搵份好工難定搵個好男朋友難？

答案係一樣難。搵工同搵男朋友本質上其實有好多相似之處。
搵工同搵男朋友的開始都一樣令人迷茫，當你遊走於各大搵工網同交友app，看似好多選擇，但當你根據自己的背景同要求篩走左一堆行業同一堆年齡層之後，選擇已經大大減少。之後仲要考慮職級、人工、工作地點、公司規模、工作職責、周圍八下間公司會唔會OT好勁、裡面多唔多小人......揀約會對象都不相伯仲，樣貌、身高、性格、喜好......合乎心意的所剩無幾，終於左揀右揀你肯apply人地又唔一定會in你，你俾心心人地又唔一定會睇得上你。個種感覺就好似你睇中左一對鞋，掙扎買咩色諗下襯邊件衫覺得有少少貴唔係好捨得不過又真係幾鍾意想買又唔想買好啦終於決定買，Sorry，根本冇你碼，都唔知你諗咁耐做乜。

千揀萬揀後再加運氣之神的加持，終於有回音，但下一步又係一場苦戰。我地揀工揀男朋友都會講條件，而同時你都要睇睇你本人的條件。想擁有一份好工同一個好男人，首先你本人都要有相當程度的吸引力，學歷高、語文能力高、多技能、往績亮麗、態度誠懇、表達流利、轉數快......搵到好工的機會大增。為人開朗、溫柔體貼、細心獨立、不計較、不老奉、不貪慕虛榮......自然比較girlfriendable。出身你控制不到，樣貌亦然（假設你祟尚自然），但人生往後好多野都仍然由你自己一手建立，性格、興趣、學識、能力、態度，全部都影響你搵工同搵男朋友。
但凡事都總有例外，有時你唔明點解老細會請一個比你更廢的人做你阿姐，你又唔知點解超級靚仔的女伴係個樣貌極平凡又大脾氣的女子。可能純粹個期公司極等人用垃圾都照要，又或者廢阿姐有熟人介紹贏在relationship。而極平凡女子其實身懷可以俘虜男神的絕技，又或者男神就係對大脾氣的女子情有獨鍾有怪癖你估佢唔到。見工同約會都牽涉到另一個人的選擇，而人的品味總係千奇百趣，所以如果問要唔要試下申請一份睇落好高要求的工，同主動接近一個睇落好受歡迎的男人，答案永遠都係你試左先啦。唔試就一定唔得，試左可能或者有機會得，係真理。

有時我地見完一份工，或者同心儀仔仔相處了好一陣子，都自我感覺良好，覺得得米機會甚大，但最後結果慘不忍睹，音訊全無。我地都曾經為得唔到想要的工同人而失望同難過，明明覺得自己有實力之餘臨場表現都唔錯，然後不停諗究竟自己有咩做得唔夠。IN唔成一份工，可以係因為有比你更強勁的對手、老細睇你唔順眼、佢同你星座唔夾、個headcount突然冇左、唔急住請人拖拖下唔記得左你、公司內部有其他人更適合、你想要的人工太高而間公司又太孤寒......追唔到人就可以因為人地有忘不了的舊情人、你遲左一步俾人捷足先登、佢太多選擇揀唔到、佢冇選擇但有心理陰影唔想拍拖......千萬個原因，太多太多可能性，再荒謬的原因都聽過，但一句到尾就係你地冇緣。
你揀工，工又揀返你，你揀人，人又揀返你，IN唔成一份工唔一定係你唔夠叻，追唔到一個人都唔一定係你唔夠好，其實一切都不過係緣份。做好自己，走寶的就係間公司同個男人，更適合的永遠在前面。如果反省過，真係自己有不足，就好好改善，為下一份工或者下一個他做好準備。

每份工同每個男人都係獨一無二，人地覺得好正的工可能請你你都唔恨做，人地覺得毫無吸引力的男人你又可能搵到佢可愛之處。唔會有一份工唔辛苦又高人工同事好老細又正學到野升得快返工地點近有津貼假期多仲準時放工。如果真係有都輪唔到你做。一個男人靚仔高大有型咩都識又溫柔專一好陽光有才華毫無缺點重點竟然係單身，我話有你都會問我訓醒未啦。無論搵工定搵男朋友，都係一個非常漫長又艱難的過程，兜兜轉轉多番掙扎，搵到最後你會發現，呢個世界並沒有所謂絕世荀工，亦沒有絕世荀盤，只有經過一番取捨之後，搵到你自己心目中的最好。職場與情場，同樣是戰場，裝備好自己再迎戰，失敗就再接再厲，過去的都當係經驗，最終總會搵到你的歸宿。