30歲之前我要擁有全世界

少女旅行日記 於 18/08/2015 發表 收藏文章
成日都見到好多文章,講「30歲之前必做的10件事」、「30歲前唔做你會後悔的事」、「30歲前你要明白的道理」......內容不外乎都係30歲前要去多d旅行、追求自由既生活、實現理想、做自己鍾意既事......點解呢?因為30歲之前既人係最冇負擔既,事業通常未有成就啦、通常未結婚啦、未有生活壓力啦......過左30,你要結婚要生仔要有穩定工作要有成就唔可以亂話辭職要養家屋企冇左你唔得你個仔會餓死。好似幾有道理呀呵。

但,點解要係30?點解過左30人既負擔就一定比以前重?因為你選擇結婚,你選擇生仔,你選擇要有高薪厚職,你覺得30歲以後既人生就一定要甘過。所以有咩野想做就30歲之前好做曬佢,最好30歲之前擁有全世界,30歲之後你冇得揀、你步步為營、你做每一個決定都相當沈重。其實一切都係源於你對30歲以後既人生有規限。越要教人地30歲前要做呢樣做個樣既人,其實就係最識得困住自己,對人生有太多不必要規限既人。除左白痴政府強制30歲以下既人先可以申請Working Holiday之外,冇乜野真係30歲之前先可以做。邊個話30歲一定要嫁得出?邊個話30歲就要揀安穩既工做到老?邊個話30歲之後就一定要循規蹈矩地生活?得你自己覺得咋麻。

許廷鏗都話:「若生命是無限,何必自訂界限?」人生既界線不在於幾多歲。一日未死,一日都係可以自由選擇做自己鍾意做既野。我同意好多野要趁早做,因為你唔知自己幾時死,同埋人越大身體會退化,唔似18/22甘多青春活力係真既,但唔會係30歲之後就好似乜都做唔到,而只剩下生活壓力同負擔。我鍾意做既事,做到我死之前都會繼續做,任何人都冇資格去話:「你30歲啦你唔可以點點點,或者你30歲啦你一定要甘甘甘。」年齡只係一個數字,唔代表任何野,有時可能年紀越大先越有能力同自由去追求自己想要既生活,好多人真正快樂既人生都由30甚至40歲先開始,一切都由你自己話事。

曾經睇過一個拍攝長達近50年的英國紀錄片《7 Up》,一開始攝製隊訪問左一班7歲小朋友,之後每隔7年就返去搵同一班人再做訪問,睇下同一個人在7、14、21、28、35、42、49、56歲的時候,愛情觀/人生觀/價值觀有咩唔同。呢個節目非常有趣,有受訪者細個個時話自己對婚姻完全冇興趣唔會結婚,但事隔幾十年有個幸福美滿家庭;有受訪者細個已經表現出性格自卑、內向、悲觀一面,而好多年後都仍然冇變,所以生活暗淡......其中一個最深印象的受訪者20幾歲的時候結左婚生左個女,30幾歲離左婚獨力湊女,兩個時期既訪問佢都表現出唔太開心。40幾歲再訪問佢,佢有份自己鍾意既工作、有個感情穩定男朋友、有自己既興趣,放假會去業餘劇團做話劇、同個已經長大左既女關係唔錯,重點係訪問中既佢比以前開心好多,佢都好滿意自己而家既生活。即係話,佢既快樂人生係40歲之後先出現的。當佢仲係青春少艾既時候,佢可能做錯過決定、對愛情、事業、生命感到迷茫、有好多不知所措既時候。年月過去,佢離青春越黎越遠,但亦越黎越知道自己想追求既係咩生活。年齡增長,快樂沒有減少,反而過得更豐盛。

年少多好?年少當然有年少的好,那種無憂無慮的生活叫人永遠難忘,但同樣成長也有成長的樂趣,而不是只有苦澀。至少,我地終於可以擺脫個段on99生勾勾每日都渾渾噩噩唔知做乜春的無知歲月。每個人成長的進度都不一樣,那些「25歲才明白的事」、「30歲前應該要知道的事」其實就如星座運程,人人皆可用,千句萬句總有一句可以對號入座,但說到底,你有你自己的經歷、有你自己的人生、有你自己想做的事、有你自己在不同階段才明白的道理。我唔想知你幾多歲,我只想知,你而家生活得好嗎?

留言


請按此登錄後留言。未成為會員? 立即註冊
    快捷鍵:←
    快捷鍵:→