[首爾食食食] 貪心的人有福了 新村八色五花烤肉 八種口味胃口大滿足 精選 推薦

去韓國食韓燒是常識吧，燒五花腩更加係一樣必食既美食啊！今次推介呢間烤肉店，最特別就係一次過可以食到8種唔同口味的五花腩，岩曬貪心的胃食人士。


新村八色五花烤肉位於地鐵新村站，6號出口過馬路之後行上斜路3分鐘就到，好方便。餐廳在地底，行樓梯個時見到呢間餐廳有好多名人黎過同好多傳媒訪問，應該係當地好火紅的餐廳啊。8點左右到要等位，等左大約20分鐘，貼心的是有個等位區可以坐住等同有水飲。




餐廳環境幾舒服，唔會太擠迫，設計以木色為主。最得意係牆上的畫明明係畫古代韓國村落的生活狀況，但會無啦啦出現海賊王的卡通、外國人公仔等等，好搞笑。




一埋位每張枱已經有一窩免費的海鮮辣湯，唔好睇個湯好似清湯顏色，只係未開火。一開火，辣粉就慢慢飄上黎，成窩變左橙紅色。個湯都幾好飲，辣度大概係小辣到中辣之間。另外仲有用黎夾住燒肉一齊食的菜，仲可以免費自由添加。當然唔少得泡菜同芽菜。



現場幾乎所有人都係點呢個八色烤肉，價錢係30,000won，約港幣$214，係2-3個人的份量，價錢都幾合理。8種唔同口味的五花腩出現啦！味道按次序係人參、紅酒、松葉、大蒜、香草、咖喱、大醬、辣醬。個次序其實係由淡味到濃味，而職員會幫你燒埋，都係由淡味的五花腩開始燒。每個口味只有一塊五花腩，每塊既size大概可以剪成5舊一口食到的大小。

至於味道呢，我覺得最好食係紅酒、大蒜、大醬同辣醬。其實呢幾隻味就係比較接近我地平時食個d燒肉既味......即係話最普通的味就係最好的味，哈哈。紅酒其實就冇乜紅酒味既，其他幾款就真係好入味，甘大蒜、大醬同辣本身就好食架啦，所以多數唔會中伏架喎！其他味都OK既，唔難食，只係唔會特別想再食甘囉......個人覺得人參味係最唔好食！！如果想追加鍾意既口味，加10000won就可以多一份啦！


總結就係可以一試，8隻味總有幾種岩你口味，其他特別的口味都一試無妨，不過就唔算係好好食，唔係非食不可啊。（倒米小姐飄走）

八色五花烤肉

地址：首爾特別市麻浦區老姑山洞107-111,B1F （呢個地址個名唔係太好.....）
交通：地鐵新村站6號出口行3分鐘
營業時間：11:00－24:00

是次韓國之旅由Wi-fly 提供上網贊助。