[法國景點] 人生必遊千年古蹟 聖米歇爾山 被海包圍的世界文化遺產

少女旅行日記 於 21/06/2018 發表 收藏文章
法國之旅最最最令人期待的景點不在巴黎裡面,而係離巴黎有一段距離,位於諾曼第地區的聖米歇爾山。呢個擁有過千年歷史的山上修道院係世界文化遺產,亦係天主教重要的朝聖地。佢有個特別之處,就係俾海灣包圍,潮漲時會將陸地淹沒,山城就好似海中心有座遺世獨立的城堡咁,非常壯觀。但一般都要黃昏過後先有機會見到呢個奇景,下午潮退時就會見到四周一片泥濘,呢個就係上山參觀修道院的好時間。


今次我係參加Klook一日團,因為由巴黎市中心去聖米歇爾山真係幾遠,要搭火車再轉巴士,淨係車程都最少3個鐘。而參加一日團就會一程巴士直達,在羅浮宮附近上落車,方便好多。一日團除左包左交通,仲會包埋價值10歐的修道院入場券同耳機聲音導航,有多種語言揀,一邊參觀一邊聽解說,就會對聖米歇爾山的歷史了解更多。火車價格浮動,我去個日就淨來回車費已經過千二,仲未包入場費,所以一日團的價錢比自己搭車更抵。一日團詳情:http://goo.gl/DTXgbe


朝早上車,大約12點就到達聖米歇爾山附近一個停車場,呢個係最近修道院的一個停車位。所有人都要係呢度落車再轉坐一架免費接駁巴士去到山腳,車程大約10分鐘就到。走都一樣係坐接駁車返到停車場。另外可以選擇坐馬車!不過我覺得路程好短,四周又冇咩特別風景要睇,唔太需要坐馬車。

離遠見到聖米歇爾山已經覺得好震撼,好似哈利波特的城堡!好宏偉!天氣仲好好,非常開心。入城唔需要入場費,係去到最頂層的修道院先要。慢慢攀上修道院的路,沿途都係古老的石牆,有時光倒流的感覺。首先會經過Grande Rue大街,兩旁係一堆賣手信的店同餐廳。自由參觀時間有近4個鐘,食埋個午餐再慢慢參觀都足夠。


山城分三層,修道院在最頂,第二層有小教堂、歷史博物館等,部份免費入場。


上到最頂就入修道院啦。裡面分好多部份,揉合羅馬式的拱型建築和哥德式設計。可以聽住耳機聲音導航介紹每個部份。主要有教堂、騎士廳、食堂、貴賓廳、地下小教堂、禮拜堂等等。


個人最喜愛係呢個哥德式的迴廊花園,好優雅的環境。


修道院有一段時間曾經當作監獄使用,呢個轉輪就係用黎運送犯人食物,1820年建造,有非常長久歷史。


山上好多角度都可以觀賞一望無際的海灣,但因為係潮退時間,又唔完全係海景,不過風景還是很不錯。有d團會帶人行呢個海灣,唔建議自己行,因為有好多流沙,而且一到潮漲就會更危險,水深最高可以有14米,所以建議跟都係跟專業教練行。


參觀修道院的路線指示好清晰,唔會行漏,最尾去到紀念品店,用兩歐買左呢張印有聖米歇爾山的歐羅紙幣留念,好靚!大約4點就回程返巴黎市中心。如果唔跟團,仲可以考慮住一晚,不過住宿唔平架。


聖米歇爾山真係好夢幻,成為今個法國之旅少女最喜歡的景點,強烈推介大家去!!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→