[澳洲景點] 墨爾本最美海洋公路 大洋路一日遊 自然奇觀十二門徒石

少女旅行日記 於 04/12/2016 發表 收藏文章
墨爾本遠離市區有好多景點,唔識揸車的話可以參加一日團,選擇好多,其中一個極受歡迎的係大洋路(Great Ocean Road)行程,因為有十二門徒石奇觀,都算係澳洲一個必去景點。大洋路係一條海岸公路,沿路都係超級靚的海岸風景,除左十二門徒石,一般行程都仲會包多幾個附近的景點。市區唐人街個邊有好多旅行社,可以今日報名聽日出發,我就隨意揀左兩個一日團,一個係大洋路,另一個係去睇企鵝回巢的。今次就介紹大洋路的行程先。


行程第一站就係十二門徒石(The Twelve Apostles)啦,離墨爾本市區都幾遠,差唔多3個鐘車程先到!落左車見到真身,嘩真係好壯觀!我去個日天氣又好好,更加靚!海水又綠又藍,無邊無際!眼前的石柱係經過千年萬年才形成的,真的好神奇。但數黎數去都唔夠12個石柱,原來因為長年累月受到海水侵蝕,而家淨返7個咋。(但據說其實最初都唔係12個,好似係9個)而侵蝕係唔會完,唔知幾時會再少一個,大家要趁早黎睇呀。大家仲可以揀坐直昇機從高空欣賞,冇記錯係大約澳幣$100,即係港幣$600,唔算貴呀,但我冇坐,就甘睇都好靚啦。但想提提大家呢度超級大風~~


然後下一站係附近的六合谷(Loch Ard Gorge),呢個係由海水沖刷出来的峽谷,有人係度曬太陽,落水玩都可以,大家可以近距離觀賞峽谷的岩石,我都覺得呢度好靚好靚。但同樣,都係好大風......


之後就去左一個名為阿波羅灣(Apllo Bay)的海邊小鎮食lunch,有幾間餐廳可以揀,我揀左食fish & chips,又幾好食,不過唔係重點,重點係食完即衝出去餐廳外個海灘hea。我覺得澳洲最正就係海景,有無數個海灘俾你好好hea,澳洲充滿無可取代的悠閒氣氛呀!!!


食完之後就已經起程返市中心,感覺上唔係去左好多地方,但其實連埋車程已經11個鐘啦。大約係朝早7點出發,6點返到市中心。不過坦白講,我唔特別推介呢個團,因為我覺得個導遊麻麻地,佢係一個講普通話的阿叔,成程車佢都好似自己同自己講野,勁細聲,完全聽唔到佢講咩。而且個團超多人,40幾人,太多啦!所以大家報團可以搵多d資料再決定。但大洋路係絕對值得去架,可以自駕遊就最好!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→