[三亞住宿] 五星級度假享受 金茂三亞亞龍灣希爾頓大酒店 精選

夏天想同陽光玩遊戲，近近地去三亞都是一個不錯的選擇，只需一個小時的機程就到了！！而在三亞揀一間好的酒店好重要，因為本身呢個地方景點唔多，都係度假為主，所以好多時間都會留在酒店裡歎世界，所以一定要揀間最正的！今次介紹的是位於三亞著名海灘亞龍灣的金茂三亞希爾頓大酒店。希爾頓其實本身已經是一個保證，這次也絕對沒有令人失望。


作為度假酒店，泳池是一大重點。在check in時從大堂的cafe見到酒店的泳池景已經超級興奮，好大好靚！周圍仲種左好多椰樹，濃厚的度假風！Check in後急不及待換泳衣飛落泳池玩水。泳池區環境好舒服，有幾個唔同size的泳池，其實我係唔識游水的！！哈哈！！所以我就租左個浮板玩下水，冇記錯係$30人民幣租一個鐘，價錢算合理吧。除左幾個泳池外，我最鍾意係中間個人造沙灘！！水不太深，好適合唔識游水既人玩水！住左酒店3日，每日都有落去玩水，最正係無論任何時間都唔太多人，有時仲可以獨霸成個人造沙灘，曬太陽定玩水都完全不受騷擾，真係會歎到唔捨走！！








講到玩水，除左泳池區外，酒店旁邊就已經是三亞其中一個著名海灘亞龍灣，由泳池區行過去只需三分鐘，簡直係私人沙灘！重點是人不多，不是那種擠滿遊客的沙灘，仲幾乾淨添！！曬太陽同游水都可以啊～～酒店在沙灘設有counter，提供不少水上活動，香蕉船、海上拖曳傘、水上電單車等。比起其他地方，例如泰國同墾丁，呢度既水上活動好貴！！我玩左水上電單車，要人民幣$300/15分鐘！！！！但真係好好玩，好刺激！教練俾我自己控制架電單車，我開到勁快，當日浪又大，更加好玩！！（因為墾丁係由教練控制而自己只可以坐後面，不好玩呢）不過真係唔捨得玩第2次，太貴啦！！三亞仲有好多地方可以玩水上活動，應該會平一點的，但在酒店旁邊就可以玩不用出去，算是用錢買了方便吧！




至於房間我都好滿意，今次入住豪華海景房，主要望泳池景，仲會望到亞龍灣海景，景色不錯。房間有個私人露台，黃昏日落景好靚；夜晚係露台可以望到密密埋埋的星星，大愛！間房我最鍾意係大圓型浴缸，一個人浸好寬敞，兩個人都應該可以。我特登帶埋牛奶浴鹽去浸浴，好寫意～我間房的浴缸係比較入的位置，隔離係床，再到梳化先係露台，所以比較難一路浸一路睇景。我見到有其他房型個浴缸係露台隔離，似乎會仲正，可以一路浸浴一路欣賞海景。床都好舒服，多次攤攤下訓著左，所以大家可以想像我整個旅程都係玩水之後訓著之後再玩水再訓著無限loop。整體黎講房夠大，乾淨舒服。





今次亦試左做spa，spa區自成一角，由酒店大堂過去會經過涼亭、湖、同埋好多樹的小路，做spa前可以放鬆心情。去到接待處環境都好舒服，裝修以木色為主。登記後會俾杯茶你坐住等，之後就會帶到去一間獨立別墅做spa，入面有兩張床同浴室，仲有兩面落地玻璃，所以出面的園林氣息都會滲透左入房。今次做的係磨砂加全身按摩，師傅手勢唔錯，加上環境又寫意，舒服到訓著！價錢約人民幣$1,200，對我來說有點貴，不過難得一次就轄出去吧！！哈哈！



最後，酒店的自助早餐好豐富，中西式都有，好多選擇，麵包都有10幾款！！水準就還好，沒有特別驚喜的食物，但整體是不錯。服務態度也值得一讚！無論是check in、spa、泳池區、餐廳，職員都很有禮。總括來說是間很捧的度假酒店！有五星級的享受，這個價錢是物超所值啊！







金茂三亞亞龍灣希爾頓大酒店　Hilton Sanya Yalong Bay Resort & Spa
豪華海景房房價約$2000/晚