無懼世事變改 還是越難越買的手信愛與恨

少女旅行日記 於 18/12/2014 發表 收藏文章
老老實實,你有冇嫌棄過人地買俾你既手信?

台灣:「又係鳳梨酥,誠品都有得買啦」
東京:「又係香蕉蛋糕,實係臨上機求其買啦」
韓國:「嘩呢d mask咩牌子黎架用左會唔會爛面架」
世界各地:「喂鎖匙扣真係好老土呀買文具做乜呀仲細咩呢個擺設又想點架唔得意囉有咩甘特別」

承認吧。年中大家收甘多手信,或多或少都會覺得有d手信唔收好過收或者勉強收左都要暗地裡嫌棄返幾分鐘先安落。
有時會覺得買手信呢樣野真係吃力不討好。

首先係香港作為一個所謂國際大都會crossover鳩嗚天堂,可以買到既野實在太多太多,世界各地既產品稍為火紅少少都會被極速傳入香港。想食日韓零食可以去阿信屋;微熱山丘鳳梨酥好潮咩中環都有分店啦;連新加坡阿坤都已經有兩間分店;韓國蜂巢雪糕開左幾十間;台灣好味查理布丁旺角又有;韓國化妝品牌幾乎間間都落戶香港......其實仲有咩係香港冇架呢?要買到有特色的手信真係好難。

加上而家廉航當道,大家去旅行的次數太頻密,每個月都聽到有朋友去日韓台星馬泰,總之唔係你去就我去或者佢去,我買俾你你又買俾佢佢買返俾我來來回回確實好無謂。有日我忽然發現我屋企有4個十分的天燈吊飾,來自不同的朋友......漸漸大家收手信都收到好麻木,收到又唔會特別開心,再唔係小朋友個時聽到有同學去旅行覺得人地好威威,收到古靈精怪既手信都可以開心一整日覺得自己都有份環遊世界甘。

但又正正因為手信好難買,我就更加欣賞堅持買手信個份心意。去到外地梗係想瘋狂玩玩玩買買買啦,你以為人地好得閒揀手信?拎住一袋二袋唔係買俾自己既野好開心?明知你地可能嫌三嫌四都仲要花心思花時間買,都係因為想話你知我去玩都有掛住你架、見到得意野都會諗起你架、食到好味既野都想同你開心share架、雖然你留係香港返工冇假放好可憐不過有我氹返你!有d朋友仲好有心思,記得你特別鍾意既野,當收到一d為自己度身訂做既手信真係好窩心!

其實無論收到咩手信,只要諗到個份越難越買的心意,就已經值得一句衷心的感謝啦。

(圖是我近來收過最喜愛的手信!來自大阪的冬日版亞美。)

留言


請按此登錄後留言。未成為會員? 立即註冊
    快捷鍵:←
    快捷鍵:→