Grad Trip，你是如此的難以忘記 精選

見到Facebook開始有好多今年畢業的孩子都上載左「終於考完試」、「正式加入失業大軍」、「告別地獄校園時」等等的status時，姐心諗：你們懂什麼，離開校園後的生活才是真正的地獄！讀書本身當然唔好玩，但讀書生活就好好玩，好玩在自由自在，想訓覺就訓覺、想放假就放假、想去旅行就去旅行，你試下係office做做下野話想訓陣先？你可以返屋企訓到死以後唔駛再返黎喇！你想去旅行？你讀熟曬D年度請假攻略計好曬先喎，咩話紅日機票貴？你老細理得你佢淨⋯⋯係知你一年得個10日假同埋唔該放假前做好曬未來一星期所有野先好拎假。
所以話呢，讀書真係人生最美好最自由的時光啊！而Grad Trip係呢個情況下就顯得別具意義，大概會係你最無憂無慮同隨心所欲的一次旅行。沒有功課要交、沒有工作壓力、沒有時間限制、沒有......錢。但這個真的不重要，駛曬咪返黎開始搵錢囉，反正你人生往後數十載除左搵錢都冇咩其他野好做架喇。(哭)

想當年我真的豁出去，帶住蓄左成年的積蓄去左3星期歐洲，想學人走過浮華大地、吸收歐陸氣息、增加文化修養......well，去到先發現我僅有的積蓄連想食餐好少少都唔夠。但係，終於見到久仰大名的倫敦大笨鐘、去到浪漫到極致的威尼斯彩色島時，那種感動至今都仍然留在心裡，美好的風景從來沒有在腦海中消失過。世界真的好可愛，這是我在Grad Trip裡最大的發現，也是我往後做人的信念。
無論你的Grad Trip要去哪裡、跟什麼人去也好，都必然是一次難忘的旅程。因為那是你意識到人生原來只是場騙局前的最後享受。所以，奔跑吧，孩子！