[德國景點] Dachau達豪集中營 關於那些永不磨滅的黑暗歲月

少女旅行日記 於 29/12/2015 發表 收藏文章
從慕尼黑出發大約一個鐘左右車程就去到近郊的達豪集中營遺址,係納粹德國所建立的第一個集中營,後來其他集中營都參照達豪集中營的設計而建設。對集中營的印象一直停留在西史課本的簡單描述同電影<<一個快樂的傳說>>,今次去到遺址深入了解當時的黑暗歷史。


達豪集中營共關押過21萬人,其中3.2萬人死亡。當年好多人一入左呢個門口,就永遠都出唔返去。


一入到去係一大片空地,當時人集隊、點人數同受刑的地方。被收押人數眾多,所以每次點人數都點好耐好耐,有時烈日當空;有時地寒地凍,對當時既人黎講集隊都係一種折磨。

門口右邊一排以前是管理囚犯的地方,而家已經改建成博物館,詳細講述集中營的歷史。入面有好多好多資料,文字、地圖、相片、當時生活物品、刑具,將當時集中營的悲慘生活完完全全展示出黎。每日不停勞動,食又食唔飽,隨時捱打受刑,最後送去毒氣室,或者做人體實驗。


呢度展示左佢地入營時身上帶的物品,好多都係家庭照......好多人入左黎就永遠同家人分開,見到呢d勁sad。


博物館對面一排以前係牢房,就係囚犯住的地方。而家都保留左當時的格局,佢地就係訓呢度,一格要訓幾個人,好擠迫。


呢個係佢地洗面清潔的地方同公用廁所,環境好惡劣,都毫無尊嚴可言。


集中營四周被電網同壕溝包圍,瞭望台上有警衛駐守,根本冇可能從呢個地獄逃脫,好絕望。


呢大個部份以前都係牢房,而家拆曬。集中營仲有展示毒氣室,但我不想影啦,感覺太可怕了。


整個集中營的氣氛可以話非常詭異,表面上好寧靜平和,又好空曠,我去個日仲要天氣好好,但當你睇到入面的故事,知道同一個位置曾經發生過好多好可怕的事,同當下眼見和諧環境有極大反差,心情會好沈重。佢唔係個種好靚好新的博物館,當你企係牢房入面,見到剝落的牆壁,殘舊的環境,都是活生生的歷史痕跡,真係會有好大壓迫感。


站在世界和平呢種大議題前,我地好渺小亦好無能為力,好似恐怖襲擊我地除了恐懼同祝福,似乎冇咩可以做到。但至少我地要去了解多點,同時關愛社會上的人多點,將愛與和平的訊息傳揚開去。一個人點解會有想傷害他人的心,大概係因為佢本身都受左好多委屈同缺乏關愛,太遙遠的我們無法控制,也可以從身邊開始吧。


達豪集中營 (Dachau Concerntration Camp memorial site)

地址:Alte Römerstraße 75, D – 85221 Dachau
交通:地鐵Dachau站落車,再轉726號巴士在KZ-Gedenkstatte站落車
開放時間:星期一至日 09:00-17:00 (12月24日唔開)

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→