香港郊遊好去處 昂坪360水晶車廂 山與海在我腳下

少女旅行日記 於 19/11/2014 發表 收藏文章
踏入秋季天氣清爽,特別想離開嘈雜的市區,去郊外呼吸新鮮空氣,放鬆一下心情。旅行當然是個好方法,不過其實有時唔需要搭飛機,都一樣可以有旅行的感覺,因為香港本身已經有好多大自然好風景。今次唔搭飛機,我地去搭纜車!

昂坪 360 水晶車廂 飽覽大嶼山美景



一直都覺得坐纜車好好玩,可以從高空 360 度睇風景,從另一個角度看世界,睇到好遠好遠。今次仲要挑戰昂坪 360 水晶車廂,連個車底都係透明玻璃,真係山與海全在我腳下,呢 d 咪就係霸氣盡現囉!不過講真出發前都有少少緊張,唔知一陣纜車越上越高個時會唔會唔敢望地下......但原來係唔會架!!因為上到去見到自己俾山與海包圍勁興奮,掛住睇風景同影相完全唔識驚。我仲成日坐係地下從車底睇風景,有時係海,有時係山,有時係樹,仲見到好多行山人士,從呢個角度睇風景實在好果癮!



一程纜車究竟會經過咩地方呢?由東涌纜車站出發,主要會經過東涌灣、北大嶼山郊野公園、彌勒山、天壇大佛,最後到昂坪市集。藍藍綠綠的風景令人心情無限放鬆。而我最最最鍾意的一段係見到香港國際機場跑道,就算平時搭飛機返香港都好難見到整個國際機場,今次搭纜車可以從高空望到整個機場,又見到飛機升降,個畫面好靚啊~~~(讚嘆)




昂坪市集感受小鎮風情 玩轉 360 舞台與動感影院



約 25 分鐘的纜車旅程之後就到左昂坪市集。市集充滿古代中國風的建築,好多矮小的平房,主要係餐廳同賣紀念品的舖頭。值得推介的係 360 舞台,係一個室內互動表演,以動作電影做主題。功夫同動作系列係香港電影重要一環,我自己就好鍾意睇葉問。360 舞台的表演就示範左好多動作電影的幕後製作過程,例如音效、吊威也、爆破等等,好似置身於電影拍攝現場,真係大開眼界呢!表演仲加左唔少同現場觀眾的互動元素,隨時會俾人請上台一齊做示範架!哈哈。注意表演有指定時間,要預先買飛。




市集仲有個 360 動感影院,帶住 3D 眼鏡來一趟直昇機大嶼山之旅。約 10 分鐘的動感旅程,配合 4D 特效,帶你經過天壇大佛、大澳、梅窩、貝澳等地方,原來大嶼山仲有好多好靚的地方,下次郊遊有好多好選擇!4D 效果都唔馬虎,張櫈郁得幾勁下,仲有噴水同放泡泡,都幾好玩!


黃昏回程個時再坐纜車,仲見到日落,好靚。


大家想搭纜車的話我真的強烈建議坐水晶車廂,除左因為車底透明增強刺激外,最重要係幾乎唔駛排隊!!(呢樣對我太重要喇)特別係回程的時候,排標準車廂的人超過 100 人,見到條隊都想暈,而搭水晶車廂的係人數係......零!!我仲可以獨霸一整個車廂唔駛同其他遊客 share!真係 VIP 享受啊~~如果想經濟少少都可以考慮買一程標準車廂加一程水晶車廂,還是建議回程先坐水晶,因為去程條隊冇甘長呢。


(睇我個樣幾歡欣......哈哈!)

昂坪市集開放及營運時間:
平日:上午十時至下午六時

週末及公眾假期:上午九時至下午六時半
網址:http://www.np360.com.hk/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→