[深圳] 2日1夜小旅行 逸塔花園+喜茶+潤園四季椰子雞 全球首間無印酒店住宿報告

少女旅行日記 於 06/08/2018 發表 收藏文章
近來深圳成為大家周末小旅行的熱門地區,話說我都好多年冇去過深圳,對上一次已經係差唔多10年前去世界之窗玩過一日!哈哈,真係好耐好耐,所以今次再黎都幾驚喜,因為深圳真係比以前多左好多新野,環境都靚左好多,而當然消費都高左好多。今次兩日一夜之旅,去左幾間人氣好高的食店,仲住左全球第一間無印良品酒店 Muji Hotel,整體感覺都好唔錯,詳細同大家分享一下。


今次由落馬洲過關,首先第一站係好多人打卡的cafe逸塔花園。叫得做花園,cafe佈置主題就係花花草草,門口有花牆,又見到一個放滿盆栽的櫃。不過門口一入去整個座位區域都唔係cafe最靚的部份,雖然呢個地帶都好寬敞,樓底又高,坐得好舒服,但最推介係要行入去見到近窗個排座位,再轉右行到最入,先係真正的花園!好隱蔽。


呢度就係成間cafe最清新的位置啦!勁大幅盆栽牆,好靚!其他設計以白色為主,仲有吊椅,悠閒風十足。可以的話會建議大家坐呢邊,不過大家都衝住呢個環境而黎,可能要等等位啦。


大家係咪以為逸塔花園似係食西餐呢?其實係食泰菜架,都幾驚喜!計埋匯率價錢都幾貼近香港,每人大約食左一百蚊。叫左5樣野食,泰式小食拼盤、紅咖哩牛、三巴茜茄子都幾好食,俾我地清曬。但另外個冬蔭功蝦炒意粉就太咸,生菜豬肉包就發現中間有D肉碎未煮熟,我地取消左。


飲品呢3杯都係加左卡士乳酪的果汁,好好飲呀!!!卡士乳酪係大陸牌子,超市有得買,我都好鍾意食呢隻乳酪,仲買左D返香港,所以加落飲品都好正。我個杯係粉紅色加左士多啤梨,朋友一杯係黃色芒果加菠蘿,一杯粉綠色係牛油果加士多啤梨,佢地都話好飲。如果大家對野食唔係太有興趣,可以過黎飲野或者食甜品。其實呢間cafe都係食環境多。


Cafe仲有間書店,可以一路飲野一路睇書,文青可以揀個邊坐,環境都幾舒服同安靜架。


逸塔花園
地址:南山區金雞路田廈翡翠明珠七巧國2樓(KFC旁)
交通:地鐵桃園站B出口行10分鐘

之後呢就梗係要試試聲名大噪的喜茶啦。一講起深圳,大家都會問有冇飲喜茶呀?真係好強勁。咁難得黎到,就當然要試啦,仲唔只試一次,我連續兩日都有飲。而家有好多分店,基本上熱門的區或大商場都大機會見到喜茶。第一日我係歡樂海岸分店飲,第二日就係Muji Hotel連住的深業上城商場飲,兩間裝修完全唔同Style,一間木色,一間白色,共通點係都走簡約路線,亦有室外、室內位,同埋等好耐。買就唔駛點等,但等佢沖係要等大約45分鐘!!!好誇張!不過好彩係兩間分店附近都有大商場,可以行住等,唔想行都仲可以坐係裡面等,唔駛係度企街都算唔錯啦。香港好多飲品店都係要企街等架。


喜茶最出名係佢地個芝士奶蓋,的確好滑好香,但如果就咁飲一啖奶蓋會覺得太濃味,所以茶就係精髓,兩者加埋一齊飲係非常配合,好好飲!茶有幾種可以揀,金鳳茶王最重茶味,推介,而四季春就淡少少。


另外仲試左當季水果限定系列的芝芝莓莓,個名好得意,係士多啤梨沙冰加上面一層芝士奶蓋,都好好飲!!聽落芝士同士多啤梨好似唔太match,但本身杯沙冰好fresh好好飲,個奶蓋就變左係令口感豐富一點,冇搶到味,反而係幾好的點綴。另外仲有水果茶、珍珠奶茶個D,仲有甜品添。飲品價錢大約人民幣20-35,可以上佢地官網睇分店地址:LINK


晚餐時間!聽講深圳打邊爐好正,但我就唔係好食得辣,所以就揀左食好清甜的椰子雞煲!潤園四季椰子雞係連鎖店,有幾間分店,今次就食歡樂海岸分店。等位的人非常多,話要等兩個鐘!!!所以拎左飛之後就去左行街同喜茶,最後好似成兩個半鐘先到我地。建議大家好早好早去拎飛。其實呢間分店係好大,好多位,有室外室內,但都要等咁耐,可想而知幾多人想食。


