一人一個最「un翻啅able」的旅遊城市

關於旅遊城市，成日都有好多所謂排行榜，「十大人生必去最美小鎮」、「十大最佳城市」、「最適合背包客獨遊城市」......唔好以為轉左個名我就唔認得你，其實個個都係差唔多既野，上榜既都離離去去都係個d城市，參考價值不大。而且每個人都硬係有一個屬於自己死都要去既dream place，呢d所謂排行榜基本上係完全動搖唔到大家。

作為一個專業的倒米少女，我反而對「十大就算有1蚊機票都唔想搶的城市」、「十大請我都唔去的城市」、「十大悶到發毛的城市」、「最令人後悔的旅遊城市」、「唔該立即回水的旅遊城市」比較有興趣，呢d先有警惕世人之效架麻。但呢d選舉要建基於你真係有去過個城市有親身感受過覺得佢真係好唔惦先可以講，因為如果只係你單純不感興趣冇打算去係冇意思既，我對津巴布韋冇興趣唔代表人地唔好玩架麻又未去過。所以，講一個你去過而又最「un翻啅able」的城市就好了。
我心目中有兩個城市叮噹馬頭，爭持不下，係真係有1蚊機票都唔會搶個隻，所以我貪心d，兩個都講下。講明先，歡迎平反，可能你睇到我睇唔到既野架麻......

第一個：吉隆坡

呢個城市簡直係成個「悶」字寫係佢塊土地上。無論天氣、景點、人，都係死氣沈沈。我去過兩次，日日唔係陰天，就係毛毛雨，甚至落大雨，本身個天已經係灰色的。呢度行街又冇野好買，衫褲鞋襪都唔係一般香港少女的style，就係有點老土那種。景點又唔吸引，去完都冇印象，係你連相都唔係太想影個種。唔好同我講個地標雙子塔，呢兩碌柱真係好核突。人呢，好多都木無表情，唔係太熱情。至於野食.....都ok既，椰漿飯同阿羅街的黃亞華燒雞翼幾好食，但都唔係會令人念念不忘好想再食個種程度。總括黎講吉隆坡真的蘇波榮。

第二個：上海

一個虛有其表的城市。係，d建築物係幾靚，特別係好舊式個d，同埋黃埔江一帶夜景。（但同香港比當然都係香港優勝）不過，都掩蓋唔到人民質素低的真相。以為香港地鐵已經好迫？少年你真的太年輕了，上海搭地鐵如果唔企近門口位真係想落車都難，一開門所有人都立即狗衝入黎，就算發出震撼性的聲音叫人借借都完全冇人理，每次落車都要抱住你不仁我不義的心態撞出個未來，好痛呀喂。呢個城市充斥呃錢的的士司機、撞狗你的路人、隨街痾尿的小孩、非常冷淡的店員、吵耳的街坊、高傲的西裝友......其實我唔講你地都想像到。拿，唔好衝出黎屈我歧視內地城市，同一個旅程仲去左杭州，係截然不同的感覺。杭州的人純樸得黎又友善，風景又靚，個西湖好有詩意，我buy囉。所以，表面風光，內心空洞是沒有意思的，共勉之。
到你地。