鐘JR咋,都可以安排同一個行程去。岡山有晴天之國的稱號,因為少落雨,一年超過250日係晴天,氣候宜人,適合生果種植,水蜜桃、梨同提子都好出名!


西日本最大AEON MALL

去岡山想購物,基本上去JR岡山站一出旁邊的AEON已經好好逛,因為這是西日本最大間的AEON MALL,有7層,其中6-7樓有好多餐廳,5樓仲有戲院。以前以為AEON MALL主要賣生活雜貨同少量不太潮的服飾,但原來不是的,超級多少女們愛逛的服飾品牌,日本和外國的著名品牌都有,底層當然少不了好大的超市,整座商場可以逛幾個鐘,幾乎什麼都有賣,商場營業到晚上10點,可以慢慢逛。想知道有咩牌子,可以上官網睇睇:http://www.aeon.jp/aeon/okayama/


賞紅葉必到閑谷學校

岡山都有賞楓景點,閑谷學校是一間擁有超過300年歷史的學校,既是日本第一間及最古老的庶民學校,又是首座日本遺產,極具歷史價值!學校用了30年時間興建,以前只有武士軍人的後代先可以讀書,閑谷學校的創立就是為一般平民百姓而設,希望所有人都有機會返學讀書,意義重大。雖然是平民學校,但建築仍然講究,講堂的屋頂全是用日本傳統的陶器「備前燒」砌成,比一般陶瓷更堅固。室內的木地板即使經過300年都仲好光鮮,用料絕不馬虎。


秋天的閑谷學校特別靚,穿過校門就見到兩棵好大的楷樹已經變左紅色同黃色,呢兩棵樹由山東省的孔子林移植過來的,好壯觀!門外仲有很多很多楓葉樹,顏色有層次,非常美!


地址:岡山縣備前市閑谷784
網頁:http://shizutani.jp/traditional-chinese/

日本最大招財貓美術館

有冇諗過原來招財貓都有博物館?岡山就有一間展出超過700個不同的招財貓擺設的美術館,是日本最大的!樓高兩層的美術館收集了來自世界各地,用不同物料製造的招財貓,有好多都非常可愛。原來招財貓舉起左手是招人緣,舉右手是招財,舉起兩件隻手是招幸運,現在才知道呢。除了觀賞招財貓擺設,仲可以參加繪畫招財貓擺設的體驗活動,設計一隻獨一無二屬於你自己的幸運招財貓!離美術館大約一分鐘步程的Lucky Cats House就是畫招財貓擺設的地方。


美術館外仲有個迷你神社,可以祈求姻緣!我有冇求?梗係有啦哈哈哈,可以去搵下我張祈願卡......


地址:岡山縣岡山市北區金山寺865-1
網頁:www.manekineko-m.jp

心曠神怡蒜山高原

蒜山高原是西日本的著名度假地區,風景優美,仲有好多野可以玩!今次我去左騎馬同踩單車,第一次騎馬呀!少女心諗如果馬仔可以行快少少我會開心d......(進取型)而馬仔心諗:呢個肥妹好重,可唔可以快d落返黎......(動物傳心師)


高原空氣非常好,整個環境令人心曠神怡,呢度仲有牧場、香草園、遊樂場等等,可以玩一整日。不同季節有不同風景,冬天可以滑雪。呢度出產的牛奶好好飲,其他奶製品都好吸引!仲可以試試蒜山炒麵,味道都唔錯。


地址:岡山縣真庭市蒜山上福田
網頁:http://www.hiruzen.info/

美作三湯之一湯鄉溫泉

山縣北部美作溫泉聞名全日本,有「美人湯」之稱,湯原、奧津、湯鄉呢三個溫泉更被譽為「美作三湯」。其中湯鄉溫泉有千年以上的歷史,泉水有美膚功效,浸完皮膚好滑,少女必浸!今次就推介湯鄉Grand Hotel溫泉旅館,房是日式榻榻米房,空間好大!房間提供的免費浴衣都好靚,好想帶走呀!!!但當然是不可以啦。露天溫泉池可以一路浸一路睇星星,環境不錯。一泊二食的晚餐好豐富,食物質素高,推介入住!(溫泉相片來自r.hankyu-travel)


地址:岡山縣美作市湯郷581-2
官網:http://www.yunogo.co.jp/

希望可以再去岡山,今次時間不夠,我仲好想去岡山的倉敷啊!

留言


請按此登錄後留言。未成為會員? 立即註冊
    快捷鍵:←
    快捷鍵:→