[重遊關島] 絕美太平洋島國 6個關島Q&A 廉航直飛度假天堂

少女旅行日記 於 14/11/2016 發表 收藏文章
兩年前第一次踏足關島,已經覺得「嘩,呢度真係好靚」,我去過唔少以陽光與海灘作賣點的地方,關島暫時係我去過最靚的。兩年後有機會重遊,特別鳴謝關島觀光局的邀請,將我帶返黎呢個天堂,再一次感受關島的美好。知道好多人對關島都唔多認識,所以重遊關島的第一篇遊記,就由Q&A開始,簡單介紹一下呢個太平洋島國。


Q1 關島屬於咩國家?香港人去要唔要簽證?

關島位於太平洋上,係美國的屬地,曾經經歷過西班牙同日本的統治,在第二次世界大戰完結後正式成為美國屬地。香港人持特區護照去美國要簽證,而且都幾貴下,但去關島竟然係免簽證的,所以好正架!!!不過入境個時要帶定香港身份證。另外,持BNO去關島都係免簽證。


Q2 由香港飛關島要幾耐?有咩航空公司選擇?

雖然關島係美國屬地,但離美國都幾遠,反而由香港直飛關島只需大約4個半鐘,都算好近。直航有兩間航空公司可以選擇,第一間係傳統航空公司聯合航空,每星期4班來往香港同關島,凌晨機去黃昏時間返。第二間係廉航香港快運,2016年12月15日將會首航來往香港同關島直航,每星期4班機,時間唔錯,早機去黃昏時間返。價錢比較,一定係聯合航空貴,正價3000幾未連稅,有時減價2000幾。香港快運正價唔知道,反正成日減價,一減價可以減到只需幾百蚊一程,搶到減價飛的話好抵,不過唔包行李同飛機餐,加加埋埋又可能同聯合航空減價個時差唔多。

除左直航外,仲可以選擇轉機。可以搭長榮航空去台北轉;日本航空去東京轉;大韓航空去首爾轉。


Q3 關島住的多數係咩人?講咩語言?用咩貨幣?

關島一半係查莫洛人,即係關島的原住民,有1/4係美國人。佢地主要都係講英文。佢地仲會講查莫洛語,不過唔會同你講,講黎講去都係hafa adai,即係hello。美國地方用美金呀。


Q4 關島有冇冬天?同香港有冇時差?

怕凍的孩子有福了,關島全年夏天,氣溫維持在24-30度,香港冬天個陣黎避寒一流。不過關島都有分兩個季節,就係7-11月係雨季;12-6月係非雨季。雨季的關島一日可以落幾次雨,但好多時都係落一陣就停,出陽光一陣又落一陣雨。除非淨係流連商場,如果唔係要注意關島戶外地區極多,雨季真係要帶定遮出去。

關島快香港兩個鐘。


Q5 關島有咩交通工具?交通方唔方便?

關島係一個好適合自駕遊的地方......(係咪即係間接答左第二題?)先講機場交通啦,大部份酒店都提供免費機場接送服務,所以呢部份唔駛擔心。如果唔識?車,在關島就只有巴士或者的士可以搭,巴士其實都幾方便,好多主要景點都去到,而且唔少酒店都有免費接駁巴士去杜夢灣個商場區域架!當然都係租車自駕遊最好啦。


Q6 關島點玩法?

黎緊會寫詳細(少少)的遊記,不過都可以先簡單講下等大家有個概念。關島可以簡單劃分幾個區域,我當然冇全部去曬,但都去過最主要的3個部份,包括杜夢灣區、亞加納地區同南部。

杜夢灣區可以當係關島市區,最熱鬧、最多商場、最多酒店、最多遊客的地方。呢一區好有美國風情,但最吸引我係杜夢灣本身,係一個好好好好好靚的海灣。我覺得呢區可以留返每晚完成曬下畫的行程同活動之後先黎食飯行街。呢度有個關島最出名的景點-情人崖,黃昏睇日落海景好正。


亞加納地區係一個比較多歷史同文化景點的區域,大部份景點都同關島以前的戰爭歷史有關,或者係西班牙統治時期遺留落黎的建築物。


南部地區以大自然景色為主,睇海睇山睇瀑布,鍾意天然風景的一定要黎南部。


黎到關島,絕對唔會只有靜態觀光,大部份時間應該都會去左玩好多唔同的刺激活動!一連串水上活動包括水上電單車、划獨木舟、香蕉船、海上拖曳傘、浮潛、深潛、坐潛水艇、出海睇海豚......玩完水就上天空啦,高空跳傘、駕駛小型飛機或者玩滑翔傘都好正。其他好玩活動仲有高空滑索、實彈射擊、美式賽車、四驅車......關島真係好好好好多野玩架,想報名參加以上活動可以預先上網報定,或者去到當地經酒店或旅行社報都得。


假設你黎關島一星期,用2日觀光同購物,仲有3-4日可以玩盡唔同的活動,有時間淨就享受下酒店設施(關島酒店大多係resort,正架),再隨便搵個沙灘曬下太陽,完美假期。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→