主打係竹笙椰子雞鍋,人民幣149一隻雞,會先上椰子湯底,再倒一碟雞加竹笙,大約6分鐘就可以食啦,仲提供埋漏斗計時。個湯底非常非常清甜,好好飲,飲左幾碗!!雞都好食,雖然唔係件件都好滑好多肉,但味道係唔錯既,夠新鮮,份量都多。


另外仲叫左雪花牛、貢丸、菜、粟米同響鈴,質素又幾高喎,樣樣都好食。最後埋單3個人大約人民幣450,都算係合理價錢。下次黎都會想再食,值得推介俾大家。


潤園四季椰子雞(歡樂海岸分店)
地址:白石路東8號歡樂海岸曲水灣5棟2層
交通:地鐵深圳灣公園站E出口行10分鐘

食飽曬就去酒店check in,無印大家去得多,酒店又住過未呢?深圳呢間係全球第一間無印良品酒店,今年一月先開,所以好新淨!暫時得官網有得訂房,其他訂房平台都未有。如果你本身好鍾意無印個種簡約自然風格,你都會鍾意Muji Hotel,因為真係同一種設計概念,同行入無印店舖的感覺非常相似。酒店連住大型商場深業上城,位置同地鐵站有點距離,建議搭的士。


酒店只有6層,Check in Counter係商場的2樓,同層仲有餐廳,早、午、晚餐之外仲有可以當酒吧飲返杯。3樓係Gym Room、小型圖書館、會議室。4-6樓就係客房,分Type A-E,我今次住Type B,有兩張床。房間都幾大,300幾呎,樓底高所以好有空間感,仲有落地玻璃。木材質感設計令到成個環境特別寫意舒適。所有家具同設備都係無印出品,最驚喜係有由深澤直人設計的掛牆式CD播放器,預先入左隻碟,播放無印店內聽到的音樂。其實我從來冇留意無印的音樂,總之就係令人好放鬆的輕柔音樂,加分位。提兵免費水、咖啡同茶包,而雪櫃仲有免費茉莉花茶。


浴室比較細,但廁所係日本個種多功能廁所,而花灑水力好夠,所以都唔錯。重點係牙刷、牙膏、浴帽、化妝棉、洗頭水、護髮素、沐浴露同洗手液,都係無印產品呀!平時住酒店我都用自己帶去的洗頭水同護髮素,不過今次我都忍唔住要用無印產品啦,好香!


講埋酒店其他設施啦,3樓的Gym Room 唔大,大約7-10部機左右,落去個陣幾部機都有人用緊。另外仲有個open area俾你睇書,好大個書櫃,書的種類都幾多,但只可以留係呢層睇,唔可以借返房架。呢個環境幾寧靜,隔離仲有個會議室。


房價包早餐,餐廳叫Muji Diner,環境都幾靚,但食物質素真的一般。


早餐可以揀中式、西式同日式。中式我地冇揀,見到係點心。西式就係煙肉、炒蛋、香腸、生菜、哈密瓜。日式就有玉子卷、燒三文魚、南瓜同菜,我食日式,味道麻麻,唔凍唔熱,唔知想點。如果就咁買一個餐要人民幣78,可以話完全唔值。另外仲有個自助區,可以任拎麵包、麵豉湯、咖哩飯、水果同飲品。咖哩飯反而幾好食,可以一試。早餐供應到10點,建議大家早少少落黎食,9點半之後就冇再refill了。非住客都可以黎食野架,不過住客早餐個價會平D。


餐廳隔離就係無印旗艦店,有兩層,真係好好好大。比較特別係有幾個大型藝術裝置、有刺繡工房,可以加錢即場有專人幫你刺繡、好多書、大型傢具等等,呢D都係香港無印冇既。行係幾好行,不過大部份貨品價錢其實同香港好接近,冇咩需要呢度買。


整體來說成間酒店我幾鍾意間房,簡約就是美,好relax。但其他野都麻麻地,服務一般,唔係太親切,食物都一般,設施都好普通,而且地點唔方便,由地鐵站行過黎要15-20分鐘,搭的士唔貴既,不過可能因為仲好新,好多的士司機都唔係好知邊度黎。價錢最平大約人民幣900幾起跳,連早餐。其實偏貴,不過如果係無印fans,都可以黎體驗一下既。

酒店連住個商場深業上城唔算太多野行,因為都好新,好多舖未開。但3樓有個叫小鎮的區域就好適合影相,因為有好多彩色的牆同建築,都幾繽紛,喜茶都係呢層。check out左就可以黎行下影下相啦。


深圳無印良品酒店 Muji Hotel ShenZhen
地址:福田區皇崗路 5001 號深業上城
交通:福田口岸乘搭的士約15分鐘 或 地鐵蓮花村站行15分鐘
網址︰hotel.muji.com

留言


請按此登錄後留言。未成為會員? 立即註冊
    快捷鍵:←
    快捷鍵:→