[澳洲景點] 墨爾本企鵝島Phillip Island一日遊 親親國寶動物樹熊袋鼠 靜待企鵝回巢

除左大洋路一日團（詳情），我仲參加左企鵝島(Phillip Island)一日遊，全日行程都係同動物有關架，可以近距離接觸我超鍾意的樹熊，仲有好打得的袋鼠，同埋夜晚去海邊睇企鵝回巢。因為行程會去到夜晚，所以出發時間係中午12點，都係由墨爾本市中心出發，去企鵝島約兩個幾鐘車程。

第一站係一個小型動物園，名為Maru Koala & Animal Park。呢個動物園只有幾種動物，有我最最最愛的樹熊！好得意呀～～～～呢度有幾隻樹熊，多數訓緊覺，但都有兩隻幾活躍，爬黎爬去，真係好得意呀！！！

呢度有同樹熊影相的環節，澳幣$18就可以摸住樹熊影一張相啦，動物園會幫你影一張曬埋俾你，都幾大張同時你都可以自己用相機影好多好多張，整個影相時間大約3分鐘啦。第一次摸樹熊，原來佢係地毯質地架喎！你可以拎葉餵佢，不過佢未必理你，哈哈，總之都係好得意啦～～～好想抱呀，不過澳洲唔係所有地方都可以抱樹熊，呢度就唔可以喇，但可以近距離見到已經好開心啦！


另外仲可以同袋鼠玩，有10幾隻袋鼠，可以用澳幣$2買飼料餵佢地。一路餵一路驚佢地會無啦啦揮拳打人，不過佢地都好乖，冇亂郁，仲同我合照，哈哈。同袋鼠合照唔駛錢的，呢度只有同樹熊影先收費。

仲有草泥馬啦、馬仔同埋驢仔～


去完動物園，下一站都係同樹熊有關的，就係樹熊保育中心 (Koala Conservation Centre)。呢個地方同頭先動物園有點不同，就係保育中心的樹熊都係野生的，呢度成個森林甘，樹好高好高，見唔見到樹熊有點靠緣份。不過我同樹熊好有緣，見到幾隻！有d在樹頂，超高！（樹熊都不畏高嗎？）有幾隻在樹比較低的位置，可以好近睇到，但全部訓緊覺......保育中心唔會有同樹熊合照的環節，要影相去動物園比較適合，但呢度就有好多關於樹熊的資料，可以更加了解呢種可愛的動物。

之後呢係食early dinner的時間嚕，因為夜晚要睇企鵝回巢，所以早少少食晚餐，大約6點就去到Nobbies Centre，佢係一個有關於南極的展覽又有類似canteen的地方，食物質素非常一般，但有個超級靚的海景。行出去會有步道，有好多海鷗，仲係好多企鵝的屋企，有機會見到企鵝仔，好得意！但好大風！！！

食完飯就會去到睇企鵝回巢的地方，個度有個遊客中心，有企鵝紀念品商店、小食店、會播關於企鵝回巢片的播影廳、企鵝資料館同埋幫你同企鵝影相。但企鵝是假的，遊客企係個淨色的佈景前影相，工作人員就會幫你key落一埋企鵝仔度架啦，好似要澳幣$11一張，但假的相我沒興趣呀。


企鵝回巢係一個好得意的自然奇觀，話說企鵝每朝都會游水去勁遠勁遠的地方覓食，跟住每晚某個時段就會游水返黎，所以大家睇到的就會係企鵝返黎屋企的情況。我覺得好神奇呀！！！因為佢地係幾準時出現架，個感覺好似每日準時放工返黎......但佢地係企鵝！而且又真係認得路返屋企架喎，佢地好似有曬路線好清楚自己屋企係咩位置，而又有d冇出去覓食的企鵝仔係度等佢地返黎，見到佢地會合個下，成個畫面真係太有愛又太可愛啦！呢隻係等緊其他企鵝返黎的～


唔同季節企鵝回巢時間都唔一樣，夏季大約係夜晚9點幾，冬天會早少少，專業人員每日都會有預測（唔知點預測），跟住同現場觀眾講既。企鵝係游水返黎，所以好多人一早霸定海灘的位，想近距離睇到佢地返黎個一刻。但我想話海邊超超超凍，明明下晝30幾度，夜晚海邊好似得幾度......所以我一直匿埋室內的遊客中心，直到差唔多夠鐘先出去等企鵝。大家黎一定一定要著夠衫呀！！！


大約9點3左右，海邊真係突然出現一堆游緊返黎的企鵝！！！超得意呀！！！有好多好多隻，睇住佢地慢慢行返岸邊返屋企，真係好搞笑！！！不過現場唔俾影相，所以我就上網搵左張相俾大家睇下啦。現場睇真係好得意架，有幾10隻，我覺得企鵝真係好勁......睇完返到市中心已經係夜晚12點啦，個一日團就完結了。（圖片來源：visitmelbourne.com）


呢個一日團同我上一個大洋路一日團係同一間公司，所以都一樣係好多人，40幾人。但個導遊正常好多，係個20幾歲的女導遊，佢講野清楚好多，而且準備左好多資料講解俾團友聽，都好關心團友（例如問我夠唔夠衫提我睇企鵝個度好凍），成個感覺比大洋路一日團好好多！但因為呢間公司每個團質素冇咩保證，所以都係唔開名介紹佢啦。不過呢個團的行程好岩我，睇動物好開心啊！！！如果你都鍾意睇動物，可以考慮參加類似行程的一日團。