[峴港住宿] 超抵住酒店 每日包免費spa 強烈推薦Sanouva Hotel

少女旅行日記 於 09/08/2015 發表 收藏文章
峴港之旅的遊記打頭陣是酒店推介,今次旅程住過兩間,一間係以下要介紹的,另一間係下次介紹的別墅式酒店,兩間我都好滿意啊!!今次介紹的係3星級價錢但有4星級享受的Sanouva Hotel,非常推介大家黎峴港住呢間酒店!


峴港好細,酒店都算位於市中心,去其他地方都唔會太遠。酒店附近都幾多野食,主要聚集在酒店右邊行大約5-10分鐘就有好多街邊檔、cafe同餐廳。離機場大概20分鐘的士車程。


Sanouva Hotel好新,2014年先開幕。大堂的設計走古典風,都幾靚。Front Desk做野有點慢,但其實成個越南都係好慢好慢......香港人係會好易等到燥。


上房喇!大家唔好俾我地間房嚇親,我地今次係住4人房-Executive Room,訂個時其實冇概念有幾大,酒店網既相都冇乜特別,見佢平平地就訂左,去到開門個下先發現原來間房係勁大!!有客廳、飯廳、開放式廚房、兩間雙人房、每間雙人房有獨立浴室,所有基本設施都齊!成間房大過我屋企,好開心啊~~客廳同飯廳就係我地夜晚食宵夜同玩啤牌既好地方喇!!至於景觀係對面樓景,唔會太靚,不過冇人care。哈哈。


兩間房其中一間係兩張單人床,一間係雙人床,張雙人床好似唔係一般雙人床,唔知實質尺寸,但感覺比King Size還要大,而且好舒服!房都夠大,電視、梳妝枱、小梳化、衣櫃全部都有。

特別一讚係浴室,超大!特別係淋浴間好空曠,真係好少見到酒店既淋浴間甘大,通常都係夠你轉下身咋麻,呢度大到簡直可以跳舞!仲係雲石質料,好似好高級。盥洗用品都一應俱全。總括黎講房都乾淨。不過大家記住呢間係4人房先甘正,我入過2人房睇係正常3/4星酒店的格局,都OK但唔係好特別。


最重點黎啦!就係房價包左每人每日有半個鐘頭免費spa。Spa中心在4樓,地方唔大,不過環境都舒適,而且reception個姐姐笑容好親切同埋好盡力同大家介紹佢地既spa選擇。每日入到去都會有人送上毛巾同茶俾你relax下先再想做既spa。(Spa中心相都用電話影唔係甘靚不好意思啊~)


免費的半個鐘可以揀menu上價值200000盾的treatment,貴過200000就補差價。如果唔想補,基本上就只可以揀上半身或者下半身的按摩,其他都要加錢架喇。但其實加錢都係勁勁勁平。加幾十蚊到百幾蚊已經可以由半個鐘加到做兩個鐘甘濟,加得多仲可以叫reception姐姐送多少少其他treatment俾你添!可能係送修甲或者免費焗桑拿。其實呢度spa選擇唔算多,都以按摩、facial同修甲為主,冇浸浴同敷海底泥/海鹽/芝麻之類個d令身體皮膚滑d既treatment做。但以價錢黎講就真係好抵,如果對spa冇特別要求,每日免費做半個鐘都已經好滿足!


Spa房環境都幾舒服,會播輕柔音樂。可以同朋友兩個人一齊做或者去單人房都得。按摩姐姐的手勢都不錯。住左3晚即係做左3日spa,其實除左第一日諗住試下質素先之外,其餘兩日都忍唔住加左錢做耐d,因為真係好抵做又好舒服!!


最後講一講個早餐啦。嗯,一般啦。食物選擇唔多,味道都一般,不過每日會有少少唔同,都可以揀下。比較好食係有個煎蛋同煮麵corner,即叫即整,唔錯。另外,酒店設施唔多,spa中心之外仲有個gym room同business center,大堂有兩部電腦可以用,一間餐廳,冇泳池。硬件上可能爭少少令佢係3星酒店,但整體感覺很不錯,有4星質素。


至於大家最關心的房價,4人房連早餐連免費spa每晚$1000左右,即係每人先$250!!呢個價可以住到甘大甘靚既房仲有spa做真係好抵!!如果2人房連早餐連免費spa大概係$400,所以除返一個人平少少係$200。係咪好推介先?約夠4個人齊齊黎峴港玩啦!下篇介紹既別墅住宿仲正啊~

Sanouva Danang Hotel
地址:68 Phan Chau Trinh Street , Hai Chau District, Danang
交通:機場轉的士約20分鐘
房價:二人房$400/晚 ;四人房約$1000/晚 (價錢已包早餐及半個鐘spa)
網址:http://www.sanouvadanang.com/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→