[大阪景點] 天保山室內動物園 親親小動物與草泥馬 精選 推薦

我是個對動物世界很好奇的傢伙，所以動物園、水族館、有動物做賣點的cafe、可以玩綿羊的農場很多時都在我的行程中出現。這次來到大阪，找到了一個在商場裡的小型動物園，跟小動物來個親密接觸！

今次目的地在地鐵大阪港站，呢區最出名的係全球第二高同大的天保山摩天輪（第一係London Eye喎原來），仲有海遊館，所以都係唔少旅客會去的地方。不過大家唔好漏左摩天輪旁邊的商場Market Place，因為可愛的小動物們就在入面等大家啦！天保山動物園位於商場3樓，入場費600YEN。


動物園分三區，未入場之前在門口已經見到第一個區的小動物，主要係比較細小的動物例如兔仔、天葵鼠同中型size的龜。大家可以摸小動物同唔開閃光燈影相，不過抱起佢地就唔得啦！我本身好鍾意兔仔，呢一區除左有幾隻小兔仔外，最得意係有兩隻大兔仔！！！有幾大？大概係一隻貴婦狗的size，在兔仔界黎講應該都算係超巨型架啦！！！佢地仲會走黎走去，好活潑，得意到好想帶佢地返屋企！！（抱）







第二區呢就主要係貓貓狗狗區，總共有十幾隻不同品種的貓狗隨處遊盪，大家自己主動行埋去搵佢地呃水吹就可以了。哈哈。






第三區就會有比較特別的動物，一定要介紹的當然係我的好朋友草泥馬！！（草泥馬！草泥馬！草泥馬！）怎麼我聽到有人說普通話了？哈哈，網上睇相就睇得多，今次真係第一次見草泥馬真身，感覺非常趣怪，睇佢大大隻隻，但個樣實在太傻豬太好笑啦！！可能佢好習慣成為眾人眼中的焦點同鏡頭下的新星，所以佢係成日都會望鏡頭架......好好笑！佢仲好nice，我同佢交流甚多，大家黎探佢可以摸下佢攬下佢以示友好。






草泥馬的鄰居仲有幾隻袋鼠仔，佢地經常聯群結黨唔知係度做乜......總之你一行埋去佢地就會散開，同佢地合照既機會係零。不過就算佢企定定，你都唔可以同佢太親近，因為工作人員會阻止你，大概係驚你成為袋鼠練拳的對象。



同場仲有超大隻龜，感覺好像千年老龜，佢行埋黎我心裡會發毛，不好意思我不太喜歡牠。（走開）另外還有貓頭鷹博士、蜥蝪同兩隻樣子勁呆滯的......我不知道是什麼啦。然後他們就快快樂樂地生活下去。




同場加映: 搔擾完班可愛仔之後，可以去商場的美食小巷食野。小巷仿照1965年前後的大阪街道佈置，可以體驗下日式懷舊。入面有好出名的「北極星」，食蛋包飯，價錢略貴（好似要差唔多1000 YEN一個飯），但真係好好味！至於商場麻，也有精品店、服飾店、零食店等，可以逛一逛。





天保山動物園

開放時間: 星期二至日 11:00 - 19:30 （逢星期一休息）
地址：天保山Market Place3樓 （地鐵大阪港站行5~10分鐘）