[香港] 尼泊爾Cocktail大師主理 佐敦異國風酒吧Funky Monkey

少女旅行日記 於 11/08/2016 發表 收藏文章
出黎啦酒鬼們!Gotcha!少女閒時都鍾意搵間有style的酒吧飲飲cocktail同frd子風花雪月,今次就有間由獲獎無數的cocktail大師主理的酒吧想推介俾大家啦。位於佐敦偉晴街的Funky Monkey,店如其名,裝潢好funky好有style,勁有異國情調。


老闆係來自尼泊爾的Dipen,佢來頭非常強勁,曾經贏過多個cocktail比賽,其中一個就係好出名的「42Below Cocktail Competition」,仲曾經代表香港去新西蘭參加世界賽,仲入埋決賽添,可以話係一個cocktail master!所以今次黎到Funky Monkey最重要就係試佢親自調的特製cocktails!


Cocktail分左3類,第一類係Tiki Cocktails;第二類係Berries & Fruits;第三類係Flowers Spiced。第一類的Cocktail係青檸系列,其中一杯叫Flaming Monkey,個杯好得意,上個時仲會點火,好有型!第一下會燒到好勁,之後冷靜左張相都仲見到個火。第二杯係Tiki Monkey,同第一杯一樣都有青檸在面。Tiki Cocktails酒味會比較重,又會帶點青檸酸味,適合少男們。


而少女口味都好少女架麻,所以就偏好第二同第三類,果味同花味重的Cocktails。我就試左第二類的Soultini,粉紅色好得我歡心,混合士多啤梨、熱情果、菠蘿、檸檬味,甜甜地又有生果的清新,好飲。不過我最鍾意係屬於第三類的Blackberries & Lavender,杯酒好靚,有真花做裝飾,少女味出曬黎!Cocktail有淡淡薰衣草香,酒味唔濃,飲完一杯勁想encore!


Funky Monkey既cocktail就夠曬有特色,但老闆唔單止注重酒的質素,連食物都有驚喜!酒吧以西餐為主,亦有來自老闆家鄉的尼泊爾菜。我就試左一份炸雞翼,炸得好香脆,最特別係個醬,蕃茄味加少少辣,好開胃。另外叫左一個Lousiana Pizza,材料有雞胸肉、雜菌同mozzarella cheese,重點都係個醬呀,竟然係酸忌廉加泰式辣醬!呢個配搭係咪好新穎?個味原來好夾架,感覺好fresh,加埋pizza本身都好好味,推介!


對於仲未有機會踏足尼泊爾的少女黎講,尼泊爾菜係好新奇的,今次都係第一次食尼泊爾菜。呢個名為MOMO的尼泊爾招牌菜,外型似足小籠包,食落味道都似,但皮會厚身少少,裡面係菜同雞肉,肉汁多。Again,又係個醬汁係亮點呀,由幾種香料混合而成,一上枱已經聞到好好香,食落少少辣又有少少酸,味道有點複雜,但好好食呀,呢個係我既必食之選!所以我結論係Funky Monkey除左賣cocktail,仲賣醬......哈哈。


最重要係Funky Monkey既價格好抵,食物大多係$50-100,份量適中,Cocktail平均$100杯。想感受一下尼泊爾風情,飲杯特色cocktail,就要黎Funky Monkey啦!順帶一提,老闆有另一間分店在中環Soho,叫Hidden Garden,走高檔少少的路線,大家都可以去試下呀。

Funky Monkey
地址:佐敦偉晴街17號地下(地鐵柯士甸站A出口行約3分鐘)
營業時間:星期一至日 11:00-01:00
Facebook Page:https://www.facebook.com/funkymonkey.com.hk/

留言


請按此登錄後留言。未成為會員? 立即註冊
    快捷鍵:←
    快捷鍵:→